ءدال ءقازىر جوندەۋ زاۋىتى جانە «ماەك» جەس-تىڭ ماماندارىنىڭ بىرلەسۋىمەن ەنەرگيا بلوكتارىنداعى اپاتتىڭ سەبەپتەرىن جويۋ بويىنشا تاۋلىك بويى توللاسىز جۇمىس جۇرگىزىلۋدە.
– ءبىز №3 ەنەرگوبلوكتىڭ قىلشاق (ششەتكا) اپپاراتىن قالپىنا كەلتىرۋ بويىنشا جوندەۋ جۇمىستارىن جۇرگىزىپ جاتىرمىز جانە №1 جەس ەنەرگوبلوك قازاندىعىنىڭ اگرەگاتىندا جوندەۋ جۇمىستارى اياقتالىپ قالدى.
قازاندىق قوندىرعىسىنداعى جوندەۋ جۇمىستارىنىڭ سوڭعى كەزەڭىنە كەلدىك، ءقازىر وڭ جاق تۇشى بولىگىندەگى شامامەن 9 مەتر بولاتىن قۇبىرلار اۋىستىرىلدى.
ستانسيا مەن جوندەۋ زاۋىتىنىڭ قىزمەتكەرلەرى ەنەرگيا بلوكتارىن قالپىنا كەلتىرۋدى جەدەلدەتۋ ءۇشىن قولدارىنان كەلگەن بارلىق مۇمكىندىكتى جاسايدى، جوندەۋ زاۋىتىنىڭ جۇمىسشىلارى ەكى اۋىسىمدا 08:00-دەن 20:00-گە دەيىن جانە 20:00-دەن 08:00-گە دەيىن جۇمىس ىستەيدى، وسىلاي ءۇزىلىسسىز بىرنەشە بريگادا جۇمىس اتقارۋدا، – دەدى «ماەك» جەس باس ينجەنەرى سەرگەي راكوۆ.
ستانسيانى ارالاۋ بارىسىندا نۇرلان نوعايەۆ جاۋاپتى تۇلعالارعا ناقتى نۇسقاۋلار بەرىپ، ەنەرگيا بلوكتارىن قالپىنا كەلتىرۋ بويىنشا جوسپارلانعان جۇمىستاردى ۋاقتىلى جانە ساپالى اياقتاۋدىڭ ماڭىزدىلىعىن ايتتى.
– وبلىس تۇرعىندارىنىڭ تۇرمىس-تىرشىلىگىنە ءبىر دەن ءبىر اسەر ەتەتىن ول ماەك مەكەمەسى. ءوڭىرىمىزدىڭ وندىرىستىك الەۋەتىنىڭ كەڭەيىپ، ەنەرگەتيكالىق جاعىنان ءقاۋىپسىز بولۋى وسى ماڭىزدى كاسىپورىننىڭ كىدىرىسسىز، تۇراقتى جۇمىس ىستەۋىنە بايلانىستى. ورىن العان اپاتتى ساپالى، تەز قالپىنا كەلتىرۋ قاجەت.
سونىمەن قاتار، وسىنداي جاعداي ورىن الماس ءۇشىن الدىن الا بولجامدار جاساپ، بەكىتىلگەن كەستەگە سايكەس قۇرىلعىلارعا جوندەۋ جۇمىستارىن جۇرگىزۋ كەرەك. نەگىزگى مىندەت – ەنەرگيامەن جابدىقتاۋدىڭ تۇراقتى جانە سەنىمدى كوزىن قامتاماسىز ەتۋ. جابدىقتارلىڭ قازىرگى جاي-كۇيى مەن ولاردىڭ توزۋىن، رەزەرۆتىك قۋاتتىڭ جوقتىعىن ەسكەرە وتىرىپ، بۇل وڭاي ءىس ەمەس ەكەنىن تۇسىنەمىز. وسى تۇرعىدا اتقارىلىپ جاتقان ەڭبەك ءۇشىن «ماەك» ۇجىمىنا العىسىمدى بىلدىرە وتىرىپ، ونىڭ قىزمەتكەرلەرىنە تۋىنداعان اپاتتاردى جەدەل جويۋدا بارىنشا كۇش سالعانىن ايتقىم كەلەدى، – دەدى نۇرلان نوعايەۆ.
ەستەرىڭىزگە سالا كەتەيىك، ماڭعىستاۋدا اپتانىڭ سوڭىنا دەيىن بەكىتىلگەن كەستەگە سايكەس ەلەكتر قۋاتىن پايدالانۋ ۋاقىتشا شەكتەلگەن. بۇل اپاتتى جاعدايدا تۇرعان №3 ەنەرگيا بلوگىنداعى جوندەۋلەرگە جانە «ماەك» ەنەرگەتيكالىق كەشەنىندەگى №1 جەس ەنەرگيا بلوگىنىڭ جۇمىسىن ۋاقىتشا توقتاتۋعا بايلانىستى.
