ونىڭ ايتۋىنشا، باتىس ۋكراينامەن شەكتەلگەندى ءجون كورمەي، تاعى ءبىر ەلدى "تاربيەلەپ" جاتىر. كەلەشەكتە بۇل ەل باتىستىڭ وققاعارىنا اينالىپ، كرەملگە ازۋىن باتىراتىن بولادى، وسى سەبەپتى قازىردەن باستاپ قارىمتا قايتارۋعا قامدانا باستاعان ءجون.
رەسەيلىك پروپاگانديست دميتريي كيسەليەۆكە كەڭ-مول سۇحبات بەرگەن لاۆروۆ "ۋكراينادان كەيىن باسقا شاۋىپ، توسكە ورلەيتىن كىم بار؟ ءبىزدىڭ جاعامىزعا جارماساتىن كەلەسى ەل كىم بولادى؟ قازاقستان الدە قىرعىزستان با؟.." دەگەن پروۆوكاسيالىق ساۋالعا "مولدوۆا" دەپ تون ءپىشىپتى.
"باتىستىڭ ساياساتكەرلەرى رەسەيگە سوقتىقپاسا بويىنا اس باتپايتىنىن بىلەمىز. پۋتين دەسە، اتارعا وعى جوق ولار كيشينيەۆتى بىزگە قارسى ايداپ سالۋدى كوزدەپ وتىر. بۇل ەلدەگى باتىستىڭ ديكتاتى رەسەيدى قۇبىجىق قىپ كورسەتۋ ساياساتىن قىزۋ جۇرگىزۋدە. مولدوۆا پرەزيدەنتى مايي ساندۋ اق ءۇيدىڭ الدىندا قۇرداي جورعالايدى. ونىڭ ەسىل-دەرتى ناتو مۇشەلىگىنە ءوتۋ. ساندۋدىڭ ارتى تازا ەمەس، وندا رۋمىنيا ازاماتتىعى بار، رۋمىنيامەن بىرىگۋگە دايىن جانە ءىس جۇزىندە باتىستىڭ بارلىق تالابىن ەكى ەتپەي ورىندايدى، - دەدى لاۆروۆ.
رەسەيلىك ديپلومات مۇنىمەن شەكتەلىپ قالماي، تىرناقتاي عانا گرۋزياعا دا سۇيكەنىپ ءوتىپتى. "تبيليسي رەسەيدىڭ جۇيكەسىن جۇقارتىپ، دەگبىرىن قاشىراتىن فاكتورعا اينالعىسى كەلەدى" دەيدى ول.
پىكىرىنشە، پۋتين ۋكرايناداعى قانتوگىستىڭ نەعۇرلىم ەرتە اياقتالعانىن قالايدى. كرەمل كييەۆپەن ءپاتۋاعا كەلۋگە ءازىر.
"الايدا، – دەيدى لاۆروۆ، بۇل جەردە ۋاقىت ەمەس، ورىس حالقى ءۇشىن ناتيجەلەردىڭ كوڭىلگە قونىمدى بولعانى ماڭىزدى".
سۇحبات بارىسىندا لاۆروۆ ۋكراين جەرىندە قويشا قىرىلعان ورىس اسكەرى تۋرالى ايتۋعا وقتالادى دا، ارتىنشا بۇل ويىنان اينىپ قالادى. ويلانا كەلە ءپۋتيننىڭ جامباسىنا ايازداي باتاتىن تاقىرىپتى اينالىپ وتەدى.
وسى تۇستا:
جاڭا قازاقستاننىڭ جەمقورلىقتى جەڭە الماعانى ءمالىم بولدى. جاعداي جىلدان-جىلعا ناشارلاپ بارادى. تولىعىراق مىنا جەردە: t.me/dalainside
https://dalanews.kz/aimak/86144-turkistan-oblysynda-zhurgizilgen-saq
