كۇزدىڭ العاشقى ايلارىندا قازاقستان تۇرعىندارىن جىلى اۋا رايى قۋانتقان ەدى. الايدا، قازگيدرومەت مالىمەتىنشە، جاقسى كۇندەردى قامتاماسىز ەتكەن انتيسيكلون ەلىمىزدىڭ اۋماعىنان شىعىپ، ونىڭ ورنىن سۋىق سولتۇستىك سيكلون باسۋدا، دەپ حابارلايدى Dalanews.kz.
سۋىق اۋا ماسسالارىمەن قورەكتەنەتىن بۇل سيكلون قازاقستان ارقىلى جىلدام جىلجىپ، الدىمەن جاڭبىر، كەيىن قار تۇرىندە جاۋىن-شاشىن اكەلەدى. 4 قاراشادان باستاپ ەلدىڭ سولتۇستىك جانە شىعىس وڭىرلەرىندە قار جاۋادى. سونداي-اق ەكپىندى جەل، بوران جانە كوكتايعاق كۇتىلەدى.
اۋا تەمپەراتۋراسى دا بىرتىندەپ تومەندەيدى. سولتۇستىك جانە شىعىس ايماقتاردا 4 قاراشادا تۇندە 5–13 گرادۋس اياز، كۇندىز 3–11 گرادۋس اياز بولادى دەپ بولجانىپ وتىر.
سۋىق تولقىنى وڭتۇستىك وڭىرلەردى دە اينالىپ وتپەيدى. 4 قاراشادا جاڭبىر مەن قار تۇرىندەگى قاتتى جاۋىن-شاشىننان كەيىن ايماقتا اۋا تەمپەراتۋراسى تومەندەپ، تۇندە 0–13 گرادۋس اياز، كۇندىز 0–5 گرادۋس جىلى بولادى.
مەتەورولوگتار تۇرعىندارعا اۋا رايىنىڭ كۇرت وزگەرۋىنە دايىن بولۋدى، جولدا اباي بولىپ، جىلى كيىنۋدى ەسكەرتەدى.
