پاۆلودار وبلىسىنىڭ پروكۋرورلارى بەينەباقىلاۋ كامەرالارىن تەكسەرۋ بارىسىندا قارت تۇرعىنداردىڭ زورلىق-زومبىلىق كورگەنىن انىقتادى، دەپ حابارلايدى Dalanews.kz.

وقيعا اقسۋ قالاسىنداعى پانسيوناتتاردىڭ بىرىندە بولعان. زارداپ شەككەندەردىڭ اراسىندا 84 جاستاعى قاريا دا بار.

“ولارعا ۇنەمى كۇش كورسەتىپ، قولدارىن قايىرعان. ال قىستا سىرت كيىمسىز دالاعا شىعارعان. اقسۋ پروكۋراتۋراسى قىلمىستىق كودەكستىڭ 110-بابى 2-بولىگى („ازاپتاۋ“) بويىنشا سوتقا دەيىنگى تەرگەۋدى باستادى. بارلىق كىنالى تۇلعا انىقتالدى، تەرگەۋ بارىسى ەرەكشە باقىلاۋعا الىندى”، – دەپ حابارلادى پاۆلودار وبلىسىنىڭ پروكۋراتۋراسى.

ەسكە سالايىق، بۇعان دەيىن اقتوبە گارنيزونىنىڭ اسكەري سوتى ساربازدارعا قورلىق كورسەتكەن 42 جاستاعى سەرجانتقا سوت ۇكىمىن شىعارعان ەدى.

اقتاۋداعى 25744 اسكەري ءبولىمىنىڭ ۆزۆود كومانديرى ەكى ساربازدى تەمەكى تۇقىلىن جەۋگە ماجبۇرلەپ، ولاردىڭ ءبىرىن سوققىعا جىققان.

تەرگەۋ ماتەريالدارىنا سايكەس، سەرجانت كەرىموۆ مەديسينالىق روتا اۋماعىن تازالاۋ كەزىندە جەردە جاتقان تەمەكى تۇقىلىن تاۋىپ، ونى ساربازدارعا جەگىزگەن. ءبىراز ۋاقىتتان كەيىن ولاردىڭ ءبىرى ءوزىن ناشار سەزىنىپ، مەديسينالىق كومەككە جۇگىنگەن.

كەلەسى كۇنى سەرجانت بولمەدەگى تارتىپسىزدىككە اشۋلانىپ، سول ەكى ساربازدى قايتا شاقىرىپ العان. ولاردىڭ ءبىرىن بىرنەشە رەت تەۋىپ، فيزيكالىق جازا قولدانعان.

سوت بارىسىندا كەرىموۆ وزىنە تاعىلعان ايىپتاردى مويىندامادى. ونىڭ ايتۋىنشا، ساربازدارعا تەك سوگىس جاريالاعان، ال زورلىق-زومبىلىق ارەكەتتەرى بولماعان. الايدا جابىرلەنۋشىلەردىڭ ءبىرى اتالعان وقيعانى راستادى. ال ەكىنشى سارباز ەشقانداي شاعىمى جوق ەكەنىن جەتكىزدى.

سوت شەشىمى بويىنشا سەرجانت 2 جىلعا باس بوستاندىعىن شەكتەۋ جازاسىنا كەسىلدى. سونىمەن قاتار جىل سايىن 100 ساعات قوعامدىق جۇمىس ىستەۋگە مىندەتتەلدى.