Pavlodar oblysynyń prokýrorlary beinebaqylaý kameralaryn tekserý barysynda qart turǵyndardyń zorlyq-zombylyq kórgenin anyqtady, dep habarlaidy Dalanews.kz.
Oqiǵa Aqsý qalasyndaǵy pansionattardyń birinde bolǵan. Zardap shekkenderdiń arasynda 84 jastaǵy qariia da bar.
“Olarǵa únemi kúsh kórsetip, qoldaryn qaiyrǵan. Al qysta syrt kiimsiz dalaǵa shyǵarǵan. Aqsý prokýratýrasy Qylmystyq kodekstiń 110-baby 2-bóligi („Azaptaý“) boiynsha sotqa deiingi tergeýdi bastady. Barlyq kináli tulǵa anyqtaldy, tergeý barysy erekshe baqylaýǵa alyndy”, – dep habarlady Pavlodar oblysynyń prokýratýrasy.
Eske salaiyq, buǵan deiin Aqtóbe garnizonynyń áskeri soty sarbazdarǵa qorlyq kórsetken 42 jastaǵy serjantqa sot úkimin shyǵarǵan edi.
Aqtaýdaǵy 25744 áskeri bóliminiń vzvod komandiri eki sarbazdy temeki tuqylyn jeýge májbúrlep, olardyń birin soqqyǵa jyqqan.
Tergeý materialdaryna sáikes, serjant Kerimov meditsinalyq rota aýmaǵyn tazalaý kezinde jerde jatqan temeki tuqylyn taýyp, ony sarbazdarǵa jegizgen. Biraz ýaqyttan keiin olardyń biri ózin nashar sezinip, meditsinalyq kómekke júgingen.
Kelesi kúni serjant bólmedegi tártipsizdikke ashýlanyp, sol eki sarbazdy qaita shaqyryp alǵan. Olardyń birin birneshe ret teýip, fizikalyq jaza qoldanǵan.
Sot barysynda Kerimov ózine taǵylǵan aiyptardy moiyndamady. Onyń aitýynsha, sarbazdarǵa tek sógis jariialaǵan, al zorlyq-zombylyq áreketteri bolmaǵan. Alaida jábirlenýshilerdiń biri atalǵan oqiǵany rastady. Al ekinshi sarbaz eshqandai shaǵymy joq ekenin jetkizdi.
Sot sheshimi boiynsha serjant 2 jylǵa bas bostandyǵyn shekteý jazasyna kesildi. Sonymen qatar jyl saiyn 100 saǵat qoǵamdyq jumys isteýge mindetteldi.
