شىعىس قازاقستان وبلىسىنىڭ وڭىرلىك كوممۋنيكاسيالار قىزمەتى الاڭىندا، كۇرشىم اۋدانىنىڭ اكىمى المات اكىشوۆ 2023 جىلى اۋداندا 1122 جاڭا جۇمىس ورنىن قۇرۋ  ونىڭ ىشىندە 592 تۇراقتى، 530 ۋاقىتشا جۇمىس ورنىن قۇرۋ جوسپارلانعانىن جەتكىزدى، – دەپ حابارلايدى Dalanews.kz شقو اكىمىنىڭ باسپا ءسوز قىزمەتىنە سىلتەمە جاساپ.

– بۇگىنگى تاڭدا حالىقتى جۇمىسپەن قامتۋ ورتالىعىنا جۇمىسقا ورنالاسۋ ءۇشىن 570 ادام جۇگىندى، ونىڭ 390-ى بەلسەندى جۇمىسپەن قامتۋ شارالارىنا تارتىلدى، 66 ادام كاسىپكەرلىك نەگىزدەرىنە وقىتۋعا جىبەرىلدى. بيىلعى جىلى وبلىستىق بيۋدجەتتەن 49 ادامعا قىسقا مەرزىمدى كۋرس بويىنشا وقۋعا 13،5 ملن تەڭگە ءبولىندى، كۋرستار مامىر ايىندا باستالادى. ال جىل باسىنان بەرى 429 ورىن قۇرىلدى، – دەدى المات اقىشوۆ.

كۇرشىم اۋدانىنىڭ الەۋمەتتىك سالاسى تۋرالى ايتا كەلە، اكىم مەديسينانىڭ دامۋىنا توقتالدى.

ماسەلەن، 2023 جىلدىڭ قاڭتار ايىندا اۋداندىق اۋرۋحانانىڭ قابىلداۋ، پەرزەنتحانا، وپەراسيالىق بولىمشەلەرى كۇردەلى جوندەۋدەن كەيىن قايتا اشىلىپ، تولىق قۋاتتا جۇمىس ىستەي باستاعان.

– حيرۋرگيالىق بولىمدە ەندوسكوپيالىق وپەراسيالار دا جاسالادى. 2022 جىلدىڭ قازان ايىندا 1 دارىگەر-انەستەزيولوگ لاتۆيادا وقىپ كەلدى. الىنعان تاجىريبە وپەراسيالىق بولىمدە كولونوسكوپيا جۇرگىزۋ كەزىندە قولدانىلۋدا، – دەپ تولىقتىردى سپيكەر.

سونىمەن قاتار، 2023 جىلى اقجايلاۋ، ۇرىنحاي، جولنۇسقاۋ، امانات، مارالدى اۋىلدارىندا 686،9 ملن تەڭگەگە، سونداي-اق تاقىر جانە جاڭااۋىل اۋىلدارىندا – 32 ملن تەڭگەگە وفتەيك-كەلىسىمشارت شەڭبەرىندە مەديسينالىق پۋنكتتەر سالىنباق.

ال اعىمداعى جىلى قاراشىلىك، قاينارلى، قۇيعان، سارىولەڭ، باراق باتىر، يگىلىك، جولنۇسقاۋ ەلدى مەكەندەرىندە 254،8 ملن تەڭگەگە 14 ءبىر پاتەرلى ءۇي ساتىپ الۋ جوسپارلانۋدا.