بەلگىلى زاڭگەر ءارى قوعام بەلسەندىسى ايگۇل ورىنبەك ايتىسكەر، كوۋچ اينۇر تۇرسىنبايەۆانىڭ "ايدىڭ نۇرى" قايىرىمدىلىق قورىنا قاتىستى تەرگەۋ جۇرگىزۋدى تالاپ ەتتى. بۇل تۋرالى ول ءوزىنىڭ Facebook پاراقشاسىندا جازدى، دەپ حابارلايدى Dalanews.kz.
"ايدىڭ نۇرىن قورى ءدال پەريزاتتىڭ قورى سياقتى مۇقيات تەكسەرىلۋى كەرەك دەپ تالاپ ەتەمىن! قاندى قاڭتار وقيعاسىنىڭ الدىندا حالىقتان اياماي اقشا جينالدى. كەيىن مەنىڭ تەكسەرسىن دەگەن سۇرانىسىمنان سوڭ قور جابىلا سالدى. بۇل — ۇلكەن كۇدىك تۋدىرادى"، - دەدى ول.
زاڭگەر ەلىمىزدە ەش باقىلاۋسىز جۇمىس ىستەيتىن قورلاردىڭ كوبەيىپ كەتكەنىنە الاڭدادى. ونىڭ پىكىرىنشە، كەيبىر شەنەۋنىكتەر مەن اكىمدەر كاسىپكەرلەردەن زاڭسىز اقشا جيناۋدى ءدال وسىنداي قورلار ارقىلى جۇزەگە اسىرادى.
"ياعني، پارانى اينالىپ ءوتىپ، قور ارقىلى الادى. قايىرىمدىلىقتى جەلەۋ ەتكەن جالعان قورلاردى جاباتىن ۋاقىت كەلدى"، — دەدى ول.
ايگۇل ورىنبەك بۇعان دەيىن دە باس پروكۋراتۋرادان "ايدىڭ نۇرى" قورىن تولىق تەكسەرۋدى تالاپ ەتكەن. ول اينۇر تۇرسىنبايەۆا مەن قىلمىس الەمىنىڭ وكىلى سانالاتىن "ديكيي ارمان" اراسىنداعى بايلانىسقا نازار اۋدارۋدى سۇرادى. ايتۋىنشا، كەيىنگى جىلدارى ءبىرقاتار تانىمال تۇلعا ارمان جۇماگەلدييەۆپەن جاقىن ارالاسىپ، ونى "باتىر" ەتىپ كورسەتەتىندەر كوبەيگەن.
"ەلدىڭ الدىندا جۇرگەن ءبىراز جۇلدىز تۇركياعا اعىلىپ، ءتىپتى ونىڭ سايلاپ العان سيمۆولى - “قاسقىر بەلگىسىن” (ءتۇرلى كەرەعار ماعىنالاس) ساۋساقپەن كورسەتىپ، الگى ارمانمەن جەكە سۋرەتكە ءتۇستى. ءتۇسىپ قانا قويعان جوق، ونى الەۋمەتتىك جەلىدە اسپەتتەپ “باتىر” كورسەتە باستادى. بۇرىن سوڭدى قالىڭ ەلگە تەك “قىلمىسىمەن” تانىلعان ول، وسىلايشا سوڭعى ءۇش جىلدا حالىققا دارى-دارمەك، تاماق تاراتاتىن قايىرىمدى جان، سپورتسمەندەرگە 2000 دوللارلاپ سىي بەرەتىن “سۋپەرمەن گەروي” بولىپ شىعا كەلدى!
راسىندا…بۇل “ەرلىكتىڭ” ارتىندا ءبىر شيكىلىك بارىن، ءبىر “ءداۋدىڭ” تۇرعانىن ءبىز سياقتى جاندار تۇسىنگەنمەن، قاراپايىم حالىق تۇسىنە بەرمەدى! ءيا، ەلدىڭ الدىندا جۇرگەن “پودپيسچيگى” كوپ تانىمال تۇلعالاردى شاقىرىپ، ولارعا ات شاپان جاۋىپ ۇلدە مەن بۇلدەگە وراۋ، قالتاسىنا كونۆەرت سالىپ وزىمەن سۋرەتكە ءتۇسىپ، اتويلاپ جارنامالاتۋ - بۇل سالافيتتەردىڭ ءادىسى ەكەنىن ءبىرى بىلسە، ءبىرى بەلە بەرمەيدى عوي.
بۇنىڭ ءبارى ارنايى دايىندالعان جوبا! بۇل - ەلدىڭ الدىندا جۇرگەن تانىمال ادامدار ارقىلى حالىقتىڭ ساناسىن ۋلاپ، وزدەرىن قايىرىمدى دا جاناشىر كورسەتۋ ارقىلى بيلىككە جەتۋدىڭ تىڭ ءتاسىلى! ءيا، بيلىككە جەتۋدىڭ توتە ءارى قيتۇرقى وڭاي جولى!
ايتپەسە، بۇرىن سوڭدى حالىق ءۇشىن تىرناعىنىڭ ۇشىن قيمىلداتپاعان ادام، قالايشا ميلليونداعان قارجىعا جۇرتقا جاقسىلىق جاساي قالدى؟ باتپان قۇيرىققا قايدان عانا باتا قالدى؟
وسىنىڭ بارىنە كۇدىكپەن قاراي وتىرىپ، ءقازىر دە حالىقتان اقشا جيناپ وتىرعان اينۇر تۇرسىنبايەۆانىڭ قورىن باس پروكۋراتۋرا، ۇلتتىق قاۋىپسىزدىك كوميتەتتەتىنەن تەكسەرۋدى سۇرايمىن! قاتاڭ تەكسەرۋدى سۇرايمىن!
حالىقتان جينالعان اقشا - حالىقتىڭ الدىندا تيىنىنا دەيىن ەسەبى بەرىلۋى كەرەك! افريكاعا سۋ قۇدىعىن كىرگىزىپ جۇرگەن قورىمىز، ەلىمىزگە “ديكيي ارمان” ارقىلى قارۋلى لاڭكەستەردى كىرگىزبەگەنىنە كەپىلدىك بار ما؟
ارينە جوق! سول سەبەپتى، بۇل قور شۇعىل تۇردە ءارى ءجىتى تەكسەرىلۋى كەرەك!»، - دەدى ول.
سونىمەن قاتار زاڭگەر قور ارقىلى ساتىپ الىنعان مەديسينالىق قۇرالدار، مىسالى، وتتەگى اپپاراتتارىنىڭ قايدا كەتكەنى جانە قاي اۋرۋحانالارعا بەرىلگەنى تۋرالى دا ەسەپ بەرىلمەگەنىن ايتتى.
"اۋا جەتپەي جاتقان حالىققا “دەم بەرەمىن” دەگەن اينۇردىڭ وزىنە بيلىكتەن ءۇمىت ءۇزىپ وتىرعان حالىق بولىپ، اپپاراتتارعا اقشا اۋداردىق. راس قوي؟! سول اپپاراتتار ەلگە كەلدى مە، كەلسە قاي اۋرۋحانالارعا جىبەرىلدى سونىڭ دا ەسەبى بەرىلگەن جوق!
ەلدەن جاسىراتىن ەشتەڭەسى جوق بولسا، ىستەگەن ءاربىر امالى تازا بولسا، اينۇر حانىم حالىقتان تۇسكەن ءاربىر تيىنعا - ءوزى ەسەپ بەرسە دە بولادى! وسى ۋاقىتقا دەيىن قورعا قانشا قاراجات ءتۇستى، سول قاراجاتتار قانداي باعىتتارعا جۇمسالدى….ءبارى-بارىنىڭ جاۋابىن حالىق بولىپ كۇتەمىز!"،- دەپ جازعان ەدى زاڭگەر.
