Belgili zańger ári qoǵam belsendisi Aigúl Orynbek aitysker, koých Ainur Tursynbaevanyń "Aidyń Nury" qaiyrymdylyq qoryna qatysty tergeý júrgizýdi talap etti. Bul týraly ol óziniń Facebook paraqshasynda jazdy, dep habarlaidy Dalanews.kz.
"Aidyń Nuryn qory dál Perizattyń qory siiaqty muqiiat tekserilýi kerek dep talap etemin! Qandy Qańtar oqiǵasynyń aldynda halyqtan aiamai aqsha jinaldy. Keiin meniń teksersin degen suranysymnan soń qor jabyla saldy. Bul — úlken kúdik týdyrady", - dedi ol.
Zańger elimizde esh baqylaýsyz jumys isteitin qorlardyń kóbeiip ketkenine alańdady. Onyń pikirinshe, keibir sheneýnikter men ákimder kásipkerlerden zańsyz aqsha jinaýdy dál osyndai qorlar arqyly júzege asyrady.
"Iaǵni, parany ainalyp ótip, qor arqyly alady. Qaiyrymdylyqty jeleý etken jalǵan qorlardy jabatyn ýaqyt keldi", — dedi ol.
Aigúl Orynbek buǵan deiin de Bas prokýratýradan "Aidyń Nury" qoryn tolyq tekserýdi talap etken. Ol Ainur Tursynbaeva men qylmys áleminiń ókili sanalatyn "Dikii Arman" arasyndaǵy bailanysqa nazar aýdarýdy surady. Aitýynsha, keiingi jyldary birqatar tanymal tulǵa Arman Jumageldievpen jaqyn aralasyp, ony "batyr" etip kórsetetinder kóbeigen.
"Eldiń aldynda júrgen biraz juldyz Túrkiiaǵa aǵylyp, tipti onyń sailap alǵan simvoly - “qasqyr belgisin” (túrli kereǵar maǵynalas) saýsaqpen kórsetip, álgi Armanmen jeke sýretke tústi. Túsip qana qoiǵan joq, ony áleýmettik jelide áspettep “batyr” kórsete bastady. Buryn sońdy qalyń elge tek “qylmysymen” tanylǵan ol, osylaisha sońǵy úsh jylda halyqqa dári-dármek, tamaq taratatyn qaiyrymdy jan, sportsmenderge 2000 dollarlap syi beretin “sýpermen geroi” bolyp shyǵa keldi!
Rasynda…Bul “ERLIKTIŃ” artynda bir shikilik baryn, bir “dáýdiń” turǵanyn BIZ siiaqty jandar túsingenmen, qarapaiym halyq túsine bermedi! Iá, Eldiń aldynda júrgen “podpischigi” kóp tanymal tulǵalardy shaqyryp, olarǵa at shapan jaýyp úlde men búldege oraý, qaltasyna konvert salyp ózimen sýretke túsip, atoilap jarnamalatý - bul sáláfitterdiń ádisi ekenin biri bilse, biri bele bermeidi ǵoi.
Bunyń bári arnaiy daiyndalǵan JOBA! Bul - Eldiń aldynda júrgen tanymal adamdar arqyly halyqtyń sanasyn ýlap, ózderin qaiyrymdy da janashyr kórsetý arqyly bilikke jetýdiń tyń tásili! Iá, bilikke jetýdiń tóte ári qiturqy ońai joly!
Áitpese, buryn sońdy halyq úshin tyrnaǵynyń ushyn qimyldatpaǵan adam, qalaisha milliondaǵan qarjyǵa jurtqa jaqsylyq jasai qaldy? Batpan quiryqqa qaidan ǵana bata qaldy?
Osynyń bárine kúdikpen qarai otyryp, qazir de halyqtan aqsha jinap otyrǵan Ainur Tursynbaevanyń qoryn Bas Prokýratýra, Ulttyq Qaýipsizdik Komitettetinen tekserýdi suraimyn! Qatań tekserýdi suraimyn!
Halyqtan jinalǵan aqsha - halyqtyń aldynda tiynyna deiin esebi berilýi kerek! Afrikaǵa sý qudyǵyn kirgizip júrgen qorymyz, elimizge “Dikii Arman” arqyly qarýly lańkesterdi kirgizbegenine kepildik bar ma?
Árine joq! Sol sebepti, bul qor shuǵyl túrde ári jiti tekserilýi kerek!», - dedi ol.
Sonymen qatar zańger qor arqyly satyp alynǵan meditsinalyq quraldar, mysaly, ottegi apparattarynyń qaida ketkeni jáne qai aýrýhanalarǵa berilgeni týraly da esep berilmegenin aitty.
"Aýa jetpei jatqan halyqqa “dem beremin” degen Ainurdyń ózine bilikten úmit úzip otyrǵan halyq bolyp, apparattarǵa aqsha aýdardyq. Ras qoi?! Sol apparattar elge keldi me, kelse qai aýrýhanalarǵa jiberildi sonyń da esebi berilgen joq!
Elden jasyratyn eshteńesi joq bolsa, istegen árbir amaly taza bolsa, Ainur hanym halyqtan túsken árbir tiynǵa - ózi esep berse de bolady! Osy ýaqytqa deiin qorǵa qansha qarajat tústi, sol qarajattar qandai baǵyttarǵa jumsaldy….bári-báriniń jaýabyn halyq bolyp kútemiz!",- dep jazǵan edi zańger.
