تۇركىستان وبلىسى اكىمى دارحان ساتىبالدىنىڭ توراعالىعىمەن وتكەن اپتالىق اپپارات وتىرىسىندا وسى تۇيتكىل تالقىلاندى. ءوڭىر باسشىسى تۇرمىستىق قالدىقتار تاستايتىن پوليگوندارى قاراۋسىز قالعان اۋدان، قالا باسشىلارىنا جۇمىستى شيراتۋدى تاپسىردى. تازالىقتى قامتاماسىز ەتە الماي وتىرعاندار وبلىس اكىمىنەن ەسكەرتۋ الدى.
– كۇل-قوقىستى تازالاي الماعان اكىمنىڭ باسقا تىرلىگى تۋرالى ايتۋدىڭ ءوزى ارتىق. تازالىق – تابالدىرىقتان باستالادى. اينالامىزدى تازا ۇستاۋ ءوزى قولىمىزدا. ماسەلەنى بيۋدجەتكە بۇرىپ قويىپ، وتىرۋ – اقىلعا قونىمسىز. بۇل تىرلىك – تىكەلەي ءوز مىندەتتەرىڭىز. تازالىقتى رەتكە كەلتىرە الماي وتىرعان اكىمدەرگە شارا قولدانىلسىن، – دەدى ول.
تۇركىستان وبلىسى تابيعي رەسۋرستار جانە تابيعات پايدالانۋدى رەتتەۋ باسقارماسىنىڭ باسشىسى ق.ابدۋالييەۆتىڭ ايتۋىنشا، وبلىس اۋماعىندا قاتتى تۇرمىستىق قالدىقتار تاستايتىن 158 پوليگون ورىندارى بەلگىلەنىپ، قۇجاتتاندىرىلعان. الايدا ولاردىڭ جارتىسىنان استامى سانيتارلىق تالاپتارعا سايكەس كەلمەيدى. اتاپ ايتقاندا، پوليگوندار قورشاۋمەن جابدىقتالماعان، كولىكتەردىڭ دوڭگەلەكتەرىن دەزينفەكسيالاۋشى بەتون ۆانناسى مەن ارنايى ەرىتىندىسى جوق، قالدىقتاردىڭ كولەمىن ولشەيتىن تارازى قويىلماعان جانە كوگالداندىرىلماعان.
– حالىق اراسىندا ءتۇسىندىرۋ جۇمىستارى ءوز دەڭگەيىندە بولماعاندىقتان اۋىل- ايماقتاردا كۇل-قوقىستاردى كەز كەلگەن جەرگە تاستاپ كەتۋ فاكتىلەرى جىل سايىن كوبەيىپ كەلەدى. وسى باعىتتا كەمشىلىكتى جويۋ ماقساتىندا جىل باسىندا جۇمىسشى توپ قۇرىلىپ، اۋدان، قالا اۋماقتارىن ارالاپ، بەي-بەرەكەت قوقىس ورىندارىن جويۋ بويىنشا ءتۇسىندىرۋ جۇمىستارى جۇرگىزىلگەن. وبلىس اۋماعىندا تۇرعىندار سانىنىڭ ارتۋىنا بايلانىستى، قاتتى تۇرمىستىق قالدىقتار كولەمى دە ارتىپ كەلەدى، – دەدى باسقارما باسشىسى.
وتكەن جىلى قوقىستاردى قايتا وڭدەۋ ۇلەسى بويىنشا مەجە تولىق ورىندالعان. بيىل دا جۇمىستار اتقارىلۋى قاجەت. پوليگوندار ماسەلەسىن تۇپكىلىكتى شەشۋ ماقساتىندا قازىعۇرتتا – ءتورت، سوزاقتا ءبىر پوليگوننىڭ قۇرىلىسى جەرگىلىكتى بيۋدجەت ەسەبىنەن جۇرگىزىلگەن. سوزاق، ورداباسى اۋداندارىندا 8 پوليگون سالۋ جوسپاردا بار. سونىمەن قاتار كەنتاۋ، ارىس قالاسى مەن قازىعۇرت، بايدىبەك، كەلەس جانە باسقا اۋدانداردا 37 پوليگوننىڭ جوبالىق-سمەتالىق قۇجاتىن ازىرلەۋگە جۇمىستار اتقارىلۋدا.
وبلىس اكىمى دارحان ساتىبالدى پوليگونداردىڭ ساپاسىن ارتتىرىپ، ەرەجەگە سايكەس كوگالداندىرۋ جۇمىستارىن جۇرگىزۋ، جان-جاعىن قورشاۋ جول توسەۋ جۇمىستارىن اتقارۋ جونىندە تاپسىرما بەردى.
