Túrkistan oblysy ákimi Darhan Satybaldynyń tóraǵalyǵymen ótken aptalyq apparat otyrysynda osy túıtkil talqylandy. Óńir basshysy turmystyq qaldyqtar tastaıtyn polıgondary qaraýsyz qalǵan aýdan, qala basshylaryna jumysty shıratýdy tapsyrdy. Tazalyqty qamtamasyz ete almaı otyrǵandar oblys ákiminen eskertý aldy.
– Kúl-qoqysty tazalaı almaǵan ákimniń basqa tirligi týraly aıtýdyń ózi artyq. Tazalyq – tabaldyryqtan bastalady. Aınalamyzdy taza ustaý ózi qolymyzda. Máseleni búdjetke buryp qoıyp, otyrý – aqylǵa qonymsyz. Bul tirlik – tikeleı óz mindetterińiz. Tazalyqty retke keltire almaı otyrǵan ákimderge shara qoldanylsyn, – dedi ol.
Túrkistan oblysy tabıǵı resýrstar jáne tabıǵat paıdalanýdy retteý basqarmasynyń basshysy Q.Ábdýalıevtiń aıtýynsha, oblys aýmaǵynda qatty turmystyq qaldyqtar tastaıtyn 158 polıgon oryndary belgilenip, qujattandyrylǵan. Alaıda olardyń jartysynan astamy sanıtarlyq talaptarǵa sáıkes kelmeıdi. Atap aıtqanda, polıgondar qorshaýmen jabdyqtalmaǵan, kólikterdiń dóńgelekterin dezınfeksıalaýshy beton vanasy men arnaıy eritindisi joq, qaldyqtardyń kólemin ólsheıtin tarazy qoıylmaǵan jáne kógaldandyrylmaǵan.
– Halyq arasynda túsindirý jumystary óz deńgeıinde bolmaǵandyqtan aýyl- aımaqtarda kúl-qoqystardy kez kelgen jerge tastap ketý faktileri jyl saıyn kóbeıip keledi. Osy baǵytta kemshilikti joıý maqsatynda jyl basynda jumysshy top qurylyp, aýdan, qala aýmaqtaryn aralap, beı-bereket qoqys oryndaryn joıý boıynsha túsindirý jumystary júrgizilgen. Oblys aýmaǵynda turǵyndar sanynyń artýyna baılanysty, qatty turmystyq qaldyqtar kólemi de artyp keledi, – dedi basqarma basshysy.
Ótken jyly qoqystardy qaıta óńdeý úlesi boıynsha meje tolyq oryndalǵan. Bıyl da jumystar atqarylýy qajet. Polıgondar máselesin túpkilikti sheshý maqsatynda Qazyǵurtta – tórt, Sozaqta bir polıgonnyń qurylysy jergilikti búdjet esebinen júrgizilgen. Sozaq, Ordabasy aýdandarynda 8 polıgon salý josparda bar. Sonymen qatar Kentaý, Arys qalasy men Qazyǵurt, Báıdibek, Keles jáne basqa aýdandarda 37 polıgonnyń jobalyq-smetalyq qujatyn ázirleýge jumystar atqarylýda.
Oblys ákimi Darhan Satybaldy polıgondardyń sapasyn arttyryp, erejege sáıkes kógaldandyrý jumystaryn júrgizý, jan-jaǵyn qorshaý jol tóseý jumystaryn atqarý jóninde tapsyrma berdi.
