– اپتا باسىندا مەملەكەت باسشىسى قاسىم-جومارت توقايەۆ ەلىمىزدىڭ الەۋمەتتىك-ەكونوميكالىق دامۋ ماسەلەلەرى جونىندە كەڭەيتىلگەن كەڭەس وتكىزدى. سول جيىندا باسشىلارعا، مەملەكەتتىك قىزمەتشىلەرگە ناقتى مىندەتتەر جۇكتەدى.
كۇندەلىكتى ماسەلەلەردى شۇعىل شەشۋمەن عانا شەكتەلەي، مەملەكەتشىل-رەفورماتور بولۋدى، ايماقتاردى جان-جاقتى دامىتۋدى تاپسىردى. اگروونەركاسىپ كەشەنىن دامىتۋ، وتاندىق ءوندىرىستى ۇلعايتۋ، ازاماتتاردىڭ ناقتى تابىسىن ارتتىرۋ، بايىپتى ماكروەكونوميكالىق ساياسات جۇرگىزۋ، ينفراقۇرىلىمدى ودان ءارى دامىتۋ، ءوندىرىس ورىندارىن اشۋ كەرەكتىگىن ايتتى. وبلىسىمىزدا وسى باعىتتار بويىنشا جۇمىستى جانداندىرۋىمىز كەرەك، – دەگەن دارحان ساتىبالدى سارىاعاش اۋدانىنىڭ ەرەكشەلىگىنە توقتالدى.
– سارىاعاش – ءتۋريزمدى دامىتۋعا وتە قولايلى ايماق. مۇنداعى شيپاجايلار، مينەرالدى سۋ بۇكىل قازاقستانعا ايگىلى. سوندىقتان جاۋاپتى باسقارمالارمەن بىرلەسىپ، ءتۋريزمدى دامىتۋ ءۇشىن قولايلى جاعداي جاساۋ قاجەت. جاڭا جۇمىس ورىندارىن اشۋ – اۋدان اكىمى جۇمىسىنىڭ باستى كورسەتكىشتەرىنىڭ ءبىرى.
جاستاردى جۇمىسپەن قامتۋعا باعىتتالعان باعدارلامالار بار. اۋدان اكىمدىگى بۇل مۇمكىندىكتەردى تولىق پايدالانا الماعان. وسى باعىتتا جۇمىستى كۇشەيتۋ كەرەك.
«جۇمىس ىستەپ جاتىرمىز» دەگەن سىرعىتپا ەسەپ پەن كوزبوياۋشىلىق ەمەس، ناقتى ءىس كەرەك.
سارىاعاش – كورشى مەملەكەتپەن شەكارالاس اۋدان. ساۋدا-ساتتىقتى، ونەركاسىپتى دامىتۋعا مۇمكىندىكتەر مول. ءبىراق تاماق ونىمدەرىن ءوندىرۋ، تۋريزم سالاسىنا تارتىلعان ينۆەستيسيالاردىڭ كولەمى بويىنشا جوسپارلار بىلتىر ورىندالماعان.
ەلدى-مەكەندەردىڭ اينالاسى كۇل-قوقىسقا تولا. تازالىق بويىنشا جۇمىس كۇشەيتىلسىن. تازالىق بولعان جەردە – تالاپ بولادى. ارمان ايدار ۇلى، ءسىز بۇل قىزمەتكە جاقىندا كىرىستىڭىز. اۋداندى دامىتۋ جوسپارىن نازاردا ۇستاپ، ينۆەستيسيا تارتۋ، ونەركاسىپ كولەمى بويىنشا وسى جىلعا بەكىتىلگەن جوسپارلارعا قول جەتكىزۋ ءۇشىن ءتيىستى باسقارمالارمەن بىرلەسە قاجەتتى شارالاردى قابىلداڭىز، – دەدى وبلىس اكىمى.
كوشپەلى ماجىلىستە اۋدان اكىمى ارمان ابدۋللايەۆ 2022 جىلى قول جەتكەن جەتىستىكتەر مەن الداعى جوسپارلار بويىنشا باياندادى.
تۇركىستان وبلىسى اكىمى اپپاراتىنىڭ باسشىسى ەركەعالي ءالىمقۇلوۆ اۋداندى دامىتۋ بارىسىنداعى كەمشىلىكتەر مەن ماسەلەلەرگە توقتالدى. زەردەلەۋ جۇمىستارى كورسەتكەندەي، تاماق ونىمدەرىن وندىرۋگە تارتىلعان ينۆەستيسيا 72،5 پايىزعا، تۋريزم سالاسىنا تارتىلعان ينۆەستيسيا 71،1 پايىزعا عانا ورىندالدى.
ەگىن شارۋاشىلىعىنىڭ ناقتى كولەمى يندەكسى 14،6 پايىزعا كەمىگەن. ءىرى قارا مال، قوي باسىندا ءوسىم بايقالماعان. وسىعان بايلانىستى ءوڭىر باسشىسى تاراپىنان سارىاعاش اۋدانى اكىمدىگىنە «اۋىل اماناتى» باعدارلاماسىن تالاپقا ساي جۇزەگە اسىرۋ، جىلىجايلار شارۋاشىلىعىن دامىتۋ، اگروونەركاسىپ كەشەنىندە جۇمىستى شيراتۋ تاپسىرىلدى.
وبلىس اكىمى اۋداندارداعى ىشكى جولداردى ستاندارتتاۋدى، ءبىرىڭعاي تالاپقا ساي سالۋدى جۇكتەدى. ساپاسىن ارتتىرۋدى مىندەتتەدى. بيۋدجەتتىڭ جەرگىلىكتى كىرىستەرىن، تۇسىمدەرىن ارتتىرۋ جونىندە دە ناقتى تاپسىرما بەرىلدى. سارىاعاش اۋدانىندا 1125 سالىق سالۋ نىسانى مۇلىكتەرىن 5 ملرد. 824 ملن. تەڭگەگە باعالاعان. ءبىراق اتالعان نىسانداردىڭ نارىقتىق باعالاۋ قۇنى 85 ملرد. تەڭگەنى قۇراپ وتىر، ياعني 17 ەسە جوعارى. بۇل – سالىقتىڭ تومەندەۋىنە اكەلىپ سوعۋدا.
دەنساۋلىق ساقتاۋ جانە ءبىلىم سالاسىنىڭ دەڭگەيىن كوتەرۋ، اۋداننىڭ ينفراقۇرىلىمىن جەتىلدىرۋ، جولداردى جوندەۋ، كوگالداندىرۋ جۇمىستارىن كۇشەيتۋ، جەر داۋلارىن شەشۋ جانە وزگە دە ماسەلەلەر بويىنشا ۇسىنىستار ايتىلىپ، مىندەتتەر جۇكتەلدى.
