– Apta basynda Memleket basshysy Qasym-Jomart Toqaev elimizdiń áleýmettik-ekonomikalyq damý máseleleri jóninde keńeitilgen keńes ótkizdi. Sol jiynda basshylarǵa, memlekettik qyzmetshilerge naqty mindetter júktedi.
Kúndelikti máselelerdi shuǵyl sheshýmen ǵana shektelei, memleketshil-reformator bolýdy, aimaqtardy jan-jaqty damytýdy tapsyrdy. Agroónerkásip keshenin damytý, otandyq óndiristi ulǵaitý, azamattardyń naqty tabysyn arttyrý, baiypty makroekonomikalyq saiasat júrgizý, infraqurylymdy odan ári damytý, óndiris oryndaryn ashý kerektigin aitty. Oblysymyzda osy baǵyttar boiynsha jumysty jandandyrýymyz kerek, – degen Darhan Satybaldy Saryaǵash aýdanynyń ereksheligine toqtaldy.
– Saryaǵash – týrizmdi damytýǵa óte qolaily aimaq. Mundaǵy shipajailar, mineraldy sý búkil Qazaqstanǵa áigili. Sondyqtan jaýapty basqarmalarmen birlesip, týrizmdi damytý úshin qolaily jaǵdai jasaý qajet. Jańa jumys oryndaryn ashý – aýdan ákimi jumysynyń basty kórsetkishteriniń biri.
Jastardy jumyspen qamtýǵa baǵyttalǵan baǵdarlamalar bar. Aýdan ákimdigi bul múmkindikterdi tolyq paidalana almaǵan. Osy baǵytta jumysty kúsheitý kerek.
«Jumys istep jatyrmyz» degen syrǵytpa esep pen kózboiaýshylyq emes, naqty is kerek.
Saryaǵash – kórshi memleketpen shekaralas aýdan. Saýda-sattyqty, ónerkásipti damytýǵa múmkindikter mol. Biraq tamaq ónimderin óndirý, týrizm salasyna tartylǵan investitsiialardyń kólemi boiynsha josparlar byltyr oryndalmaǵan.
Eldi-mekenderdiń ainalasy kúl-qoqysqa tola. Tazalyq boiynsha jumys kúsheitilsin. Tazalyq bolǵan jerde – talap bolady. Arman Aidaruly, siz bul qyzmetke jaqynda kiristińiz. Aýdandy damytý josparyn nazarda ustap, investitsiia tartý, ónerkásip kólemi boiynsha osy jylǵa bekitilgen josparlarǵa qol jetkizý úshin tiisti basqarmalarmen birlese qajetti sharalardy qabyldańyz, – dedi oblys ákimi.
Kóshpeli májiliste aýdan ákimi Arman Abdýllaev 2022 jyly qol jetken jetistikter men aldaǵy josparlar boiynsha baiandady.
Túrkistan oblysy ákimi apparatynyń basshysy Erkeǵali Álimqulov aýdandy damytý barysyndaǵy kemshilikter men máselelerge toqtaldy. Zerdeleý jumystary kórsetkendei, tamaq ónimderin óndirýge tartylǵan investitsiia 72,5 paiyzǵa, týrizm salasyna tartylǵan investitsiia 71,1 paiyzǵa ǵana oryndaldy.
Egin sharýashylyǵynyń naqty kólemi indeksi 14,6 paiyzǵa kemigen. Iri qara mal, qoi basynda ósim baiqalmaǵan. Osyǵan bailanysty óńir basshysy tarapynan Saryaǵash aýdany ákimdigine «Aýyl amanaty» baǵdarlamasyn talapqa sai júzege asyrý, jylyjailar sharýashylyǵyn damytý, agroónerkásip kesheninde jumysty shiratý tapsyryldy.
Oblys ákimi aýdandardaǵy ishki joldardy standarttaýdy, biryńǵai talapqa sai salýdy júktedi. Sapasyn arttyrýdy mindettedi. Biýdjettiń jergilikti kiristerin, túsimderin arttyrý jóninde de naqty tapsyrma berildi. Saryaǵash aýdanynda 1125 salyq salý nysany múlikterin 5 mlrd. 824 mln. teńgege baǵalaǵan. Biraq atalǵan nysandardyń naryqtyq baǵalaý quny 85 mlrd. teńgeni qurap otyr, iaǵni 17 ese joǵary. Bul – salyqtyń tómendeýine ákelip soǵýda.
Densaýlyq saqtaý jáne bilim salasynyń deńgeiin kóterý, aýdannyń infraqurylymyn jetildirý, joldardy jóndeý, kógaldandyrý jumystaryn kúsheitý, jer daýlaryn sheshý jáne ózge de máseleler boiynsha usynystar aitylyp, mindetter júkteldi.
