1 تامىزداعى جاعداي بويىنشا، COVID-19 زەرتحانالىق راستالعان جاعدايلاردىڭ سانى - 1226، سوڭعى ءبىر تاۋلىكتە كوروناۆيرۋستان 36 ادام قايتىس بولدى.
انىقتالماعان ەتيولوگياسى بار، ءبىراق كوروناۆيرۋستىق ينفەكسيانىڭ كلينيكالىق جانە ەپيدەميولوگيالىق بەلگىلەرى تابىلعان پنيەۆمونيامەن اۋىرعاندار سانى – 5181. وتكەن تاۋلىكتە پنيەۆمونيا دياگنوزىمەن 30 ءولىم جاعدايى تىركەلدى.
مينيسترلىك كوروناۆيرۋستىق پنيەۆمونيامەن اۋىرعانداردىڭ شىلدەدەگى مالىمەتىن ءالى كۇنگە جاريالاعان جوق.
ال كوروناۆيرۋس جۇقتىرعان ازاماتتاردىڭ سانى ەل كولەمىندە 91 593-كە جەتتى. بۇل كورسەتكىش بويىنشا قازاقستان قىتايدان اسىپ ءتۇستى. قىتايدا كوروناۆيرۋس ينفەكسياسى بۇگىنگە دەيىن - 84 337 ادامنان انىقتالدى.
ايتا كەتەلىك قازاقستانداعى حالىق سانى 18 ملن-دى قۇرايدى، ال قىتايدا 1،5 ملرد-قا تاقاۋ ادام تۇرادى.
ماۋسىم ايىندا قازاقستاندا پنيەۆمونياعا شالدىققانداردىڭ سانى كۇرت ءوسىپ، ءبىر ايدا - 628 ادام كوز جۇمدى. ولاردىڭ كوروناۆيرۋس سىناماسى تەرىس ناتيجە كورسەتكەنمەن، بەلگىلەرى ءقاۋىپتى ىندەتكە ۇقساس بولاتىن.
پرەزيدەنت توقايەۆ كوروناۆيرۋس جۇقتىرعاندار مەن ىندەتتەن قايتىس بولعانداردىڭ رەسمي ستاتيستيكاسىنا كۇمان كەلتىرىپ، پاندەميا بويىنشا كورسەتكىشتى بۇرمالاماۋدى بۇيىرعان ەدى.
