كوكشەتاۋدا پوليسەيلەر 15 كەلىدەن اسا ەسىرتكىنى جويدى، - دەپ حابارلايدى Dalanews.kz.
ەسىرتكى زاتتارى 25 قىلمىستىق ءىس بويىنشا تاركىلەنگەن. 28 قازاندا پوليسيا قىزمەتكەرلەرى، سوت، پروكۋراتۋرا جانە ادىلەت وكىلدەرىنەن ارنايى قۇرىلعان كوميسسيا وسى جىلى قىلمىستىق ىستەردىڭ قاتىسۋشىسىنان تابىلعان جانە تاركىلەنگەن ەسىرتكىلەردى ورتەۋ بويىنشا ءىس-شارا وتكىزدى.
الدىن الا كوميسسيا مۇشەلەرى سوتتا قارالعان جانە زاتتاي دالەلدەمەلەردى جويۋ تۋرالى شەشىمدەر قابىلدانعان قىلمىستىق ىستەر بويىنشا سالىستىرىپ تەكسەرۋ جۇرگىزدى.
بۇل ەسىرتكى مەن پسيحوبەلسەندى زاتتاردىڭ ءوزى دە، ولاردى قولدانۋعا ارنالعان قۇرىلعىلار دا، ەسىرتكىنى ساقتاۋعا ارنالعان ءارتۇرلى كونتەينەرلەر مەن وراۋىش ماتەريالدار. 15 كەلى جويىلعان زاتتىڭ 3،5 كەلىسىنەن استامى “سينتەتيكا” بولىپ شىقتى.
ۇسىنىلعان جويۋ اكتىسىنەن وبلىس ورتالىعىنىڭ اۋماعىندا ەسىرتكى تاراتۋمەن اينالىسقان جانە ەسىرتكىگە قارسى پوليسەيلەرىنىڭ ۇستاۋ بارىسىندا 1،8 كەلىدەن استامى “مەفەدرون” پسيحوتروپتىق زاتى تاركىلەنگەن كورشى وبلىستىڭ تۇرعىنىنا قاتىستى قىلمىستىق ءىس بويىنشا ۇكىم بار.
جويىلاتىن ەسىرتكىلەردى ءتارتىپ ساقشىلارى كۇندەلىكتى قىزمەت بارىسىندا، ونىڭ ىشىندە جەدەل-ىزدەستىرۋ ءىس-شارالارىن جۇرگىزۋ، ءتىنتۋ جۇرگىزۋ كەزىندە، ازاماتتار مەن اۆتوكولىك قۇرالدارىن جەكە تەكسەرۋ كەزىندە تاركىلەدى.
