گۇلنار كاريموۆانىڭ ۇلى، كىشى يسلام كاريموۆ اتاسى قازا بولعاننان كەيىن ءۇش ايدان سوڭ بريتاندىق BBC كانالىنىڭ وزبەك قىزمەتىنە ۆيدەو-سۇحبات بەردى. ول اناسىنىڭ تاشكەنتتە ءياحو گۋلياموۆا كوشەسىندەگى ءوزىنىڭ ۇيىندە ءۇيقاماقتا وتىرعانىن، ۇلتتىق قاۋىپسىزدىك كومييتەتىنىڭ باقىلاۋىندا ەكەنىن ايتادى.
وزبەكستاننىڭ ەكس-پرەزيدەنتىنىڭ نەمەرەسى اناسى گۇلنار كاريموۆانىڭ شەتەلدە ەكەنى نەمەسە تاشكەنتتە بوستاندىقتا ەكەن دەگەن اڭگىمەلەر شىندىققا ساي كەلمەيتىنىن ايتقان.
«مەنىڭ انامدى ۇستاپ وتىرعاندار اتامنىڭ «قولشوقپارلارى». ولار انامنىڭ بوستاندىقتا بولعانىن قالامايدى. ويتكەنى ولار وتە كوپ سۇراققا جاۋاپ بەرۋلەرىنە تۋرا كەلەدى، ءبىراق ەندى ول سۇراقتارعا ەشكىم ءدال جاۋاپ بەرە المايدى»، — دەيدى ول.
لوندوندا تۇرىپ جاتقان كاريموۆتىڭ نەمەرەسى اناسى مەن ونىڭ ءسىڭلىسى لولا اراسىنداعى باسكەلەستىكتى دە ايتقان. وسى ءۇشىن ول اتاسىن كىنالايدى.
«باستاپقىدا مەنىڭ انام مەن تاتەم اراسىندا جاقسى قارىم-قاتىناس بولدى. ودان كەيىن بولعان جاعدايعا اتامنىڭ كىناسى بار. مەنىڭ انام ماتەماتيكا مەكتەبىن التىن مەدالمەن ءبىتىرىپ، اتامنىڭ ءىزىن باستى. ول سپورتپەن شۇعىلداندى. تىپتەن شىعىس جەكپە-جەگى بويىنشا قارا بەلبەۋى بار. انام نەمەن اينالىسسا، تاتەم اپكەسىن قايتالادى. اتام لولاعا ۇنەمى اپكەڭە نەگە ۇقسامايسىڭ دەپ ايتۋمەن بولدى. قانشا تىرىسسا دا لولا انام سياقتى بولا المادى. بۇل ءبىزدىڭ وتباسىمىزعا ۇلكەن زيانىن تيگىزدى»، — دەيدى كىشى يسلام كاريموۆ.
