"كىنالىلەر جازاسىز قالاتىنىنا سەنىمدى": سەرىكزات دۇيسەنعازى ۇلىنىڭ ولىمىنە قاتىستى تەرگەۋ دەرەكتەرىن جاريالادى

قاراكوز امانتاي 22 اقپ. 2024 12:51 4018

اقىن سەرىكزات دۇيسەنعازى ۇلى ءاليحاننىڭ قازاسىنا بايلانىستى تەرگەۋ اياقتالعانىن مالىمدەدى. بۇل تۋرالى ول Instagram پاراقشاسىندا جازبا قالدىردى، دەپ حابارلايدى Dalanews.kz.

2023 جىلدىڭ 2 قاڭتارىندا بولعان ءاليحاننىڭ قازاسىنا بايلانىستى ۇزاققا سوزىلعان تەرگەۋ جۇمىسىن اقمولا وبلىستىق ىشكى ىستەر باسقارماسىنىڭ تەرگەۋشىلەرى 2023 جىلدىڭ قازان ايىندا اياقتاعان.

"ءقازىر بۇل ءىس بويىنشا سوت پروسەسى ءجۇرىپ جاتىر. پسيحولوگيالىق تۇرعىدان اۋىر بولسا دا مەن بۇل ىسكە جابىرلەنۋشى رەتىندە قاتىسۋدامىن. قاڭتار ايىنىڭ 22 كۇنى باستالعان سوتتىڭ تەرگەپ-تەكسەرۋ ساتىسىندا كىنالى تاراپ وزدەرىنىڭ جازاسىز قالاتىندارىنا سەنىمدىلىگىن بايقاتۋدا. ەكى ادۆوكات جالداپ، وزدەرىنىڭ ەش كىناسىز ەكەنىن دالەلدەگىسى كەلەتىن تاراپتىڭ سوت پروسەسى كەزىندە بەرگەن وسپادار جاۋاپتارى مەنى تولعاندىرىپ وتىر. سوت بۇل قىلمىستىق ءىس بويىنشا ءوز شەشىمىن شىعارا جاتار. ءبىراق مەن جابىرلەنۋشى رەتىندە قوعامنىڭ نازارىن اۋداراتىن ءبىرقاتار جايتتاردى سىزدەرمەن بولىسكىم كەلەدى"، – دەپ جازدى اقىن.

كوپشىلىككە تاۋ شاڭعىسى كۋرورتىنىڭ قىزمەتتەرىن ۇسىناتىن "Elikti Park" جشس-نىڭ قازىرگى باسشىسى س. دەگەن ازامات (كوكشەتاۋلىقتاردىڭ ايتۋىنشا جانە اشىق ينتەرنەت جەلىسىندەگى اقپاراتتار بويىنشا "Elikti Park" جشس-نىڭ 2020 جىلدان بەرگى يەسى جانە باسشىسى وسى ادام دەپ تۇر. ءبىراق "Elikti Park" ج ش س قۇجاتتارى بويىنشا باسقا ادام كۇدىكتى سانالىپ وتىر. س.-نى كۇدىكتى رەتىندە تارتۋ تۋرالى تالابىمىزدى سوت قاناعاتتاندىرعان جوق) سوتقا كۋاگەر رەتىندە شاقىرىلعان.  وسى س. دەگەن ازامات ءدال ءقازىر ءوزى باسقاراتىن "Elikti Park" جشس-نىڭ قاۋىپسىزدىك ەرەجەلەرىنىڭ تالاپتارىنا ساي كەلمەيتىنىن مويىنداماي، ەلىمىزدەگى تاۋ شاڭعى بازالارىندا اپتا سايىن ادامداردىڭ ءارتۇرلى دەڭگەيدە جاراقات الاتىنىن مىسالعا كەلتىرىپ، ول قازاقستان رەسپۋبليكاسىنىڭ اۋماعىندا قالىپتى جاعداي ەكەندىگىن سوتتا بەرگەن جاۋابىندا ايتتى. جانە مۇنى كادىمگى نورما رەتىندە قابىلداۋ قاجەت دەپ سانايدى ەكەن. سوندا ق ر كونستيتۋسياسىندا جازىلعان ەلىمىزدىڭ باستى بايلىعى ادام دەگەن باپتى قايدا قويامىز؟ ادام ومىرىنە ءقاۋىپسىز، ادىلەتتى قازاقستان قۇرامىز دەگەن جوسپارىمىز قايدا؟"، – دەيدى ول.

سەرىكزات دۇيسەنعازىنىڭ ايتۋىنشا، دەمالىس ايماعىنداعى قاۋىپسىزدىك ءۇشىن اتالمىش مەكەمە جاۋاپ بەرمەيتىن بوپ شىققان.

"ونىڭ ايتۋىنشا، "Elikti Park" ج ش س تەك شاڭعى مەن شاڭعى تەبۋگە قاجەتتى قۇرالداردى عانا بەرەدى. قالعان قاۋىپسىزدىگىڭنىڭ بارلىعىنا ءوزى جاۋاپتىسىڭ. ەگەر قۇلاپ مەرتىگىپ قالساڭ العاشقى مەديسينالىق كومەك كورسەتۋ دە ولاردىڭ مىندەتىنە كىرمەيدى ەكەن شاڭعى ۇيرەتەتىن ينسترۋكتورلارىنىڭ دا، باسقا قىزمەتكەرلەرىنىڭ دە مۇنداي ءقاۋىپتى قىزمەتپەن اينالىسۋعا  ليسەنزيالارى مەن وقىعان ديپلومدارى جوق"، – دەپ جازدى ول.


ۇسىنىلعان
سوڭعى جاڭالىقتار
x