كەنتاۋداعى جاستار ورتالىعى مەملەكەتتٸك باعدارلامانى جٷزەگە اسىرۋعا ٷلەس قوسۋدا
جالپى, ورتالىقتا جاستارعا قىزمەت كٶرسەتۋ ٷشٸن بارلىق جاعداي جاسالعان. مەسەلەن, بەلگٸلٸ كەسٸپكەرلەردٸڭ قاتىسۋىمەن جاستاردى كەسٸپكەرلٸككە باۋلىپ, كەپٸلسٸز نەسيە بەرۋگە باعىتتالعان تٷرلٸ سەمينار-ترەنينگتەر ٶتٸپ تۇرادى.
سونىمەن قاتار جاستاردى سولتٷستٸككە قونىس اۋدارىپ, سوندا قالىپ جۇمىس ٸستەۋگە ناسيحاتتايتىن بوس جۇمىس ورىندارىنىڭ جەرمەڭكەسٸ ۇيىمداستىرىلادى.
قانات بەكمەتوۆ, كەنتاۋ قالالىق جاستار ورتالىعىنىڭ جەتەكشٸسٸ:
- بٷگٸنگٸ تاڭدا جاستارعا نە قاجەت? ول – جاستار اراسىندا قۇقىق بۇزۋشىلىق پەن قىلمىستىڭ الدىن الۋ ماقساتىندا بوس ۋاقىتىن قالاي ٶتكٸزەدٸ, سوعان جاستاردى بەيٸمدەۋ. ەكٸنشٸسٸ, بٸزدٸڭ مەملەكەتتٸك باعدارلامامىز بار, ياعني جاستار كٶبٸنە تۇرعىن ٷي, قولجەتٸمدٸ باسپانا, «ديپلوممەن اۋىلعا», «سەرپٸن» باعدارلاماسىنا قاتىستى كەڭەس بەرەمٸز. توعىزقۇمالاق ٷيٸرمەلەرٸ, ۇلتتىق قۇندىلىقتار, ۇلتتىق ويىندارىمىزدى قايتا جاڭعىرتۋ ماقساتىندا تٷرلٸ ٷيٸرمەلەر جۇمىس ٸستەيدٸ.
سونداي-اق الداعى 2019 جىل جاستار جىلى بولعاندىقتان, ولاردى جۇمىسپەن قامتىپ, ساپالى بٸلٸم الۋىنا باعىتتالعان كەشەندٸ جۇمىس جوسپارى بەكٸتٸلگەن.
قالا ەكٸمٸنٸڭ قولداۋىمەن سپورت الاڭدارى دا اشىلىپتى.
جالپى, تٷركٸستان وبلىسىندا بەس جٷز مىڭنان اسا جاس بار. بۇل وبلىس حالقىنىڭ 26 پايىزىن قۇرايدى. «سەرپٸن-2050» جوباسى اياسىندا 1 589 جاس سولتٷستٸك ٶڭٸرلەردە بٸلٸم الىپ جاتىر. ال بيىلعى جىلى «ديپلوممەن اۋىلعا» باعدارلاماسى شەڭبەرٸندە جۇمىسقا تۇرعان 863 جاس ماماننىڭ 314-ٸ باسپانالى بولعان.
