كەنتاۋداعى ونەركاسىپتىك ايماق تەرريتورياسى 2075 جىلعا دەيىن توتەنشە ەكولوگيالىق جاعداي ايماعى بولىپ تانىلدى. ءتيىستى بۇيرىققا 23 ساۋىردە ەكولوگيا جانە تابيعي رەسۋرستار ءمينيسترى ەرلان نىسانبايەۆ قول قويعان. توتەنشە ەكولوگيالىق جاعداي ايماعىنا كەنتاۋ قالاسىنىڭ سولتۇستىگىنە ىرگەلەس جاتقان 900 گەكتار وندىرىستىك ايماق كىرەدى، دەپ حابارلايدى Dalanews.kz.
ارنايى رەجيمنىڭ قولدانىس مەرزىمى 2075 جىلدىڭ 1 قاڭتارىنا دەيىن دەپ بەلگىلەندى.
مينيستر تۇركىستان وبلىسىنىڭ اكىمدىگىنە كەلىسىم بويىنشا مىناداي شارالاردى ەنگىزۋدى تاپسىردى:
- ارنايى كىرۋ جانە شىعۋ رەجيمىن ورناتۋ، كولىك قۇرالدارىنىڭ قوزعالىسىن شەكتەۋ؛
- قىزمەتى توتەنشە ەكولوگيالىق جاعدايدى جويۋعا نەمەسە حالىقتىڭ تىنىس-تىرشىلىگىن قامتاماسىز ەتۋگە بايلانىستى ەمەس جاڭا كاسىپورىندار مەن باسقا دا وبەكتىلەردى سالۋعا جانە جۇمىس ىستەپ تۇرعان نىسانداردى كەڭەيتۋگە تىيىم سالۋ؛
- تۇرعىنداردى ادامدار تۇرۋعا ءقاۋىپتى جەرلەردەن شىعارىپ، ولارعا تۇراقتى نەمەسە ۋاقىتشا تۇرۋعا ارنالعان ءۇي-جايلار بەرۋدى؛
- ساۋىقتىرۋ، كۋرورتتىق ماقساتتاعى وبەكتىلەردىڭ جۇمىسىنا تىيىم سالۋ.
سونداي-اق، قۇجاتتا ونەركاسىپتىك ايماق اۋماعىندا ەشكىم تۇرمايتىنى ناقتىلانادى.
كەنتاۋدىڭ ەكولوگيالىق اپات ايماعىنداعى قالا رەتىندە رەسمي تۇردە تانىلعانى 2024 جىلدىڭ سوڭىندا بەلگىلى بولدى. ول كەزدە تۇركىستان وبلىسىنىڭ اكىمى دارحان ساتىبالدى توتەنشە ەكولوگيالىق جاعداي ايماعىندا تۇراتىن تۇرعىنداردىڭ جالاقىسىنا 20% ۇستەمەاقى قوسىلاتىنىن ايتقان.
