تۇركىستاندا پوليسەيلەر 8،5 ميلليون تەڭگە شىعىن كەلتىرگەن ۇرلىقتىڭ بەتىن اشتى، دەپ حابارلايدى Dalanews.kz.
تۇركىستاندا پوليسەيلەر پاتەر ۇرلىعى دەرەگىن دەر كەزىندە انىقتاپ، قىلمىستىڭ بەتىن اشتى. پوليسيا باسقارماسىنا جەرگىلىكتى تۇرعىن ارىزدانا وتىرىپ، ءوز ۇيىنەن التىن بۇيىمدارى مەن قاراجاتىنىڭ ۇرلانىپ جاتقانىن حابارلاعان.
ارىز تۇسە سالىسىمەن تاجىريبەلى جەدەل ۋاكىلدەردەن ارنايى توپ قۇرىلىپ، بارلىق قاجەتتى ءىس-شارالار جەدەل تۇردە جۇزەگە اسىرىلدى. جۇرگىزىلگەن جەدەل-ىزدەستىرۋ جۇمىستارى بارىسىندا كۇدىكتى رەتىندە جابىرلەنۋشىنىڭ كەلىنى انىقتالدى. ول بيىل مامىر ايىنان بەرى ۇيدەن ءتۇرلى مولشەردەگى التىن اشەكەيلەر مەن قولما-قول اقشانى جاسىرىن تۇردە ۇرلاپ كەلگەن.
جابىرلەنۋشىگە كەلتىرىلگەن جالپى ماتەريالدىق شىعىن 8 500 000 تەڭگەنى قۇرادى. كۇدىكتى ۇرلانعان التىن بۇيىمداردى لومباردقا وتكىزىپ، تۇسكەن اقشانى تۇگەلدەي قۇمار ويىندارىنا جۇمساعان. قازىرگى تاڭدا اتالعان دەرەك بويىنشا سوتقا دەيىنگى تەرگەۋ جۇرگىزىلۋدە.
