تۇركىستان وبلىسى كەلەس اۋدانىندا سۋعا كەتكەن 7 جاستاعى بالانى ىزدەۋ جۇمىستارى جالعاسۋدا، دەپ حابارلايدى Dala News.
تجم مالىمەتىنشە، بالا 23 ناۋرىز كۇنى ساعات 17:00 شاماسىندا كەلەس وزەنىنە قۇلاپ، سۋعا باتىپ كەتكەن. ىزدەستىرۋ جۇمىستارىنا تجم، پوليسيا، ۇقك، جەرگىلىكتى ورگاندار، ەرىكتىلەر مەن تۋىستارى جۇمىلدىرىلعان.
قۇتقارۋشىلار اباي مەن جۇزىمدىك اۋىلدارى ماڭىنداعى وزەننىڭ 42 شاقىرىم اۋماعىن تەكسەرىپ جاتىر. سونىمەن قاتار سۋ بەتىمەن 15 شاقىرىم، سۋ استىندا 900 مەتر اۋماق قارالعان.
شىمكەنتتەن كەلگەن قۇتقارۋشىلار دا ىزدەۋگە قوسىلىپ، لەسبەكباتىردان سىردارياعا دەيىنگى 9 شاقىرىم ۋچاسكەنى تەكسەرۋدە. ىزدەستىرۋ بارىسىندا دروندار، ەحولوت جانە 8 ءجۇزۋ قۇرالى پايدالانىلۋدا.
ىزدەۋدى جەڭىلدەتۋ ءۇشىن سۋ دەڭگەيىن تومەندەتۋ شارالارى قابىلدانىپ، قازىعۇرتتاعى شليۋز توقتاتىلىپ، وزبەكستانداعى كانال دا جابىلعان.
قازىرگى ۋاقىتتا ىزدەستىرۋ-قۇتقارۋ جۇمىستارى جالعاسۋدا.
