بۇگىندە جولدانعان 8676 ادامنىڭ 723ء-ى تۇراقتى جۇمىسقا ورنالاسقان. بۇگىن سايرام اۋدانىندا وتكەن «التىن كۇز» مەرەكەسىندە وبلىس اكىمى جانسەيىت تۇيمەبايەۆ وسى باعدارلاما اياسىندا ءبىلىم العان 20 مامانعا سالتاناتتى تۇردە كۋالىك تابىس ەتتى.
ءوڭىر باسشىسى الدىمەن سايرام اۋدانىنداعى كاسىپتىك-تەحنيكالىق كوللەدج تۇلەكتەرى دايىنداعان ارنايى كورمەنى ارالاپ شىقتى. جۇرت نازارىن وزىنە اۋدارعان جوبالاردىڭ ءبىرى – كىرپىش قۇياتىن قۇرىلعى بولدى. كادىمگى تەمىرمەن جاسالعان قوندىرعىنى كوللەدج تۇلەكتەرى وزدەرى ويلاپ تاپقان. جۋىردا ولار وسى جوباسىمەن وبلىستىق بايقاۋعا قاتىسىپ، جۇلدەگەرلەر قاتارىنان كورىنىپتى.
ال، دىنمۇحاممەد قونايەۆ اتىنداعى كوللەدجدىڭ ستۋدەنتتەرى پلاستيكالىق زاتتاردىڭ قالدىعىنا قۇم مەن ءتۇس بەرەتىن قوسپا قوسىپ، ءۇي اۋلاسىنا قولدانىلاتىن توسەنىش ويلاپ تاۋىپتى. وبلىس اكىمى ستۋدەنتتەردىڭ بۇل جوباسىنا تاڭدانىس ءبىلدىرىپ، جاستاردى زاماناۋي ۇزدىك جوبالاردى ازىرلەۋگە ىنتالاندىرۋ قاجەتتىگىنە توقتالدى.
«قازىرگى تاڭدا وبلىسىمىزداعى اۋدان، قالالارداعى ەلدىمەكەندەردە كاسىپتىك ماماندار تاپشىلىعى بايقالىپ وتىر. قاراپايىم مىسال، ءبىر اۋىلعا ەلەكتريك، سلەسار، دانەكەرلەۋشى، اعاش ۇستاسى سەكىلدى قاجەتتى ماماندىقتار جەتىسپەيدى. ءتىپتى جوق دەپ ايتساق تا بولادى. وسىنى ەسكەرە وتىرىپ ءبىز بيىلدىڭ وزىندە 30 ءتۇرلى قاجەتتى ماماندىقتار بويىنشا 9 مىڭعا جۋىق ازاماتتى قىسقا مەرزىمدىك وقۋعا جولداعان بولاتىنبىز. جۋىردا سول ماماندار بارلىق اۋىل وكرۋگتەرىنە جىبەرىلىپ، جۇمىسپەن قامتىلاتىن بولادى»، - دەدى جانسەيىت قانسەيىت ۇلى.
ايتا كەتەيىك، بيىل وبلىسىمىزدا «ناتيجەلى جۇمىسپەن قامتۋدى جانە جاپپاي كاسىپكەرلىكتى دامىتۋدىڭ 2017-2021 جىلدارعا ارنالعان باعدارلاماسىن» ىسكە اسىرۋعا رەسپۋبليكالىق بيۋدجەتتەن 11429،8 ملن. تەڭگە بولىنگەن بولاتىن. ناتيجەسىندە 64 مىڭ 314 ادامدى قامتۋ كوزدەلگەن. 2017 جىلدىڭ 1 قازانىنا بولىنگەن قارجىنىڭ 6،4 ملرد. تەڭگەسى نەمەسە 56،1 پايىزى يگەرىلىپ، 68534 باعدارلاما قاتىسۋشىسى الەۋمەتتىك قولداۋ شارالارىمەن قامتىلىپتى.
