«كەلەشەك مەكتەپتەرى» جوباسى - ەلىمىزدىڭ ءبىلىم بەرۋ جۇيەسىن جاڭا ساپالىق كەزەڭگە شىعارۋعا باعىتتالعان ماڭىزدى ستراتەگيالىق باستامالاردىڭ ءبىرى. جوبا اياسىندا سوڭعى جىلدارى ەلىمىزدىڭ كوپتەگەن وڭىرىندە زامان تالابىنا ساي ينفراقۇرىلىممەن جابدىقتالعان، سيفرلىق تەحنولوگيالاردى كەڭىنەن قولداناتىن جانە وقۋشىلاردىڭ جان-جاقتى دامۋىنا جاعداي جاسايتىن جاڭا ءبىلىم نىساندارى بوي كوتەرىپ كەلەدى. سونىڭ ىشىندە جامبىل وبلىسىندا اتقارىلىپ جاتقان جۇمىستاردىڭ كولەمى ەرەكشە نازار اۋدارادى، دەپ حابارلايدى Dalanews.kz.
وڭىردە 2023 جىلى 7 مەكتەپتىڭ قۇرىلىسى باستالىپ، بۇل ءبىلىم بەرۋ سالاسىنداعى ينفراقۇرىلىمدىق جاڭارۋدىڭ ناقتى قادامدارىنا اينالدى. سول مەكتەپتەردىڭ ىشىندە 2024 جىلى ۇشەۋى تولىق اياقتالىپ، بالالاردىڭ يگىلىگىنە بەرىلدى. بايزاق اۋدانىندا اشىلعان جاڭا مەكتەپ اۋىلدىق جەردە ساپالى بىلىمگە قول جەتىمدىلىكتى ارتتىرسا، تاراز قالاسىنىڭ بايتەرەك جانە ۇلى دالا مولتەك اۋداندارىندا اشىلعان ەكى ءىرى ءبىلىم وشاعى قالالىق وقۋشىلاردىڭ ورىن تاپشىلىعىنا قاتىستى ماسەلەلەردى ايتارلىقتاي جەڭىلدەتتى.
2025 جىلى ۇلى دالا مولتەك اۋدانىندا 2000 ورىندىق زاماناۋي مەكتەپتىڭ پايدالانۋعا بەرىلۋى – ءوڭىردىڭ ءبىلىم ينفراقۇرىلىمىنداعى ەڭ ءىرى وقيعالاردىڭ ءبىرى بولدى. بۇل مەكتەپ قالاداعى دەموگرافيالىق وسىمگە بايلانىستى تۋىنداعان ورىن جەتىسپەۋشىلىگىن ازايتىپ قانا قويماي، جاڭا ءبىلىم ستاندارتتارىنا تولىق سايكەس كەلەتىن كەڭ، جارىق كابينەتتەرمەن، عىلىمي زەرتحانالارمەن، ءىت جانە روبوتوتەحنيكا بولمەلەرىمەن جابدىقتالدى. مۇنداي مۇمكىندىكتەر وقۋشىلاردىڭ وقۋ پروسەسىن قىزىقتى ءارى ناتيجەلى ەتۋگە ىقپال ەتىپ، ولاردىڭ شىعارماشىلىق جانە عىلىمي قابىلەتتەرىن دامىتۋعا كەڭ ءورىس اشتى.
2025 جىلدىڭ قازان ايىندا قورداي اۋدانىنىڭ قاراسۋ جانە قاراكەمەر اۋىلدارىندا تاعى ەكى جاڭا مەكتەپ اشىلىپ، اۋىلداعى بالالار ءۇشىن بۇرىن بولماعان جاڭا مۇمكىندىكتەر تۋىندادى. اۋىلدىق اۋماقتاردا وسىنداي زاماناۋي مەكتەپتەردىڭ سالىنۋى ءبىلىم ساپاسىن ايتارلىقتاي ارتتىرىپ، اۋىل مەن قالا اراسىنداعى ءبىلىم بەرۋ ايىرماشىلىعىن قىسقارتۋعا مۇمكىندىك بەرۋدە. سونىمەن قاتار، جىل سوڭىنا دەيىن تاراز قالاسىندا تاعى ءبىر جاڭا مەكتەپتىڭ قۇرىلىسى اياقتالىپ، وڭىردەگى مەكتەپتەر جەلىسى ودان ءارى جاڭارتىلماق.
جاڭا مەكتەپتەردىڭ باستى ەرەكشەلىگى – ولاردىڭ تەك ادەمى عيمارات نەمەسە جاڭا پارتالارمەن شەكتەلمەيتىنى. بۇل مەكتەپتەردە جاڭارتىلعان ءبىلىم بەرۋ مازمۇنى ءتيىمدى ەنگىزىلىپ، وقىتۋ ادىستەرى جاڭا فورماتتا جۇزەگە اسىرىلۋدا. مۇعالىمدەر توپتىق جۇمىس، زەرتحانالىق تاجىريبەلەر، جوبالىق وقىتۋ سياقتى يننوۆاسيالىق تاسىلدەردى ءجيى قولدانادى. سيفرلىق قۇرالدار مەن ينتەراكتيۆتى تاقتالار وقۋ پروسەسىن جانداندىرىپ، وقۋشىلاردىڭ اقپاراتتىق ساۋاتتىلىعىن ارتتىرۋعا باعىتتالعان. ينكليۋزيۆتى ءبىلىم بەرۋگە ارنالعان ارنايى بولمەلەر مەن رەسۋرستىق ورتالىقتار دا اشىلىپ، مۇمكىندىگى شەكتەۋلى بالالاردىڭ ساپالى ءبىلىم الۋى ءۇشىن قولايلى جاعداي جاسالعان.
وسى وزگەرىستەردىڭ ناتيجەسى رەتىندە جاڭا مەكتەپتەردىڭ وقۋشىلارى رەسپۋبليكالىق دەڭگەيدە جوعارى جەتىستىكتەرگە قول جەتكىزۋدە. ولار پاندىك وليمپيادالاردا ماتەماتيكا، فيزيكا، بيولوگيا، قازاق ءتىلى جانە باسقا دا پاندەر بويىنشا جۇلدەلى ورىندارعا يە بولىپ، وبلىستىڭ بەدەلىن ارتتىرۋدا. عىلىمي جوبالار بايقاۋلارىندا ينجەنەريا، ءىت، ەكولوگيا سالالارى بويىنشا ۇسىنىلعان جوبالار جوعارى باعالانىپ، بىرنەشە وقۋشىنىڭ جۇمىستارى رەسپۋبليكالىق ۇزدىك وندىققا ەندى. روبوتوتەحنيكا، يننوۆاسيالىق يدەيالار مەن سيفرلىق تەحنولوگيالار باعىتىندا دا جاڭا مەكتەپتەردىڭ شاكىرتتەرى ايتارلىقتاي جەتىستىك كورسەتىپ، ءتۇرلى رەسپۋبليكالىق بايقاۋلاردان جۇلدەلى ورالۋدا. سپورت پەن ونەر سالاسىندا دا جاڭا مەكتەپتەردىڭ تاربيەلەنۋشىلەرى بەلسەندىلىك تانىتىپ، رەسپۋبليكالىق دەڭگەيدە جەڭىستەرگە قول جەتكىزۋدە.
اتا-انالار تاراپىنان دا جاڭا مەكتەپتەرگە دەگەن سەنىم ارتىپ كەلەدى. ولار وقۋ كابينەتتەرىنىڭ كەڭدىگى مەن جارىقتىعىن، مۇعالىمدەردىڭ جۇمىسىنا دەگەن جاۋاپكەرشىلىگىن، بالالاردىڭ قاۋىپسىزدىگىنە ەرەكشە كوڭىل بولىنەتىنىن، سونداي-اق جاڭا مەكتەپتەردە ۇيىرمەلەردىڭ كوپتىگىن ەرەكشە اتاپ وتۋدە. مۇنىڭ ءبارى وقۋشىلاردىڭ ءبىلىم الۋعا دەگەن قىزىعۋشىلىعىن ارتتىرىپ، ولاردىڭ تۇلعالىق دامۋىنا وڭ اسەرىن تيگىزىپ وتىر.
قورىتا ايتقاندا، «كەلەشەك مەكتەپتەرى» جوباسى ءوڭىردىڭ ءبىلىم بەرۋ جۇيەسىنە ۇلكەن سەرپىلىس اكەلدى. جاڭا مەكتەپتەر بالالارعا جايلى، ءقاۋىپسىز جانە زاماناۋي ورتا ۇسىنىپ قانا قويماي، ولاردىڭ رەسپۋبليكالىق دەڭگەيدە باسەكەگە قابىلەتتى بولۋىنا مۇمكىندىك جاساپ وتىر. الداعى جىلدارى بۇل باستاما ءوز جالعاسىن تاۋىپ، جاڭا مەكتەپتەردىڭ سانى ارتىپ، وقۋشىلاردىڭ جەتىستىگى بۇدان دا جوعارىلاي بەرەتىنىنە سەنىم مول.
