ماڭىزدى الەۋمەتتىك نىساننىڭ اشىلۋىنا وبلىس اكىمى بەيبىت يسابايەۆ قاتىسىپ، ورتالىقتىڭ باسشىسى ءارى نەگىزىن قالاۋشى ەلدوس بايالىشبايەۆقا العىسىن ءبىلدىردى:
– بۇگىن ءبىز تالدىقورعان قالاسىندا «اسار» وڭالتۋ كەشەنىنىڭ اشىلعانىنا كۋا بولىپ وتىرمىز. بۇل وڭالتۋ ورتالىعى ەرەكشە قاجەتتىلىكتەرى بار حالىققا ساپالى قىزمەت كورسەتۋگە جاردەمدەسەدى دەپ سانايمىن. بارشاعا كەدەرگىسىز، قولجەتىمدى ورتا قۇرۋ – مەملەكەتتىك ساياساتتىڭ ماڭىزدى باعىتى جانە بۇكىل قوعامنىڭ مىندەتى، بۇل تۋرالى مەملەكەت باسشىسى ۇنەمى ايتىپ وتىرادى.
بيىل 162 الەۋمەتتىك نىساندى بەيىمدەۋگە 472،6 ملن تەڭگە ءبولىندى. بۇل جۇمىستاردى قىركۇيەك ايىنىڭ سوڭىنا دەيىن تولىق اياقتايمىز. بۇدان ءارى وسى باعىتتاعى جۇمىس جالعاساتىن بولادى، – دەپ اتاپ ءوتتى ءوڭىر باسشىسى. بيىل تالدىقورعاندا «قامقورلىق» قورىمەن بىرلەسىپ ءاۋتيزمى جانە باسقا دا اقىل-وي كەمىستىگى بار بالالارعا ارنالعان ورتالىق اشىلعانىن، ءقازىر ونىڭ بازاسىندا 18 جاستان اسقان ازاماتتار ءۇشىن دە جاعداي جاساۋ جوسپارلانىپ وتىر.
– الاكول اۋدانىنىڭ اقشي اۋىلىندا، شيپالى كولدىڭ جاعاسىندا بيىل كۇردەلى جوندەۋدەن وتكەن اۋداندىق رەزيدەنسيا بازاسىندا جازعى دەمالىس ءۇشىن بالالاردى وڭالتۋ لاگەرى اشىلدى. وسى جازدا 140 بالا دەمالدى. بالقاش كولىنىڭ جاعاسىندا دا وسىنداي ورتالىق سالۋ جوسپاردا بار، قابىلدايتىن ادام سانى الاكولدەگى لاگەردەن كوبىرەك بولادى.
الدىمەن جولدى اياقتاپ، سودان كەيىن ينجەنەرلىك ينفراقۇرىلىم سالۋىمىز قاجەت. جالپى بۇگىندە تالدىقورعاندا وڭالتۋ قىزمەتتەرى 300 ادامعا كورسەتىلىپ وتىرسا، سونىڭ 54ء-ى بالا.
وسىعان بايلانىستى جەتىسۋ جۇرتشىلىعىنىڭ اتىنان وڭالتۋ ورتالىعىنىڭ باسشىسى ەلدوس بايالىشبايەۆقا العىسىمدى بىلدىرەمىن. مەن بۇل ورتالىقتا بولعانمىن، بۇگىن اشىلۋى وتكىزىلىپ وتىرعانىنا قۋانىشتىمىن. ءبىز ءوز تاراپىمىزدان قولداۋ كورسەتۋدى جالعاستىرامىز.
مۇندا گاز تارتىپ بەرەمىز، شامامەن 1،5 اي ىشىندە جۇمىستى اياقتايمىز. وسىنداي ورتالىقتار ەرەكشە كۇتىمگە مۇقتاج ازاماتتاردىڭ الەۋمەتتىك-تۇرمىستىق ورتاعا بەيىمدەلۋىنە، سونداي-اق كورسەتىلەتىن وڭالتۋ قىزمەتتەرىنىڭ ساپاسىن ارتتىرۋعا ىقپال ەتەتىنىنە سەنىمدىمىن، – دەگەن بەيبىت يسابايەۆ بۇدان ءارى ەڭبەك جانە حالىقتى الەۋمەتتىك قورعاۋ ءمينيسترىنىڭ قۇتتىقتاۋ جەدەلحاتىن وقىپ بەردى. وندا ەلدوس بايالىشبايەۆتىڭ الەۋمەتتىك قورعاۋ ىسىنە قوسقان ۇلەسى اتالىپ ءوتىلىپ، ورتالىق باسشىسى مەن ۇجىمىنىڭ اتىنا تىلەكتەر ايتىلدى.
قاتىسۋشىلاردى ورتالىقتىڭ اشىلۋىمەن تالدىقورعان قالاسىنىڭ «ەر» تىرەك قيمىل جۇيەسى زاقىمدانعان مۇگەدەكتەردىڭ قوعامدىق بىرلەستىگىنىڭ ءتوراعاسى، قالالىق ءماسليحات دەپۋتاتى روزا اقجاركەنوۆا قۇتتىقتادى.
– ەلدوس، سەنىڭ ءبىزدىڭ قالامىزدا بولعانىڭا مەن ريزامىن. ءبارى نەدەن، قالاي باستالعانىن بىلەمىز، جانە وسىنداي جاعدايعا جەتىپ وتىرعانىڭ – ءوزىڭنىڭ قاجىرلى ەڭبەگىڭنىڭ ناتيجەسى.
كوبىسى ورتالىققا اربامەن كىرىپ، وڭالتۋدان كەيىن بالداقپەن شىعادى. ەلدوسقا قولداۋ كورسەتىپ، جوبانى جۇزەگە اسىرۋعا كومەكتەسكەندەردىڭ بارلىعىنا شىن جۇرەكتەن العىس بىلدىرەمىن، ويتكەنى بۇل جاي عانا پايدالى ءىس قانا ەمەس، ناعىز يگى، ىزگى ءىس. دەندەرىڭىز ساۋ بولسىن، ءومىردى باعالاڭىزدار جانە بىر-بىرىڭىزگە قامقور بولىڭىزدار، – دەدى روزا اقجاركەنوۆا ءوز قۇتتىقتاۋىندا.
جۇبايى ورتالىقتا وڭالتۋدان ءوتىپ جاتقان قاديرا ساعادييەۆا العىس ءسوزىن ايتتى.
– ەكى جارىم جىلدان استام ۋاقىت بويى ءبىز «اسار» ورتالىعىندا ەم الىپ ءجۇرمىز. ورتالىق باستاپقىدا جارتىلاي جەرتولەدە بولدى، ءقازىر جارىق، جاقسى عيماراتقا كوشىپ وتىر. كۇيەۋىمدى اربامەن الىپ كەلگەنبىز، ءقازىر ول باياۋ جۇرە باستادى. قىزمەتكەرلەرگە قامقورلىقتارى ءۇشىن كوپ راحمەت. ەندى جاڭا ورتالىقتا فيزيوكابينەتكە، پروسەدۋرالىق كابينەتكە بارامىز. كابينەتتەرى وتە جاقسى جابدىقتالعان. ەلدوسقا، ونىڭ وتباسىنا، تۋىستارى مەن جاقىندارىنا دەنساۋلىق تىلەيمىن، – دەدى ول.
ورتالىقتىڭ ديرەكتورى ەلدوس بايالىشبايەۆتىڭ ءوزى دە ءسوز سويلەدى، ول جوبانى ىسكە اسىرۋ جانە وڭالتۋ ورتالىعىن سالۋ كەزىندە كومەك كورسەتكەندەردىڭ بارلىعىنا العىسىن ءبىلدىردى، سونداي-اق ورتالىقتىڭ قۇرىلۋ تاريحىنا قىسقاشا توقتالدى:
– 2015 جىلدان باستاپ وسى جوبانى ىسكە اسىرا باستادىم، ءۇش جىل قاتارىنان «ءسابي» قورىنىڭ «ءوز بيزنەسىڭدى قۇر» كونكۋرسىنا قاتىستىم. ءۇشىنشى جىل دەگەندە جەڭىسكە جەتتىم. سونىمەن قاتار ءار جىلدارى جاپونيا ەلشىلىگىنىڭ جابدىق ساتىپ الۋعا بەرىلەتىن «ءشوپ تامىرلارى» گرانتىن ەكى رەت جەڭىپ الدىم.
ايتپاقشى، حالىقارالىق گرانتتى ءبىر ادامنىڭ ەكى رەت ۇتۋى الەمدەگى ەكىنشى جاعداي ەكەن. بۇل زاماناۋي جەتىلدىرىلگەن جابدىقتى ساتىپ الۋعا ۇلكەن قولداۋ بولدى.
«دامۋ» قورىنىڭ جەڭىلدىك شارتتارى بار كرەديتتىك قاراجاتىن دا پايدالاندىم. اكىمدىك ماعان قۇرىلىس سالاتىن جەر تەلىمىن بەردى. جالپى كوپ ۋاقىت كەتتى، قانشاما كۇش جۇمسالىپ، جۇمىس جاسالدى. سونىڭ ءبارى ناتيجەسىن بەردى. بۇگىن ورتالىق رەسمي تۇردە اشىلىپ وتىر. ءبىز حابارلاسقانداردىڭ بارلىعىنا كومەكتەسۋگە تىرىسامىز.
وسى مۇمكىندىكتى پايدالانا وتىرىپ، ءوز ۇجىمىما العىسىمدى بىلدىرەمىن. باستاپقىدا بىزدە 4-5 ادام عانا جۇمىس ىستەگەن، ءقازىر ولاردىڭ سانى 30-عا جۋىقتادى. سىزدەر بولماساڭىزدار وسىنداي جەتىستىككە جەتپەس ەدىم، – دەپ ەلدوس ءبىرقاتار ازاماتتارعا العىس حاتتار تاپسىردى.
اتاپ وتسەك، «اسار» سپورتتىق-وڭالتۋ ورتالىعى عيماراتىنىڭ جالپى اۋدانى 700 شارشى مەتردى قۇرايدى. فيزيوتەراپيا، كينەزوتەراپيا كابينەتتەرى، ماسساج جانە ەمدەۋ كابينەتتەرى، پسيحولوگ جانە لوگوپەد كابينەتتەرى، بۋفەت بار، كەدەرگىسىز ورتا قالىپتاستىرۋ ءۇشىن بارلىق جاعداي جاسالعان. جوبانىڭ جالپى قۇنى – 120 ملن تەڭگە. مەملەكەتتىك الەۋمەتتىك تاپسىرىستىڭ ارقاسىندا ورتالىقتا قىزمەتتەر تەگىن كورسەتىلەدى، مۇندا قىزمەت الۋ ءۇشىن دارىگەردىڭ تاعايىنداۋى قاجەت.
جالپى «اسار» سپورتتىق-وڭالتۋ ورتالىعىنىڭ جوعارى تەحنولوگيالىق جابدىقتارى ەرەكشە. مىسالى، يسپاندىق ەكزوسكەلەت ادامعا قايتادان ءجۇرۋدى ۇيرەنۋگە كومەكتەسەدى. «بۇل سالماعى نەبارى 17 كگ بولاتىن مودەل، رەسەيلىك ءوندىرىس مودەلىنىڭ سالماعى 46 كگ. قازاقستاندا مۇنداي مودەل جوق، بۇل مودەل قوزعالىس داچيكتەرىنىڭ فۋنكسياسىنا يە. ترەناجەردىڭ قۇنى شامامەن 107 ملن. تەڭگە»، – دەپ ءتۇسىندىردى ورتالىق ديرەكتورى.
زاماناۋي ەمدەۋ جابدىقتارىنىڭ تاعى ءبىرى – «لۋنا» كوپفۋنكسيونالدى روبوتتانعان وڭالتۋ جۇيەسى. بۇل ەرەكشە ترەناجەر نيەۆرولوگيالىق جانە ورتوپەديالىق پاتولوگياسى بار، باستان وتكەرگەن جاراقاتتارى مەن اۋرۋلارىنا بايلانىستى قوزعالىس بۇزىلىستارى بار ناۋقاستاردى ەمدەيدى. «اسار» ورتالىعىندا اقش، جاپونيا، گەرمانيا، يتاليا، ۇلىبريتانيا، يسپانيا، پولشادان اكەلىنگەن ەرەسەكتەر مەن بالالاردى وڭالتۋعا ارنالعان 30-دان استام ترەناجەرلەر مەن ارنايى جابدىقتار بار.
فوتوسۋرەتتەر اۆتورلارى: جەڭىس ىسقاباي، دميتريي ەروفەيەۆ
