كاسپيي تەڭىزىنە ءقاۋىپ ءتونىپ تۇر، سەبەبى جاڭا بالدىر ءتۇرى ەكوجۇيە قۇرىلىمىن وزگەرتۋى مۇمكىن، دەپ حابارلايدى Dalanews.kz. 

ورتا كاسپيي سۋ ايماعىندا العاش رەت Ceratium tripos var. Balticum ءدينوفيتتى بالدىر ءتۇرى تىركەلدى. بۇل سۋ گۇلدەنۋىنە ىقپال ەتەتىن پلانكتون ءتۇرى. ول ەكوجۇيەگە اسەر ەتىپ، مىسالى، سۋدىڭ وتتەگى قۇرامىن ازايتادى.

كاسپيي تەڭىزى بۇعان دەيىن دە ينۆازيالىق فيتوپلانكتون تۇرلەرىنىڭ اسەرىن باستان وتكەرگەن.

— 1934 جىلى مۇندا Pseudosolenia calcar-avis دياتومدى بالدىرى كەڭ تارالعان. ول تەز ارادا ۇساق فيتوپلانكتون تۇرلەرىن ىعىستىردى. ءبىراق ونىڭ جاسۋشالارى بالدىرلارمەن قورەكتەنەتىن جانۋارلاردىڭ كوپشىلىگى ءۇشىن تىم ءىرى بولىپ شىقتى. بۇل ەكوجۇيەگە جانە جەرگىلىكتى تۇرلەرگە جۇكتەمەنى ارتتىردى، — دەپ حابارلايدى رەسەيدىڭ بۇكىلرەسەيلىك بالىق شارۋاشىلىعى جانە مۇحيتتانۋ عىلىمي-زەرتتەۋ ينستيتۋتى.

جاڭا بالدىرلاردىڭ جاسۋشالارى ودان دا ءىرى. عالىمداردىڭ پىكىرىنشە، بۇل زووپلانكتونعا قولجەتىمدى قورەكتىك فيتوپلانكتون تاپشىلىعىن ودان ءارى كۇشەيتۋى مۇمكىن.

زەرتتەۋلەر كورسەتكەندەي، جاڭا بالدىر ءتۇرى تىم جىلدام تارالۋدا. بۇل كاسپييلىك مايشاباقتىڭ قورەكتىك بازاسىنا ءقاۋىپ توندىرۋدە.

عالىمدار، سونداي-اق، كاسپيي تەڭىزىندە بوگدە تۇرلەردىڭ كوبەيۋىن اتاپ ءوتتى. ونىڭ سەبەپتەرى — سۋ ايدىنىنا ورگانيزمدەردىڭ ەنۋ جولدارىنىڭ كوبەيۋى جانە كليماتتىڭ وزگەرۋى. كليماتتىڭ وزگەرۋى ولاردىڭ تىرشىلىك ەتۋىنە جانە تارالۋىنا قولايلى جاعداي تۋعىزۋدا.