بۇل تۋرالى بۇگىن ارنايى بريفينگ بارىسىندا الماتى قالاسى اكىمىنىڭ ءبىرىنشى ورىنباسارى ساپاربەك تۇياقبايەۆ حابارلادى.
اتالعان پورتال تەك شاھار تۇرعىندارىنا رۇقسات بەرۋدى عانا ەمەس، سونىمەن قاتار قالانىڭ پوليسيا قىزمەتكەرلەرىنىڭ دە جۇمىسىن جەڭىلدەتەدى. س.تۇياقبايەۆتىڭ ايتۋىنشا، پورتالدى قۇرۋ كاسىپورىنداردى كەزەڭ-كەزەڭىمەن ىسكە قوسۋ قاجەتتىلىگىنەن جانە سوعان بايلانىستى كوروناۆيرۋستى ودان ارى تاراتپاۋ ءۇشىن قالاداعى كولىك قوزعالىسى كەزىندە قاتاڭ باقىلاۋدى قامتاماسىز ەتۋ ءۇشىن تۋىنداعان.
وسىعان دەيىن قالالىق شتابتىڭ شەشىمىمەن كارانتين كەزىندە الماتىدا ءوز قىزمەتتەرىن جۇزەگە اسىرۋعا بولاتىن ەكونوميكا سەكتورلارى انىقتالعان (بەلگىلەنگەن) بولاتىن. بۇل – قالانىڭ تىرشىلىك ارەكەتىن قامتاماسىز ەتۋگە قاجەتتى سالالار، ولاردىڭ ىشىندە ساۋدا (ازىق-تۇلىك دۇكەندەرى جانە ءدارىحانالار)، دەنساۋلىق ساقتاۋ، كولىك جانە لوگيستيكا، كوممۋنالدىق قىزمەتتەر، مەملەكەتتىك باسقارۋ جانە قۇقىق قورعاۋ ورگاندارى، ءىشىنارا ازىق-تۇلىك ونەركاسىبى، قۇرىلىس، ەدب (ەكىنشى دەڭگەيلى بانكتەر) (20-30%)، كوممۋنيكاسيا جانە بايلانىس سالالارى بار.
"الايدا، وسى ءتىزىمدى زەرتتەۋ بارىسىندا ءبىز كەيبىر كاسىپكەرلەردىڭ بۇل مۇمكىندىكتى تەرىس ماقساتتا پايدالانىپ، رۇقسات بەرىلگەن تۇلعالاردىڭ تىزىمىنە وزدەرىنىڭ قىزمەتتەرىنە ەش قاتىسى جوق ازاماتتاردى تىركەپ قويعانىن انىقتادىق"، – دەپ اتاپ ءوتتى قالا اكىمىنىڭ ورىنباسارى.
"سول ءۇشىن وسى جۇمىستىڭ بارىنشا اشىقتىعىن (ايقىندىعىن) قامتامىز ەتۋدە جانە ادام فاكتورىنىڭ اسەرىن بولدىرماۋ ءۇشىن جاڭا پورتالدى جاساپ شىعاردىق. پورتال ارقىلى كاسىپورىندار تەك رۇقسات ەتىلگەن سالالار بويىنشا ءوتىنىش بەرە الادى. جۇمىس ىستەۋىنە رۇقسات ەتىلمەگەن سالالار بويىنشا وتىنىشتەردى پورتال قابىلدامايدى. ودان بولەك، اتالعان كاسىپورىندا جۇمىس ىستەيتىن قىزمەتكەرلەر سانىنان جوعارى مولشەردە وتىنىشتەر قابىلدانبايدى. ءاربىر كومپانياداعى جۇمىسشىلار سانى تۋرالى مالىمەتتەر ءبىزدىڭ مەملەكەتتىك ورگانداردا بار. سوندىقتان مىسالعا الاتىن بولساق، ەگەر كاسىپورىندا رەسمي تۇردە 50 ادام جۇمىس ىستەيتىن بولسا، پورتال 50-دەن استام ادام كورسەتىلگەن ءتىزىمدى قابىلدامايدى. ءوتىنىش بەرەر كەزدە ءوزىنىڭ ەسق راستاۋ قاجەت بولعاننان كەيىن كومپانيانىڭ ءبىرىنشى باسشىلارىنىڭ دەربەس جاۋاپكەرشىلىگى قاراستىرىلعان".
"بۇل پورتالدى جاساۋ كەزىندە باستى مىندەتىمىز قالا كوشەلەرىندە ادام سانىن بارىنشا ازايتۋ بولاتىن"، – دەدى ساپاربەك تۇياقبايەۆ.
"جالپى الەمدە كوروناۆيرۋستىڭ سالدارى وسىنداي بولادى دەپ ەشكىم كۇتكەن جوق، شارالاردى بارىنشا از ۋاقىتتىڭ ىشىندە قابىلداۋىمىزعا تۋرا كەلدى. كارانتين مەن كوروناۆيرۋس سالدارىنىڭ تەز اياقتالمايتىنىن ءبارى جاقسى بىلەدى، قالا ەكونوميكاسىن كەزەڭ-كەزەڭىمەن ىسكە قوساتىن بولامىز، ودان ارعىسىن ۋاقىت كورسەتەدى. سول ءۇشىن بىزگە بايلانىس جاساۋدى جانە قالاداعى قوزعالىستى ازايتۋ ءۇشىن وسىنداي پورتال قاجەت بولدى. كاسىپورىن جۇمىسشىلارى مەن اۆتوكولىك قۇرالدارىنىڭ ءتىزىمى پورتال ىسكە قوسىلعان ساتتەن باستاپ ەكى كۇن ىشىندە – 16 ءساۋىر ساعات 00.00-گە دەيىن جاسالادى. سول ۋاقىتقا دەيىن وسىعان دەيىن بەرىلگەن رۇقساتتاردىڭ قازىرگى مالىمەتتەر بازاسىنىڭ شەڭبەرىندە كۇشى بولادى"، – دەپ اتاپ ءوتتى س.تۇياقبايەۆ.
الماتى قالاسى كاسىپكەرلەر پالاتاسىنىڭ ديرەكتورى ناريمان ءابىلشايىقوۆ ناقتىلاعانداي، ەسق ەنگىزۋ بىرەۋدەن ارتىق ادامعا تىزىمگە ءوتىنىش بەرۋدە قاجەت بولادى. ال ماسەلەن، ءۇي جانىنداعى دۇكەندەر ءۇشىن ماڭىزدى جايت - تەك ءبىر ادامنىڭ مالىمەتتەرىن ەنگىزگەن جاعدايدا ەسق بەكىتۋدىڭ قاجەتى جوق.
"قالادا ءجۇرىپ-تۇرۋ ءۇشىن رۇقساتى بار-جوعىن ءبىلۋ ءۇشىن جسن ەنگىزىلەدى، ال ەگەر ول جەكە كاسىپكەر بولسا، يبن ەنگىزەدى. باعدارلاما الگوريتمدەر نەگىزىندە جالدامالى قىزمەتكەرلەرگە قالادا جۇرۋگە بولاتىن-بولمايتىنىن ءوزى انىقتايدى. ەگەر مۇمكىن بولسا، اكىمدىكتىڭ تىزىمىنە سايكەس، كەلەسىدەي تەرەزە شىعادى – ۇياشىقتاردى تولتىرىپ باستاۋ، سونىمەن بىرگە ەلەكتروندى ساندىق قولتاڭبا قويۋ كەرەك"، – دەپ حابارلادى بريفينگ بارىسىندا الماتى قالاسى كاسىپكەرلەر پالاتاسى وڭىرلىك كەڭەسىنىڭ ءتوراعاسى ماكسيم بارىشيەۆ
"ەسق ەكى بولىمنەن تۇرادى. ءبىرىنشىسى ۇياشىقتاردى تولتىرار الدىندا قويىلادى، ودان كەيىن قىزمەتكەرلەردىڭ مالىمەتتەرى ەنگىزىلەدى، تەك جسن، باسقا ەشتەڭە ەنگىزۋدىڭ قاجەتى جوق. ودان كەيىن اۆتوكولىككە قاتىستى مالىمەتتەر ەنگىزىلەدى، ياعني مەملەكەتتىك ءنومىر بەلگىسى كەرەك، اۆتوكولىكتىڭ اتى دا، ماركاسى دا قاجەت ەمەس. ودان كەيىن ءۇش "ءتۇرتىپ قويۋ" بەلگىسى تۇرادى، قۇجاتتاردى تولتىرۋ ەرەجەلەرىنە سايكەس "كەلىسەمىن" دەگەن باتىرمانى باسۋ قاجەت. سودان كەيىن ەلەكتروندى ساندىق قولتاڭبانىڭ ەكىنشى بولىگىن سالىپ، "كەلىسەمىن" دەگەن باتىرمانى باسۋ كەرەك. وسىدان كەيىن بارلىق قالىپتاسقان بازا شتابقا تۇسەدى جانە ودان ارى قاراۋعا جىبەرىلەدى".
ماكسيم بارىشيەۆتىڭ سوزىنە قاراعاندا، ونلاين-پلاتفورما ءبىر ۋاقىتتا 30 مىڭداي پايدالانۋشىنىڭ جۇمىسىن اتقارا الادى، الداعى ۋاقىتتا بىردەن 100 مىڭ ادامدى تەستىلەۋ قاراستىرىلىپ وتىر.
قورىتىندىلاي كەلە، ساپاربەك تۇياقبايەۆ جالعان اقپارات بەرىلگەن جاعدايدا كاسىپورىنداردىڭ العاشقى باسشىلارى جەكەلەي جاۋاپكەرشىلىككە، ءتىپتى قىلمىستىق جاۋاپكەرشىلىككە دەيىن تارتىلۋى مۇمكىن ەكەندىگىن ەسكە سالدى.
