گەنادان ۇلگى الىڭىزدار!
گولوۆكين سپورتتىق مانسابىن اياقتاماعان سپورتشى. كەلەشەكتە ونى تالاي بەلەس كۇتىپ تۇر. گەنا سپورتتا ءجۇرىپ-اق ومىرىنە جەتەتىن قارجى تاباتىنىن ءبارىمىز بىلەمىز. ءبىراق ول تەك قانا سپورتپەن شەكتەلگەن جوق. ءقازىر ول وتاندىق ءوندىرىستىڭ بويىنا قان جۇگىرتكەن ينۆەستور اتاندى.
ەڭ باستىسى گەنانىڭ بۇل ارەكەتى وزگە سپورتشىلارىمىزعا ۇلگى بولۋى ءتيىس دەپ ەسەپتەيمىز.
بىزدە قالتاسى مىس-مىس اقشاعا تولى، اتاعى جەر جارعان سپورتشىلارىمىز جەتەدى. وكىنىشكە وراي، ولاردىڭ ەشقايسىسى كاسىپكەرلىكپەن اينالىسىپ، ەلدىڭ ەكونوميكاسىن كوتەرۋگە اتسالىسىپ جاتقان جوق.
ولاردىڭ بيزنەسپەن اينالىسۋعا ىقىلاسى جوق دەپ ايتۋ دا قاتە شىعار؟ ونىڭ ۇستىنە، ءقازىر قازاقستاندا كاسىپكەرلىكپەن اينالىسۋدىڭ وزىندىك قيىندىقتارى بار ەكەنىن بىلەمىز. ءبىراق ولار ەڭبەكتەنىپ، كاسىپكەرلىكپەن اينالىسسا، بارلىق قيىندىقتى جەڭەتىنى انىق.
سپورتشىلارىمىز ءبىر كاسىپتى باستاسا، قاداعالاۋشى ورگاندار ولاردى اياقتان شالا المايدى. سوندىقتان چەمپيوندارىمىزدىڭ كوپشىلىگى سپورتتىق مانسابىن اياقتاعاننان كەيىن كاسىپكەرلىككە دەن قويۋى كەرەك دەپ ەسەپتەيمىز. بۇل ولاردىڭ ازاماتتىق پارىزى دەسەك بولادى.
ءيا، اتاقتى سپورتشىلاردىڭ مەيرامحانالار مەن دۇكەندەرى بار ەكەنىن بىلەمىز. بىزدىڭشە، ولار مۇنداي ۇساق بيزنەسپەن تۇيىقتالماي، ءوندىرىستى وركەندەتۋگە ءوز ۇلەستەرىن قوسۋى كەرەك. ولار شاعىن زاۋىتتار سالىپ، سەحتار اشسا ەلىمىزدە ءوندىرىستىڭ ءتۇتىنى ءتۇزۋ شىعاتىنىنا سەنىمدىمىن.
سپورتشىنىڭ شەنقۇمارعا اينالعانىن حالىق قالامايدى
ال ءبىزدىڭ چەمپيوندارىمىز نە ىستەيدى؟ سپورتتىق مانسابى اياقتالعاننان كەيىن شەنەۋنىك، دەپۋتات بولعىسى كەلەدى. كوپتەگەن سپورتشىلار زاڭگەر ماماندىعىن سىرتتاي وقىپ، كۇشتىك قۇرىلىمداردا جۇمىس ىستەۋگە قۇمار. ال بىرەن-ساران سپورتشىنىڭ قىلمىستىق توپتار اراسىندا «ماسەلە شەشۋگە» ماماندانىپ كەتكەنىن دە ەستىپ قالامىز.
تالاي جاستاردىڭ كۋميرىنە اينالعان ازاماتتاردىڭ ءبىر كۇندە شەنقۇمارعا اينالىپ، جاعىمسىز ورتادا توبە كورسەتۋى ەلىمىز ءۇشىن ورنى تولماس وكىنىش ەكەنىن ەستەن شىعارمايىق.
بۇگىندە شەندىلەر سايلاۋ كەزىندە تانىمال سپورتشىلاردى سايلاۋ ناۋقانىنا تارتىپ، حالىقتىڭ سەنىمىنە يە بولۋعا تىرىسادى. بۇل – الەمدىك تاجىريبەدە قالىپتاسقان دۇنيە. ءوز باسىم ساياسي ويىنعا قاتىستى دەپ سپورتشىلاردى شەتىنەن سوگە جاماندايىن دەگەن نيەتىم جوق.
ءبىر قىزىعى، كەيبىر سپورتشىلارعا «كاسىپكەرلىكپەن اينالىسىپ، قارجى تاۋىپ، وزىڭىزگە دە، مەملەكەتكە دە پايداڭىزدى تيگىزبەيسىز بە؟» دەپ سۇراساڭ، ولار تەرەڭ ويدىڭ قۇشاعىنا بەرىلىپ، «مەن اقشاعا قىزىققان جان ەمەسپىن، ماعان حالىقتىڭ ىقىلاسىنان ارتىق ەشتەڭە كەرەگى جوق» دەپ ءوزى دە، وزگە دە تۇسىنبەيتىن اڭگىمەنى ايتا جونەلەدى.
بۇل ەندى كەڭەستىك جۇيەدەن قالعان ەسكى ۇعىم-تۇسىنىكتەن پايدا بولعان وي ەكەنىن بايقاعان شىعارسىزدار. سپورتشىلارىمىز قانداي قوعامدا ءومىر ءسۇرىپ جاتقانىن ءالى دە بولسا جەتە تۇسىنبەيدى.
ولار وسىنداي ابستراكتىلى اڭگىمە ايتا باستاعاندا «سايلاۋعا ۇگىتشى بولعاندا حالىق مۇددەسىن قانشالىقتى ويلادىڭىز» دەپ «ۆسترەچنىي» سۇراق تا قويعىڭ كەلىپ كەتەدى.
كەيدە تەپسە تەمىر ۇزەتىن سپورتشىلارىمىزدىڭ شوۋ-باعدارلامالارعا قاتىسىپ، التىن ۋاقىتىن تەككە كەتىرىپ جۇرگەنىن كورگەندە جىنىڭ كەلەدى.
ءقازىر ءبىز نارىق زامانىندا ءومىر ءسۇرىپ جاتىرمىز. كەز كەلگەن سالادا جەتىستىككە جەتكەن ادام ءوزىنىڭ ءىسىن، كاسىبىن بيزنەسكە اينالدىرۋدى جاتسا دا، تۇرسا دا ويلاۋى ءتيىس.
مىقتى سپورتشىلار كوپ، ءبىراق سپورت نىساندارى تاپشى
ەموسياعا بەرىلگىش ءبىزدىڭ قوعام بيزنەسپەن اينالىسقان ادامدى ماتەريالدىق يگىلىككە قۇنىققان، بايشىكەش دەپ سىنايتىنى انىق. جەتپىس جىل بويى قاراپايىم حالىقتىڭ ساناسىنا دەندەپ ەنگەن وسى تۇسىنىكتى سىلىپ تاستاۋ ءۇشىن سپورتشىلارىمىز بيزنەسپەن اينالىسىپ، جۇرتتى كاسىپكەرلىكپەن اينالىسۋعا ءۇن قوسۋى كەرەك.
بۇگىندە قاراپايىم حالىقتىڭ سىرت ەلدەرگە شىعىپ، ونداعى وزىق مادەنيەتپەن تانىساتىن مۇمكىندىگى جوق. ال سپورتشىلارىمىز ءتۇرلى جارىستارعا قاتىسىپ، تالاي ەلدەرگە بارىپ، ونداعى جاقسى دۇنيەلەردى كورىپ، بويىنا سىڭىرەدى. سپورتشىلاردىڭ جاقسى دۇنيەنى، وزىق مادەنيەتتى ەلگە جەتكىزەتىن مۇمكىندىگى بار. سوندىقتان ولار وزدەرىن وزىق مادەنيەتتى جەتكىزۋشىلەر رەتىندە سەزىنۋى ءتيىس.
قازىرگى تاڭدا ەلىمىزدىڭ قاي قالاسىنا بارساڭىز دا (اۋدان ورتالىقتارىن اۋىزعا الماي-اق قويالىق) سپورتتىق نىساندارعا مۇقتاج ەكەنىن بايقايسىڭ. بۇقارالىق سپورتتى دامىتىپ، سالاۋاتتى ءومىر سالتىن قالىپتاستىرامىز دەگەنىمىزگە 20 جىلدان استى. پرەزيدەنتتىڭ ەل ىشىندە قولعا العان وسى ءبىر شارۋاسىنا اتاقتى سپورتشىلارىمىز قانشالىقتى ۇلەس قوستى دەپ ويلايسىز؟
سپورت سالاسىندا كوپتەگەن بيزنەستىڭ ءتۇرىن ۇيىمداستىرۋعا بولادى. سپورتشىلارىمىز نەگە سپورت الاڭدارىن جابدىقتايتىن قۇرىلعىلار شىعارۋمەن اينالىسپايدى؟ شاعىن باسسەيندەر مەن الاڭدار سالىپ بۇقارالىق سپورتتى دامىتۋعا ءوز ۇلەستەرىن قوسسا بولادى عوي. بيزنەسپەن ءارى، ءوزىنىڭ سۇيىكتى كاسىبىمەن اينالىسىپ، ءبىر وقپەن ەكى قوياندى اتار ەدى. ايتا بەرسەڭ اڭگىمە كوپ، ەڭ باستىسى اتاعى جەر جارعان چەمپيوندارىمىز وزدەرىنىڭ سوڭىندا مەدالدارىنان بولەك بالا-شاعاسى اينالىساتىن ومىرلىك كاسىپ، بيزنەس قالدىرۋدى ويلاۋى كەرەك.
جاربول كەنت ۇلى
