Genadan úlgi alyńyzdar!
Eń bastysy Genanyń bul áreketi ózge sportshylarymyzǵa úlgi bolýy tiis dep esepteimiz.
Bizde qaltasy mys-mys aqshaǵa toly, ataǵy jer jarǵan sportshylarymyz jetedi. Ókinishke orai, olardyń eshqaisysy kásipkerlikpen ainalysyp, eldiń ekonomikasyn kóterýge atsalysyp jatqan joq.
Olardyń biznespen ainalysýǵa yqylasy joq dep aitý da qate shyǵar? Onyń ústine, qazir Qazaqstanda kásipkerlikpen ainalysýdyń ózindik qiyndyqtary bar ekenin bilemiz. Biraq olar eńbektenip, kásipkerlikpen ainalyssa, barlyq qiyndyqty jeńetini anyq.
Sportshylarymyz bir kásipti bastasa, qadaǵalaýshy organdar olardy aiaqtan shala almaidy. Sondyqtan chempiondarymyzdyń kópshiligi sporttyq mansabyn aiaqtaǵannan keiin kásipkerlikke den qoiýy kerek dep esepteimiz. Bul olardyń azamattyq paryzy desek bolady.
Iá, ataqty sportshylardyń meiramhanalar men dúkenderi bar ekenin bilemiz. Bizdińshe, olar mundai usaq biznespen tuiyqtalmai, óndiristi órkendetýge óz úlesterin qosýy kerek. Olar shaǵyn zaýyttar salyp, tsehtar ashsa elimizde óndiristiń tútini túzý shyǵatynyna senimdimin.
Sportshynyń shenqumarǵa ainalǵanyn halyq qalamaidy
Al bizdiń chempiondarymyz ne isteidi? Sporttyq mansaby aiaqtalǵannan keiin sheneýnik, depýtat bolǵysy keledi. Kóptegen sportshylar zańger mamandyǵyn syrttai oqyp, kúshtik qurylymdarda jumys isteýge qumar. Al biren-saran sportshynyń qylmystyq toptar arasynda «másele sheshýge» mamandanyp ketkenin de estip qalamyz.
Talai jastardyń kýmirine ainalǵan azamattardyń bir kúnde shenqumarǵa ainalyp, jaǵymsyz ortada tóbe kórsetýi elimiz úshin orny tolmas ókinish ekenin esten shyǵarmaiyq.
Búginde shendiler sailaý kezinde tanymal sportshylardy sailaý naýqanyna tartyp, halyqtyń senimine ie bolýǵa tyrysady. Bul – álemdik tájiribede qalyptasqan dúnie. Óz basym saiasi oiynǵa qatysty dep sportshylardy shetinen sóge jamandaiyn degen nietim joq.
Bir qyzyǵy, keibir sportshylarǵa «kásipkerlikpen ainalysyp, qarjy taýyp, ózińizge de, memleketke de paidańyzdy tigizbeisiz be?» dep surasań, olar tereń oidyń qushaǵyna berilip, «men aqshaǵa qyzyqqan jan emespin, maǵan halyqtyń yqylasynan artyq eshteńe keregi joq» dep ózi de, ózge de túsinbeitin áńgimeni aita jóneledi.
Bul endi keńestik júieden qalǵan eski uǵym-túsinikten paida bolǵan oi ekenin baiqaǵan shyǵarsyzdar. Sportshylarymyz qandai qoǵamda ómir súrip jatqanyn áli de bolsa jete túsinbeidi.
Olar osyndai abstraktili áńgime aita bastaǵanda «sailaýǵa úgitshi bolǵanda halyq múddesin qanshalyqty oiladyńyz» dep «vstrechnyi» suraq ta qoiǵyń kelip ketedi.
Keide tepse temir úzetin sportshylarymyzdyń shoý-baǵdarlamalarǵa qatysyp, altyn ýaqytyn tekke ketirip júrgenin kórgende jynyń keledi.
Qazir biz naryq zamanynda ómir súrip jatyrmyz. Kez kelgen salada jetistikke jetken adam óziniń isin, kásibin bizneske ainaldyrýdy jatsa da, tursa da oilaýy tiis.
Myqty sportshylar kóp, biraq sport nysandary tapshy
Búginde qarapaiym halyqtyń syrt elderge shyǵyp, ondaǵy ozyq mádenietpen tanysatyn múmkindigi joq. Al sportshylarymyz túrli jarystarǵa qatysyp, talai elderge baryp, ondaǵy jaqsy dúnielerdi kórip, boiyna sińiredi. Sportshylardyń jaqsy dúnieni, ozyq mádenietti elge jetkizetin múmkindigi bar. Sondyqtan olar ózderin ozyq mádenietti jetkizýshiler retinde sezinýi tiis.
Qazirgi tańda elimizdiń qai qalasyna barsańyz da (aýdan ortalyqtaryn aýyzǵa almai-aq qoialyq) sporttyq nysandarǵa muqtaj ekenin baiqaisyń. Buqaralyq sportty damytyp, salaýatty ómir saltyn qalyptastyramyz degenimizge 20 jyldan asty. Prezidenttiń el ishinde qolǵa alǵan osy bir sharýasyna ataqty sportshylarymyz qanshalyqty úles qosty dep oilaisyz?
Sport salasynda kóptegen biznestiń túrin uiymdastyrýǵa bolady. Sportshylarymyz nege sport alańdaryn jabdyqtaityn qurylǵylar shyǵarýmen ainalyspaidy? Shaǵyn basseinder men alańdar salyp buqaralyq sportty damytýǵa óz úlesterin qossa bolady ǵoi. Biznespen ári, óziniń súiikti kásibimen ainalysyp, bir oqpen eki qoiandy atar edi. Aita berseń áńgime kóp, eń bastysy ataǵy jer jarǵan chempiondarymyz ózderiniń sońynda medaldarynan bólek bala-shaǵasy ainalysatyn ómirlik kásip, biznes qaldyrýdy oilaýy kerek.
Jarbol KENTULY
