2014 جىلى الماتى قالاسىنىڭ اكىمدىگى كاليفورنيا شتاتىنىڭ سوتىنا قالانىڭ بۇرىنعى اكىمى ۆيكتور حراپۋنوۆقا قاتىستى ارىز قالدىرعان بولاتىن. اكىمدىكتەگىلەر ارىزىندا حراپۋنوۆتىڭ ۇيىمداسقان قىلمىستىق توپپەن كۇرەس پەن جەمقورلىقپەن كۇرەسكە قاتىستى زاڭبۇزۋشىلىقتارى جايلى، سونداي-اق، الماتى قالاسى تۇرعىندارىنىڭ مۇددەلەرىنە جانە پايداسىنا قىزمەت ەتۋ جونىندەگى مىندەتتەردى بۇزۋ، بىرەۋدىڭ مۇلىگىن زاڭسىز يەلەنىپ الۋ مەن سول ماقساتتاردا الدىن الا كەلىسىم بويىنشا قىلمىس جاساۋى سياقتى زاڭبۇزۋشىلىقتاردى كورسەتكەن.
ادىلەت مينيسترلىگىنىڭ باسپا ءسوز قىزمەتىنىڭ مالىمەتىنشە، حراپۋنوۆتار مەن ونىڭ جالعان كومپانيالارى الدىن الا مالىمەت بويىنشا، الماتىداعى بيۋدجەتتەن جىمقىرعان قاراجاتتارى ارقىلى كاليفورنياداعى جىلجىمايتىن مۇلىك نىساندارى مەن قىمبات كولىكتەردى ساتىپ العان. الايدا كەيىن بۇل مالىمدەمەنى كاليفورنيا شتاتىنىڭ ايماقتىق سوتى قاراۋدان باس تارتقان ەدى.
سودان الماتى اكىمدىگى مەن ق ر ادىلەت مينيسترلىگىندەگىلەر كاليفورنيا شتاتىنىڭ اپەللياسيالىق سوتىنا نارازىلىق ءبىلدىرىپ، ءوتىنىش قالدىردى. وسىلايشا ەكىنشى ينستانسيالى سوت قازاقستان رەسپۋبليكاسىنىڭ بۇل ءوتىنىشىن قاناعاتتاندىرىپ، ايماقتىق سوتتىڭ شەشىمىن وزگەرتتى.
"قازاقستان رەسپۋبليكاسى اقش-تىڭ سوتىن ءوز پوزيسياسىنىڭ دۇرىس ەكەندىگىنە كوز جەتكىزە ءبىلدى. اتالعان شەشىم جەمقورلىقپەن كۇرەس سالاسىنداعى ۇزدىكسىز جۇمىستىڭ ناتيجەسى بولىپ تابىلادى. ەندى الماتى قالاسىنىڭ حراپۋنوۆتارعا قارسى شاعىمى كاليفورنيا سوتىندا قاراستىرىلاتىن بولادى"، – دەدى ادىلەت مينيسترلىگىندەگىلەر.
ەسكە سالايىق، الماتىنىڭ بۇرىنعى اكىمى حراپۋنوۆتى 2014 جىلى سوتقا بەرگەن ەدى. دەرەككوزى تاراتقان اقپاراتقا قاراعاندا، سوتقا شاعىمدانۋشى جاق ايىپتالۋشىنىڭ ەسەپ-شوتتارىن جاۋىپ، زاڭسىز جولمەن تابىلعان قارجىنىنىڭ بارلىعىن الماتىنىڭ قازىناسىنا قايتارۋ كەرەكتىگىن مالىمدەگەن.
ۆيكتور حراپۋنوۆ پەن ونىڭ ايەلى ءلايلا حراپۋنوۆاعا قاتىستى قازاقستاندا ۇزىن سانى 24 قىلمىستىق ءىس قوزعالىپ، قىزمەت بابىن اسىرا پايدالاندى، الاياقتىق جولمەن بيۋدجەت قارجىسىن جىمقىردى، زاڭسىز جەكەشەلەندىرۋ جۇرگىزدى، زاڭسىز كىرىستەردى زاڭداستىرىپ الدى، پارا الدى، ۇيىمداسقان قىلمىستىق توپتى قۇردى جانە ولارعا جەتەكشىلىك ەتتى دەگەن ايىپ تاعىلعان بولاتىن. 2008 جىلعى ساۋىردە ول ءقازىر وتباسىمەن تۇرىپ جاتقان شۆەيسارياعا قونىس اۋدارعان بولاتىن. ال 2012 جىلى قازاندا ۆيكتور حراپۋنوۆتىڭ ايەلى - ءلايلاعا ءىرى كولەمدى الاياقتىق جاساعانى ءۇشىن حالىقارالىق ىزدەۋ جاريالانعان ەدى.
