ۆيسە-پرەمەر قانات بوزىمبايەۆ «قازاقمىس كورپوراسياسى» ج ش س باسشىلىعىمەن كەڭەس وتكىزدى. «قازاقمىس» قازا تاپقانداردىڭ وتباسىلارىنا بارلىق قاجەتتى قارجىلىق كومەك كورسەتىپ، سونداي-اق ولاردىڭ نەسيە قارىزدارىن وتەيدى، دەپ حابارلايدى Dalanews.kz.

«قازا تاپقانداردىڭ عانا ەمەس، ولاردىڭ وتباسى مۇشەلەرىنىڭ دە قارىزدارى مەن نەسيەلەرىن وتەۋ قالىپتى جاعداي. سىزدەر وتباسىلاردىڭ جاعدايىن مۇقيات سارالاپ، بالالاردى، ونىڭ ىشىندە كامەلەتكە تولماعانداردى وقىتۋعا كەتەتىن شىعىنداردى جابۋلارىڭىز كەرەك»، — دەدى قانات بوزىمبايەۆ.

ال رەسپۋبليكالىق بيۋدجەتتەن اسىراۋشىسىنان ايىرىلۋ بويىنشا مەملەكەتتىك جاردەماقى، ساقتاندىرۋ تولەمدەرى قاراستىرىلعان جانە جەرلەۋ شىعىندارى وتەلەدى.  ۆيسە-پرەمەر تولەمدەردى كەشىكتىرمەۋدى تاپسىردى. ءتيىستى تەرگەۋلەردەن كەيىن شاحتادا «قازاقمىس كورپوراسياسى» جشس-دە كەلىسىمشارتتىق مىندەتتەمەلەر قايتا قارالاتىن بولادى.

«تەرگەۋ ونىڭ ءقاۋىپتى نەمەسە قاۋىپسىزدىگىن كورسەتپەيىنشە، شاحتاداعى جۇمىستى قايتا باستاۋ تۋرالى ويلاماڭىز. جۇيە مەن تاسىلدەردى تۇبەگەيلى وزگەرتۋ قاجەت، ءبىز مەملەكەت تاراپىنان ولاردى قاتايتاتىن بولامىز. ونەركاسىپتىك قاۋىپسىزدىك كوميتەتى قۇرىلدى، ءبىز زاڭنامانى وزگەرتەمىز. ءقازىر پارلامەنتتە ءتيىستى زاڭ جوباسى قارالۋدا، وسى زاڭ جوباسى شەڭبەرىندە توتەنشە جاعدايلار مينيسترلىگىنە قوسىمشا وكىلەتتىكتەر بەرىلەتىن بولادى. مۇنداي جازاتايىم وقيعالاردى الدىن الۋ ءۇشىن ءبىز بار كۇشىمىزدى سالامىز. مەملەكەت باسشىسى تەرگەۋدى مۇقيات جۇرگىزۋدى تاپسىردى. بۇل قۇقىق قورعاۋ ورگاندارىنىڭ ساراپتامالارى، ونەركاسىپتىك قاۋىپسىزدىك كوميتەتىنىڭ تەرگەۋى، سونداي-اق ءسىزدىڭ ەڭبەك ينسپەكتورلارىڭىزدىڭ تەكسەرۋلەرى. ءسىزدىڭ مىندەتىڭىز – وسى توتەنشە جاعدايعا كىمنىڭ جول بەرگەنىن انىقتاۋ»، — دەدى قانات بوزىمبايەۆ كومپانيا باسشىلىعىنا.

ەسكە سالايىق، بۇعان دەيىن ۇلىتاۋ وبلىسىندا شاحتا وپىرىلىپ، جەتى قىزمەتكەر قازا تاپقانىن حابارلاعان ەدىك. 

جاڭاارقا اۋدانىنداعى "قازاقمىس" كورپوراسياسىنا قاراستى "جومارت" كەنىشىندەگى شاحتادا تاۋ-كەن ماسساسى وپىرىلدى. بۇگىن قۇتقارۋشىلار جەتى جۇمىسشىنىڭ دەنەسىن تاپتى. 

كابەلدەر ۇزىلۋىنە بايلانىستى جۇمىسشىلارمەن بايلانىس تا ءۇزىلدى. اۆاريالىق-قۇتقارۋ جۇمىستارىنا ۇلىتاۋ جانە قاراعاندى وبلىستارىنىڭ تجد كۇشتەرى مەن قۇرالدارى، اپاتتار مەديسيناسى ورتالىعىنىڭ قىزمەتكەرلەرى جانە تجم پسيحولوگتارى جۇمىلدىرىلدى. 

پرەمەر-مينيستر ولجاس بەكتەنوۆتىڭ تاپسىرماسى بويىنشا ۇلىتاۋ وبلىسى جاڭاارقا اۋدانىنداعى شاحتاداعى جاعدايدىڭ سەبەپتەرىن تەرگەۋ جانە زارداپ شەككەندەرگە كومەكتەسۋ جونىندەگى ارنايى كوميسسيا قۇرىلدى. كوميسسيانى پرەمەر-مينيستردىڭ ورىنباسارى قانات بوزىمبايەۆ باسقاردى.

بۇل دەرەككە قاتىستى پوليسيا دەپارتامەنتى مالىمدەمە جاسادى. 

اتالعان فاكتى بويىنشا ق ر قك-نىڭ 277-بابىنىڭ 3-بولىگى «تاۋ-كەن نەمەسە قۇرىلىس جۇمىستارىن جۇرگىزۋ كەزىندە قاۋىپسىزدىك ەرەجەلەرىن بۇزۋ» بويىنشا ءىس قوزعالدى. وقيعا ورنىندا ۇلىتاۋ وبلىسىنىڭ پوليسيا دەپارتامەنتىنىڭ جەدەل-تەرگەۋ توپتارى جۇمىس ىستەپ جاتىر. قازىرگى ۋاقىتتا بارلىق قاجەتتى تەرگەۋ امالدارى جۇرگىزىلىپ جاتىر. 

"جومارت" كەنىشى - جەزقازعان قالاسىنان وڭتۇستىك-شىعىسقا قاراي 130 شاقىرىم جەردە ورنالاسقان. وندا مىس ءسۋلفيدى وندىرىلەدى. "قازاقمىس" كورپوراسياسىنىڭ ءىرى اكسيونەرى - Kazakhmys Copper.