اقپارات مينيسترلىگىنە قاراستى ءدىن ىستەرى كوميتەتىنىڭ دەرەگىنشە العاشقى 6 ايدا وسىنداي راديكالدى پابليكتەرگە تىركەلگەن 85 مىڭعا جۋىق ازامات رايىنان قايتىپ، ولارمەن جۇرگىزىلگەن جۇمىستىڭ ناتيجەسىندە ەل ىشىنە ىرىتكى سالاتىن توپتاردان شىققان.
بۇعان دەيىن ءبىزدىڭ پورتالعا پىكىر بىلدىرگەن ءدىن ىستەرى كوميتەتىنىڭ ءتوراعاسى ەرجان نۇكەجانوۆ مەكەمە ماماندارىنىڭ راديكالدى كونتەنتپەن كۇرەستى ۇدايى جۇرگىزەتىنىن مالىمدەگەن ەدى.
ونىڭ ايتۋىنشا وسى كۇنگە دەيىن ينتەرنەت كەڭىستىگىندە لاڭكەستەردىڭ يدەولوگياسىن ناسيحاتتاۋمەن اينالىسقان 80 مىڭعا جۋىق ەكسترەميستىك ماندەگى ماقالانىڭ كوزى جويىلىپ، 300-گە تارتا سايت ءبىرجولاتا بۇعاتتالعان.
ال الەۋمەتتىك جەلىنىڭ نەگىزگى اۋديتورياسى كىم؟ ارينە، جاستار. اتالعان اۋديتوريا راديكالدى ءدىني اعىمداردىڭ استامشىل ساياساتىنا توتەپ بەرۋ ءۇشىن – جاستاردىڭ ءدىني ساۋاتىن ارتتىرۋ اكتۋالدى ماسەلە.
وسىعان وراي Dalanewz.kz-كە پىكىر بىلدىرگەن بەلگىلى ءدىنتانۋشى سۇلتانگەلدى سارييەۆ كەيبىر جاستاردىڭ نەلىكتەن راديكالدى باعىتتاعى كونتەنتكە ءۇيىر كەلەتىنىن تۇسىندىرگەن ەدى.
ونىڭ ايتۋىنشا مۇنداي يدەولوگيانىڭ وكىلدەرى تۇرمىستان قىسىلعان، جوقشىلىقتان قاجىعان جاستارعا اۋىز سالادى.
"تۇپتەپ كەلگەندە، ماسەلە جاستاردىڭ جۇمىسپەن قامتىلۋىنا تىرەلىپ تۇر. 19-بەن 30-دىڭ اراسىنداعى جاستاردىڭ قانشا پايىزى جۇمىسسىز؟ بۇعان قاتىستى ستاتيستيكا قوعامداعى شىنايى جاعدايدى كورسەتە الماي وتىر. ەكى قولعا ءبىر كۇرە تابا الماي سەندەلىپ جۇرگەن جاستارىمىز قانشاما! راديكالدى توپتار ءبىرىنشى كەزەكتە وسىنداي اۋديتوريانى قاقپانىنا تۇسىرۋگە تىرىسادى. ۇيىپ-توگىپ ۋادە بەرىپ، ەگەر وسى اعىمنىڭ قۇندىلىقتارىن قابىلدار بولسا تۇرمىسىنىڭ تۇزەلەرىن ايتىپ، باسىن اينالدىرادى.
ادامدى يلاندىرۋ ءۇشىن قۇران جانە حاديستەردى تىلگە تيەك ەتىپ، ءالى دە بولسا بۇعاناسى بەكىمەگەن جاستىڭ سەنىمىنە كىرەدى. اشىعىن ايتقاندا، راديكالدى اعىمداردىڭ ارباۋىنا تۇسكەن ءىنى-قارىنداستاردى قوعامعا قايتا بەيىمدەۋ اۋىرعا سوعاتىن ءىس. سەبەبى، ۋىتتى ۋاعىز قان-تامىرىنا ارالاسىپ كەتكەن، ۇستازى نەنى بۇيىرسا، سونى بۇلجىتپاي ورىنداۋعا ساقاداي-ساي تۇرادى..."، – دەيدى ءدىنتانۋشى.
ساراپشى سايت تىلشىسىنە ءوزى كۋا بولعان جايتتى دا بايانداپ بەرگەن.
"30-دىڭ ۇستىندەگى ايەلى، بالا-شاعاسى بار ازامات ۇل-قىزىن مەكتەپكە بەرۋگە قارسى شىقتى ءبىر جىلدارى. ءان ساباعىنا قاتىسۋعا مۇلدە تىيىم سالدى. ءتىپتى، مەملەكەتتىك گيمندى ورىنداۋ مەن قولدى كەۋدە قويۋدى دىنگە قايشى دەپ داۋ كوتەردى. مۇنداي وتباسىدان شىققان ادام بالا جاسىنان پسيحولوگيالىق سوققىعا ۇشىرايدى. وتباسىندا العان تاربيە ساناسىنا ءسىڭىپ قالادى.
اينالىپ كەلگەندە، بۇل ءدىني ساۋاتسىزدىقتىڭ كورىنىسى. الەمجەلىدەگى دەسترۋكتيۆتى پابليكتەردىڭ كونتەنتىن قورىتپاي، تالعاۋسىز قابىلداي بەرگەننىڭ ناتيجەسى. بارىنەن بۇرىن اداسقان اتا-انانىڭ مەكتەپ جاسىنداعى بالالارىنا وبال"، – دەيدى سۇلتانگەلدى سارييەۆ.
...
ءبىزدىڭ بۇل ماسەلەنى كوتەرگەنىمىز بەكەر ەمەس. كۇنى كەشە ءدىن ىستەرى كوميتەتىنىڭ مۇرىندىق بولۋىمەن ءدىني ساۋاتىن ارتتىرعىسى كەلەتىن، ءدىن سالاسىندا وقىپ-توقىپ جۇرگەن جاستارمەن ءدىني پروبلەمالار توڭىرەگىندە تالقى قۇراتىن "YZ Club" ديسكۋسسيالىق كلۋبى اشىلدى.
بۇل ءدىني باعىتتا جاس اۋديتوريامەن ديالوگ قۇرۋ ماسەلەسى مەملەكەتتى دە مازالاپ وتىرعانىن كورسەتەدى. ءسوي دەگەن كوميتەت باسشىسى ەرجان نۇكەجانوۆ كلۋبتىڭ اشىلۋىنان بولەك، ءدىن سالاسىنداعى تاعى ءبىر وزەكتى ماسەلەنى ءسوز ەتتى. ونىڭ ايتۋىنشا ءدىندى تانىپ، بىلگىسى كەلەتىن جاستاردىڭ قاتارى ارتقان سايىن ءدىن سالاسىندا ساۋاتتى ۇگىت-ناسيحات جۇرگىزە الاتىن ماماندارعا سۇرانىس ارتادى.
"البەتتە، بۇل ماسەلە بىر-ەكى جىلدىڭ ىشىندە شەشىلەتىن شارۋا ەمەس. ايتسە دە كادر تاپشىلىعىن تۋىنداتپاۋعا كۇش سالۋدامىز. جىل سايىن يسلامتانۋ، ءدىنتانۋ نەگىزدەرىن وقىپ تاۋىسقان 500-گە جۋىق مامان ازىرلەنىپ، ەلىمىزدەگى ءدىني ورتالىقتار مەن باسقا دا ۇيىمدارعا جۇمىسقا ورنالاسۋدا"، – دەيدى ول.
وسىناۋ كلۋبتىڭ اشىلۋىنا ۇيىتقى بولعان كوميتەت بۇدان بىلاي جاس اۋديتوريامەن تۇراقتى بايلانىس ورناتۋدى جوسپارلاپ وتىر. بۇعان وسىناۋ ۇيىم وزىندىك وتكەل بولماق.
كلۋبتىڭ وتىرىسىندا قانداي ماسەلەلەر كوتەرىلەدى؟ ءدىن سالاسىنداعى وتكىر، وزەكتى ماسەلەلەر اشىق ايتىلا ما؟ سايتىمىزدىڭ ءتىلشىسى كوميتەت ءتوراعاسىنا ءدال وسى ساۋالدى قويعان ەدى.
نۇكەجانوۆتىڭ ناقتىلاپ وتكەنىندەي "YZ Club" ديسكۋسسيالىق كلۋبىنىڭ قۇرىلۋداعى ماقساتى – ءدىن سالاسىنداعى قانى سورعالاپ تۇرعان ماسەلەلەردى اشىق تالقىلاۋ. اسىرەسە، ءدىني ساۋاتىن ارتتىرعىسى كەلەتىن جاستار وسى كلۋبتىڭ وتىرىستارىنا قاتىسىپ، كوكەيىندەگى دۇنيەنى ورتاعا سالا الادى.
"اينالىپ كەلگەندە بارلىعى كونتەنت ماسەلەسىنە تىرەلىپ تۇر. اقپاراتتى الەمجەلىدەن، ينتەرنەت كەڭىستىگىنەن الاتىن جاستارعا دىنگە قاتىستى تولىققاندى ماعلۇمات بەرۋگە مىندەتتىمىز. ءدىني ساۋاتى جوعارى جاس ازامات الەۋمەتتىك جەلىدەگى الىپ-قاشپا اڭگىمەلەرگە، ءدىننىڭ توڭىرەگىندە تەرىس يدەولوگياعا الدانىپ قالمايدى. بارلىعىن تالعام تارازىسىنا سالادى"، – دەيدى ول.
ءدىن كوميتەتى جاستارعا ارنالعان ديسسكۋسسيالىق كلۋبتان بولەك، عالامتور كەڭىستىگىندە دە بەلسەندى جۇمىس جۇرگىزۋگە كوشپەك. نۇركەجانوۆتىڭ اتاپ وتكەنىندەي، وسى ماقساتتا حالىق تاراپىنان تۇسەتىن ءتۇرلى ساۋالدارعا دەر كەزىندە جاۋاپ بەرەتىن "ەلگە قىزمەت ماڭىزدى مىندەت" اتتى جوبانىڭ تۇساۋى كەسىلگەن.
جوبانىڭ ەرەكشەلىگى نەدە دەسەڭىز، ءدىن ماماندارى الەمجەلىدەگى ءتۇرلى پلافتورمالارعا تىركەلىپ، تىكەلەي ەفيردە ءدىننىڭ توڭىرەگىندەگى ماسەلەلەردى ءسوز ەتەدى، كوپشىلىكتى الاڭداتىپ وتىرعان ماسەلەلەرگە جاۋاپ بەرۋگە تىرىسادى.
انىقتاما:
كلۋبتىڭ اتاۋىنداعى باستاپقى ەكى ءارىپ جاستاردىڭ جاس ايىرماشىلىعىن بىلدىرەدى. Y بەلگىسى 1980-1998 جىلدار ارالىعىندا ومىرگە كەلگەن بۋىن، ال Z ءارپى 1998-2016 جىلدارى دۇنيە ەسىگىن اشقان ۇرپاقتىڭ تاڭباسى.
