ماقتاارال اۋدانى اكىمى باقىت اسانوۆ ءتوراعالىق ەتكەن جيىنعا اۋدان ارداگەرلەرى، قالا، كەنت، اۋىل اكىمدەرى، اۋداندىق ءماسليحات دەپۋتاتتارى، اۋداننىڭ قۇقىق قورعاۋ جانە اتقارۋشى ورگاندارى، اۋماقتىق باسقارما، ءبىلىم، مادەنيەت، دەنساۋلىق ساقتاۋ مەكەمەلەرىنىڭ باسشىلارى، ەتنو-مادەني ورتالىقتار، قوعامدىق جانە ۇكىمەتتىك ەمەس ۇيىم، زيالى قاۋىم، ب ا ق وكىلدەرى قاتىستى.
ءبىرىنشى بولىپ سوزگە شىققان وبلىس اكىمىنىڭ ورىنباسارى مەيىرجان ياباي ۇلى پرەزيدەنتتىڭ جولداۋىنداعى باسىم باعىتتار مەن مەجەلەنگەن جوسپارلاردى ورىنداۋ، دامىعان ەلدەردىڭ اراسىندا باسەكەلەستىككە قابىلەتتى بولۋ ماسەلەلەرىنە توقتالدى. سونىڭ ىشىندە، اسىرەسە، كاسىپكەرلىك، سالاۋاتتى ءومىر سالتىن ناسيحاتتاۋ، مادەنيەت، اۋىل شارۋاشىلىعى سالالارىندا اتقارىلعان جانە اتقارىلاتىن جۇمىستار جونىندە بايانداما جاسادى.
جيىن بارىسىندا بايانداما جاساعان وبلىستىق اقپاراتتىق-ناسيحاتتىق توپتىڭ مۇشەلەرى ەرجان پانوۆ پەن الماسبەك قوجاحمەت جاستارعا جولداۋدا جۇكتەلگەن نەگىزگى مىندەتتەر مەن اتقارىلار جۇمىستاردىڭ بارىسى، ءبىلىم ماسەلەلەرى تۋرالى كەڭىنەن ءتۇسىندىردى.
كەزدەسۋدى قورىتىندىلاعان اۋدان اكىمى باقىت ناسىرحان ۇلى جولداۋدا جۇكتەلگەن مىندەتتەردى ساپالى ورىنداپ، جۇزەگە اسىرۋدا ماقتاارالدىقتاردىڭ ايانىپ قالمايتىندىعىن ايتىپ، مەملەكەتتىك ساياساتتى اۋدان تۇرعىندارى ءارقاشان قولدايتىندىعىن جەتكىزدى.
– رەسپۋبليكا پرەزيدەنتىنىڭ قازاقستان حالقىنا جولداۋىندا قويىلعان جانە ودان تۋىندايتىن مىندەتتەردى ورىنداۋ جالعىز اتقارۋشى بيلىكتىڭ عانا ەمەس، بارلىق مەملەكەتتىك ورگانداردىڭ، مەنشىك تۇرىنە قاراماستان كاسىپورىنداردىڭ، مەكەمەلەردىڭ، ۇيىمداردىڭ، ءبىر سوزبەن ايتقاندا، بۇكىل جۇرتشىلىقتىڭ، بارلىعىمىزدىڭ ورتاق ءىسىمىز. ءاربىرىمىز ءوز ورنىمىزدا بەلسەندى ارەكەت جاساساق، ناقتى ءىس اتقارساق، جولداۋداعى مەجەلەر ەڭسەرىلەتىنى ءسوزسىز. مەن بارلىعىڭىزدى جولداۋدى ورىنداۋعا باعىتتالعان بەلسەندى ارەكەتتەر جاساۋعا شاقىرامىن! – دەدى اۋدان باسشىسى.
ايتا كەتەيىك، ماقتاارال اۋدانىندا 13 ارنايى ناسيحاتتىق توپ قۇرىلىپ، ولار اۋدانىمىزدىڭ بارلىق ەلدى مەكەندەرىندە تۇرعىندارمەن جۇزدەسىپ، جولداۋدىڭ ءمان-مازمۇنىن تۇسىندىرۋدە.
ماقتاارال اۋدانى اكىمىنىڭ باسپا ءسوز قىزمەتى
