ءيا، شىعىس قازاقستان وبلىسىندا دەنساۋلىق ساقتاۋ سالاسىنا ەرەكشە كوڭىل بولىنۋدە. سوڭعى ۇلگىدەگى مەديسينالىق قۇرال جابدىقتارمەن ەمدەۋ ورىندارىن جابدىقتاۋ جىل سايىن جۇزەگە اسىرىلۋدا.
اق حالاتتى ابزال جانداردىڭ بىلىكتىلىگىن ارتتىرۋعا ءجىتى نازار اۋدارىلىپ، وبلىستىڭ دارىگەرلەرى شەت ەلدىڭ بەلدى ەمحانالارىندا ءبىلىمىن جەتىلدىرىپ، ىس-تاجىريبەدەن، تاعىلىمدامادان ءوتتى. ءوز كەزەگىندە ولار العان ىلىمدەرىن، ايماققا كەلىپ، ەم-دوم جۇرگىزۋگە قولدانباق.
ماسەلەن مەديسينالىق كادرلاردى وقىتۋ باعدارلاماسى بويىنشا اعىمداعى جىلدىڭ باسىنان بەرى وبلىستىڭ 13 مەديسينا قىزمەتكەرى يزرايل مەن گەرمانيانىڭ ونكوگەماتولوگيا، گەماتولوگيا، كارديولوگيا، اكۋشەرلىك جانە گينەكولوگيا كلينيكالارىندا ءبىلىم الدى.
اعىمداعى جىلدىڭ سوڭىنا دەيىن 13 گەماتولوگ دارىگەر مەن 10 انەستەزيولوگ-رەانيماتولوگتى وقىتۋ جوسپارلانىپ وتىر.
كەلەر 2023 جىلى يزرايل، گەرمانيا جانە رەسەي فەدەراسياسىنىڭ جەتەكشى كلينيكالارىندا ونكولوگيا، نەيروحيرۋرگيا، كارديوحيرۋرگيا، تراۆماتولوگيا-ورتوپەديا، نەوناتولوگيا باعىتتارى بويىنشا 15 ماماندى شەتەلدە وقىتۋ جوسپارلانىپ وتىر. وقۋ مەرزىمى 3 اي.
وسىلايشا دەنساۋلىق سالاسىندا بىلىكتى مامانداردىڭ سانىن ارتتىرۋ كوزدەلىنۋدە.
جانە اۋىلدىق جەرگە كەلگەن دارىگەرلەرگە دە ەرەكشە كوڭىل ءبولىنىپ وتىر. سەگىز مامانعا كوتەرمە قاراجات، ەكەۋىنە تۇرعىن ءۇي ساتىپ الۋ ءۇشىن جەڭىلدىكپەن كرەديت بەرۋ جانە 5 مامانعا قىزمەتتىك پاتەر بەرىلدى. بۇل ءوز كەزەگىندە اق حالاتتى ابزال جانداردىڭ الاڭسىز جۇمىس ىستەۋىنە سەپ بولماق.
ءيا، ەلىمىزدە شىعىس قازاقستان وبلىسى دەنساۋلىق ساقتاۋ جۇيەسىن دامىتۋعا، مەديسينالىق قۇرال جابدىقتارمەن اۋرۋحانالاردى قامتۋ جاعىنان الدىڭعى ورىندا.
ماسەلەن وبلىستاعى دەنساۋلىق ساقتاۋ جۇيەسىن دامىتۋ ماقساتىندا جالپى سوماسى 2 438 646 مىڭ تەڭگە كولەمىندە مەديسينالىق جابدىقتار الىندى.
اتاپ ايتساق 8 رەنتگەن اپپاراتى، 2 فليۋوروگراف، 3 مامموگراف، وتورينولارينگولوگيالىق وپەراسيالارعا ارنالعان ءموبيلدى ميكروسكوپ الىندى.
سونداي-اق اۋداندىق اۋرۋحانالاردىڭ 119 پەرزەنتحانا بولىمشەلەرىن 451 092،8 مىڭ تەڭگە سوماسىنا قاجەتتى مەديسينالىق جابدىقتار الىندى.
ال شىعىس قازاقستان وبلىسى بويىنشا دەنساۋلىق ساقتاۋ وبەكتىلەرىن سالۋعا 2022 جىلعا 22 496 150،0 مىڭ تەڭگە ءبولىندى. 5 نىساننىڭ قۇرىلىسى جانە 2 وبەكتىنىڭ جوبالاۋ-سمەتالىق قۇجاتتاماسى ازىرلەنىپ جاتىر.
وسكەمەن قالاسىندا گەماتولوگيا ورتالىعىنىڭ قۇرىلىسى جالعاسۋدا، شقو دسب "شىعىس قازاقستان وبلىستىق مامانداندىرىلعان مەديسينالىق ورتالىعى" شجق كمك قابىلداۋ-دياگنوستيكالىق بولىمشەسىن جاڭعىرتۋعا، ريددەر قالاسىندا ءبىر اۋىسىمدا 140 ورىندىق ستاسيونار جانە 500 ادام قابىلدايتىن ەمحاناسى بار كوپ بەيىندى اۋرۋحانا كەشەنىن سالۋ، شقو كۇرشىم اۋدانى قالجىر اۋىلىندا "اۋىل-ەل بەسىگى" باعدارلاماسى اياسىندا 20 كەلۋشىگە ارنالعان دارىگەرلىك امبۋلاتوريا جانە 5 ورىندىق كۇندىزگى ستاسيونار سالۋ جوسپارلانىپ وتىر.
بۇل ءبىر عانا دەنساۋلىق ساقتاۋ سالاسىندا اتقارىلىپ جاتقان جۇمىستار.
