مەملەكەت باسشىسى قاسىم-جومارت توقايەۆ ءوز «ادىلەتتى قازاقستاننىڭ ەكونوميكالىق باعدارى» اتتى قازاقستان حالقىنا جولداۋىندا ۇكىمەتكە مەملەكەتتىك ساتىپ الۋ جۇيەسىن جەتىلدىرۋدى تاپسىرعان بولاتىن. پرەزيدەنت جولداۋدا «مەن مەملەكەتتىك ساتىپ الۋدىڭ ساپالى جاڭا جۇيەسىن ەنگىزۋدى تاپسىردىم. ساتىپ الۋ ۇدەرىسى وڭتايلانىپ، قىسقارتىلادى، «باعا ەمەس، ساپا» قاعيداتىنا باسىمدىق بەرىلەدى، ياعني، دەمپينگكە ءتيىمدى توسقاۋىل قويىلادى جانە ۇدەرىستەر تولىق اۆتوماتتاندىرىلادى. مەملەكەتتىك ساتىپ الۋ جۇيەسىنە العاش رەت «باسىنان باقايشاعىنا دەيىن» جاساۋ ءتاسىلى ەنگىزىلەدى» دەپ ناقتى تاپسىرما بەرگەن ەدى. پرەزيدەنت تاپسىرماسى قالاي ىسكە اسۋدا دەگەن زاڭدى سۇراق تۋىندايدى.
Dalanews.kz اقپاراتتىق اگەنتتىگى بۇل ماسەلەگە زەرتتەۋ جۇرگىزىپ، جولداۋدا اتاپ كورسەتىلگەن ماسەلەلەردى كوبى جۇزەگە اسقانىنا كوز جەتكىزدى. بۇل رەتتە ق ر قارجى مينيسترلىگى پرەزيدەنت تاپسىرمانى ءتيىستى دەگەيدە جۇزەگە اسىرىپ، ارنايى زاڭ دايىنداپ، وعان مەملەكەت باسشىسىنىڭ ءوزى قول قويدى.
ماماندار جاڭا زاڭنىڭ نەگىزگى ماقساتى – ساتىپ الىناتىن تاۋارلاردىڭ، جۇمىستار مەن كورسەتىلەتىن قىزمەتتەردىڭ ساپاسىن ارتتىرۋدى كوزدەيتىنىن ايتۋدا.
جاڭا زاڭنامادا ناقتى تومەندەگىدەي شارالار قامتىلعان.
مەملەكەتتىك ساتىپ الۋعا قاتىسۋعا بايلانىستى شەكتەۋلەر تىزبەسىن كەڭەيتۋ (جوسىقسىز ءونىم جەتكىزۋشىلەردى ساتىپ الۋعا جول بەرمەۋ ماقساتىندا)؛
جەتكىزۋشىگە قويىلاتىن جاڭا بىلىكتىلىك تالاپتارى (جۇمىستاردى ورىنداۋ/قىزمەت كورسەتۋ ورنى بويىنشا ماتەريالدىق/ەڭبەك رەسۋرستارىنىڭ بولۋى، قىزمەتكەرلەر الدىندا جالاقى تولەۋدە بەرەشەكتىڭ بولماۋى جانە ت. ب.)؛
شارتتىڭ ورىندالۋىن قامتاماسىز ەتۋ مولشەرىن ۇلعايتۋ (شارتتىق مىندەتتەمەلەر تيىسىنشە ورىندالماعان جاعدايدا تاپسىرىس بەرۋشى ۇستاپ قالادى)؛
قوعامدىق مونيتورينگتى ەنگىزۋ؛
شاعىم بەرۋ ءتارتىبىن قايتا قاراۋ؛
ساتىپ الۋ راسىمدەرىن وڭتايلاندىرۋ جانە قىسقارتۋ؛
ساتىپ الۋدا تاۋارلاردىڭ فيرمالىق اتاۋلارىن 1000 اەك دەيىن كورسەتۋ مۇمكىندىگى؛
100 اەك-كە دەيىنگى تاۋارلاردى، جۇمىستار مەن كورسەتىلەتىن قىزمەتتەردى 500 اەك-كە دەيىن، اۋىل اكىمدىكتەرى ءۇشىن تاۋارلاردى، جۇمىستار مەن كورسەتىلەتىن قىزمەتتەردى 4000 اەك-كە دەيىن ءبىر كوزدەن ساتىپ الۋ؛
ساتىپ الۋ بويىنشا ءبىرىڭعاي پلاتفورما قۇرۋ.
وسى رەتەت زاڭ باستان اياق جاساۋ تەتىكتەرىن ەنگىزۋگە قاتىستى نورمالارمەن تولىقتىرىلعانىن (EPC-كەلىسىمشارتتار) ايتا كەتۋىمىز كەرەك.
سونداي-اق. سىبايلاس جەمقورلىق ءقاۋپىن ازايتۋ جانە راسىمدەردى اۆتوماتتاندىرۋ ماقساتىندا 2022 جىلدان باستاپ رەيتينگتىك-بالدىق جۇيەنى پايدالانىپ، كونكۋرس تۇرىندە ساتىپ الۋدىڭ جاڭا ءتاسىلى ەنگىزىلمەكشى.
بۇل ءادىس كونكۋرستىق كوميسسيانىڭ قاتىسۋىن بولدىرمايدى، سونىمەن قاتار جەڭىمپازدى مەملەكەتتىك ورگانداردىڭ اقپاراتتىق جۇيەلەرىنىڭ دەرەكتەرى نەگىزىندە پورتال اۆتوماتتى تۇردە ايقىندايدى.
جەڭىمپازدى اۆتوماتتى تۇردە انىقتاۋدى ەسكەرە وتىرىپ، مۇنداي ساتىپ الۋلاردىڭ قورىتىندىلارى شاعىمدانۋعا جاتپايدى.
2023 جىلعى 1 قىركۇيەكتەن باستاپ قۇرىلىس-مونتاجداۋ جۇمىستارى مەن جوبالاۋ تەك قانا رەيتينگتىك-بالدىق جۇيەنى پايدالانىلاتىن كونكۋرسپەن ساتىپ الىنادى. ال 2024 جىلعى 1 اقپانىنان باستاپ تەحنيكالىق قاداعالاۋ قىزمەتتەرىن ساتىپ الۋ دا وسى ادىسكە كوشپەكشى.
جالپى، بارلىق ساتىپ الۋلاردى رەيتينگتىك-بالدىق جۇيەنى پايدالانىلاتىن كونكۋرسقا بارىنشا كوشىرۋ جوسپارلانىپ وتىر.
جاڭا زاڭعا سايكەس قوعامدىق باقىلاۋ سۋبەكتىلەرى ۆەب-پورتال ارقىلى جانە ونداعى اقپارات نەگىزىندە «قوعامدىق باقىلاۋ تۋرالى» قازاقستان رەسپۋبليكاسىنىڭ زاڭىنا سايكەس مەملەكەتتىك ساتىپ الۋعا قوعامدىق مونيتورينگ جۇرگىزە الادى.
ال وتاندىق ءوندىرىستى قولداۋ ماقساتىندا وتاندىق شاعىن جانە ورتا كاسىپكەرلىك سۋبەكتىلەرىنەن عانا ساتىپ الىناتىن تاۋارلاردىڭ، جۇمىستار مەن كورسەتىلەتىن قىزمەتتەردىڭ تىزبەسى جانە وفتەيك-كەلىسىمشارتتاردى قولدانا وتىرىپ، تاۋارلاردى كەپىلدى ساتىپ الۋ تەتىگى ەنگىزىلدى.
