قازاقستاندا اۆتوموبيل جولدارىنىڭ بارلىق كەزەڭىن قامتىعان سىبايلاس جەمقورلىق تاۋەكەلدەرىنە سىرتقى كەشەندى تالداۋ جۇرگىزىلدى، دەپ حابارلايدى Dala News.
ساراپتاما ناتيجەسىندە جولداردى جوسپارلاۋ، سالۋ جانە تەحنيكالىق قاداعالاۋ جۇيەسىندەگى جۇيەلى كەمشىلىكتەردى جويۋعا باعىتتالعان 80-نەن استام ۇسىنىس ازىرلەندى.
تەكسەرۋ بارىسىندا وڭىرلەردە جوبالاردىڭ سمەتالىق قۇنى 11 ملرد تەڭگەگە نەگىزسىز وسىرىلگەنى انىقتالعان.
سونىمەن قاتار، 362 ەسكىرگەن جوبالىق-سمەتالىق قۇجاتتاما (جسق) انىقتالىپ، ولاردى ازىرلەۋگە 23 ملرد تەڭگە ءتيىمسىز جۇمسالعان. بۇدان بولەك، 27 ملرد تەڭگەنىڭ 324 نىسانى مىندەتتى مەملەكەتتىك ساراپتامادان وتپەگەنى بەلگىلى بولدى.
سونداي-اق 70 كومپانيانىڭ جۇمىس تاجىريبەسى تۋرالى جالعان مالىمەتتەر ۇسىنۋ ارقىلى شامامەن 408 ملرد تەڭگەنىڭ كەلىسىمشارتتارىن العانى تىركەلگەن.
اتالعان ۇسىنىستاردى ورىنداۋ اياسىندا «سىبايلاس جەمقورلىققا قارسى ءىس-قيمىل تۋرالى» زاڭعا وزگەرىستەر ەنگىزىلدى. ەندى اۆتوموبيل جولدارى نىساندارىندا تەحنيكالىق جانە اۆتورلىق قاداعالاۋ جۇرگىزەتىن تۇلعالار مەملەكەتتىك فۋنكسيالاردى ورىندايتىن ادامدارعا تەڭەستىرىلدى.
سونىمەن قاتار ۇلتتىق جول اكتيۆتەرى ساپاسى ورتالىعىنىڭ ەسكەرتۋلەرى جويىلمايىنشا، جولداردى پايدالانۋعا بەرۋگە تىكەلەي تىيىم سالىندى.
جول سالاسىن سيفرلاندىرۋ ماقساتىندا جول-قۇرىلىس ماتەريالدارىنىڭ ءبىرىڭعاي اقپاراتتىق بازاسى ەنگىزىلدى. بۇل جۇيە كارەردەن باستاپ زەرتحانالىق سىناق ناتيجەلەرىنە دەيىنگى مالىمەتتەردى اشىق كورسەتىپ، ءونىم ساپاسى تۋرالى اقپاراتتى بۇرمالاۋ تاۋەكەلىن ازايتادى.
جۇرگىزىلگەن رەفورمالار 2026 جىلى جول سالاسىنا بولىنەتىن 360 ملرد تەڭگەدەن استام بيۋدجەت قاراجاتىنىڭ اشىق ءارى ءتيىمدى يگەرىلۋىن قامتاماسىز ەتۋگە باعىتتالعان.
