اتىراۋ وبلىسىندا جوعالىپ كەتكەن وتباسى تۋرالى تىڭ دەرەك شىقتى، دەپ حابارلايدى Dalanews.kz.
جۋرناليست گۇلميرا ءابىقاي الەۋمەتتىك جەلىدەگى پاراقشاسىندا ەگجەي-تەگجەيىن جاريالادى.
"اتىراۋ وبلىسىندا ۇشتى-كۇيلى جوعالعان وتباسى جايلى كۇن سايىن ءتۇرلى دەرەك كەلىپ جاتىر. وزگە ەمەس، ءوز تۋىستارىنىڭ سوزىنە سەنسەك، ءىز-تۇسسىز عايىپ بولعاندار تورتەۋ ەمەس، التى ادام. ماقسوت اعامىزدىڭ 2 قىز، 1 ۇلى بار. الدىمەن، اقتاۋدان جۇمىس تاپتىم دەپ جالعىز ۇلى ناۋىز حابارسىز كەتەدى. "جاز باسىندا جوعالعان ناۋرىزدىڭ ۆاتسابى كەشەگە دەيىن ىسكە قوسىلىپ ءتۇرعان" دەيدى ماقسوتتىڭ قارىنداسى ءاسيلا. پوليسيا "ۆاتساپ تەلەفوننان ەمەس، كومپيۋتەردەن قوسىلىپ تۇرعاندىقتان ابونەنتتىڭ مەكەن-جايىن تابۋ قيىندىق تۋدىرعانىن" ايتقان. قاراشانىڭ باسىندا "دارىگەرگە قارالىپ كەلەمىز" دەپ سىبىس تاراتقان وتباسى سول كۇيى ۇيگە قايتا ورالماعان. ۇيلەرى جيناقى، ءبارى ورنىندا. مالى قورادا، توڭازىتقىشتاعى ءسۇت-مايلارى ساقتاۋلى تۇر"، - دەپ جازدى جۋرناليست.
سونىمەن قاتار، جوعالعان التى ادامنىڭ ەكەۋى كىم ەكەنى دە بەلگىلى بولدى.
"ماقسوت اعامىزدىڭ 2 قىزىنىڭ ۇلكەنى ميرامگۇل وزدەرىمەن بىرگە ۇشتى-كۇيلى جوق، ەكىنشى قىزى تۇرمىستا باسقا اۋىلدا تۇرادى. "اقبايان دا كۇيەۋى سۇلتانمەن بىرگە 5 قاراشا جولعا شىعىپ، سول كۇيى ۇيىنە ورالماعان. ەكەۋىنىڭ 5 بالاسىن كۇندە ەسىككە ەلەڭدەپ ەنەسى قاراپ وتىر" دەيدى ءاسيلا. جوعالعان وتباسىنىڭ ەكى مۇشەسى - زەينەتكەر، ەكەۋى مۇگەدەكتىگى بويىنشا جاردەماقى الادى. ەڭ قىزىعى، قاراشا-جەلتوقسان ايلارىنداعى پەنسيالارىن تورتەۋى تۇگەل شەشىپ الىپتى. اۋلاداعى ازىن-اۋلاق مالدارى دا ناۋرىزدىڭ ۆاتسابى ارقىلى ساۋدالانعان"، - دەپ جازدى ول.
ەسكە سالايىق، بۇعان دەيىن اتىراۋ وبلىسىندا ءبىر وتباسى ىزدەستىرىلىپ جاتقانى حابارلاندى.
