ماڭعىستاۋ وبلىسىنىڭ اكىمدىگى مەن Yessenov University ۇيىمداستىرعان شاراعا ءوڭىر باسشىسى نۇرلان نوعايەۆ، ۇستازدار، پروفەسسورلار، مادەنيەت جانە ونەر سالاسىنىڭ وكىلدەرى، ستۋدەنتتەر قاتىستى.
جيىندا تاريح عىلىمدارىنىڭ دوكتورى، پروفەسسور، «ارداگەرلەر ۇيىمى» رەسپۋبليكالىق قوعامدىق بىرلەستىگى ءتوراعاسىنىڭ ءبىرىنشى ورىنباسارى ءومىرزاق وزعانبايەۆ قاشاعان اقىن كۇرجىمان ۇلىنىڭ شىعارماشىلىعىنا توقتالدى.
سونىمەن قاتار قاشاعان كۇرجىمان ۇلىنىڭ اتالاس ۇرپاعى، ماڭعىستاۋ وبلىسى مەن قاراقيا اۋدانىنىڭ قۇرمەتتى ازاماتى، «قۇرمەتتى ق ر جەر قويناۋىن بارلاۋشى» تۇرسىنعالي كوشەنوۆ اقىن تۋرالى ەستەلىكتەرمەن ءبولىستى.
قاشاعان كۇرجىمان ۇلى ءوز زامانىندا ەلدىك پەن ەرلىكتى، حالىقتىڭ داستاندارىن، كونە تاريحىن دارىپتەگەن جىراۋ، حالىق اقىنى.
شەجىرە مەن ەستەلىككە تولى كەشتە تۇرسىنعالي كوشەنوۆ پەن اقىن سۆەتقالي نۇرجان جاڭا كىتاپ «جىر جۇيرىگى – قاشاعان» اتتى اكادەميالىق جيناقتىڭ تۇساۋىن كەستى.
جاڭا جيناق الماتىداعى «قازاق كىتابى» باسپاسىنان 2000 دانامەن باسىلىپ شىققان. كىتاپتتى ەسەنوۆ ۋنيۆەرسيتەتىنىڭ اعا وقىتۋشىسى، قازاق ءتىلى مەن ادەبيەتى ماگيسترى، PhD دوكتورانت، قازاقستان جۋرناليستەر وداعىنىڭ مۇشەسى باقتىباي جايلاۋوۆ قۇراستىرعان.
سالتاناتتى شارادا سياسى كەۋىپ ۇلگەرمەگەن كىتاپتىڭ العاشقى دانالارى قۇرمەتتى قوناقتارعا تاراتىلدى.
– 180 جىل بويى حالىقتىڭ ءۇنى بولعان اقىننىڭ ولەڭدەرى – ءوز زامانىندا دا، ءقازىر دە زور ماڭىزعا يە. اقىن شىعارمالارىنىڭ ءمان-ماعىناسى كۇنى بۇگىنگە دەيىن وزەكتى، سونىمەن قاتار كوپتەگەن جىرشىلار مەن انشىلەردىڭ شىعارمالارىنا ارقاۋ بولىپ وتىر. بۇل– ۇرپاقتار ساباقتاستىعى. ءار كەز قازاق حالقىنىڭ ۇلى اقىندارىنىڭ شىعارماشىلىق كەشتەرىن ۇيىمداستىرۋ – ولاردىڭ ەسىمىن ۇلىقتاۋعا، جاستاردىڭ تاريحقا دەگەن سۇيىسپەنشىلىگىن ارتتىرۋعا مۇمكىندىك بەرەدى، – دەدى نۇرلان نوعايەۆ.
شارا سوڭىندا قالامگەرلەر سابىر اداي مەن سۆەتقالي نۇرجان جانە ارداگەر ءومىرزاق وزعانبايەۆقا «Yessenov University قۇرمەتتى پروفەسسورى» اكادەميالىق اتاعى سالتاناتتى تۇردە تابىستالدى.
