قارجىلىق مونيتورينگ اگەنتتىگى جىل باسىنان بەرى قازاقستان اۋماعىندا اينالىمنان 1 060 جالعان بانكنوت تاركىلەنگەنىن مالىمدەدى، دەپ حابارلايدى Dalanews.kz.
ونىڭ ىشىندە:
- ۇلتتىق ۆاليۋتادا 647 100 تەڭگە سوماسىنا 141 كۋپيۋرا،
- 90 400 اقش دوللارىنا 905 كۋپيۋرا،
- 2 000 ەۋروعا 4 كۋپيۋرا،
- 1 000 يۋان سوماسىنا 10 كۋپيۋرا انىقتالدى.
تاركىلەنگەن جالعان بانكنوتتاردىڭ جالپى قۇنى 43 ملن تەڭگەدەن اسادى.
سونداي-اق قارجىلىق مونيتورينگ اگەنتتىگى (قما) الماتىدا ءىرى كولەمدەگى جالعان 100 دوللارلىق كۋپيۋرالاردى وتكىزۋ فاكتىسىن انىقتادى.
"ءبىر توپ ادام جالعان كۋپيۋرالاردى وتكىزۋ ارەكەتى كەزىندە ۇستالدى. الماتىنىڭ ەكى تۇرعىنى كريپتوۆاليۋتا ساتىپ الۋ جەلەۋىمەن جالپى سوماسى 32 700 اقش دوللارىن قۇرايتىن جالعان شەتەلدىك كۋپيۋرانى بىرنەشە رەت ساتقان. سوت ۇكىمىمەن ءىستىڭ ەكى قاتىسۋشىسى كىنالى دەپ تانىلىپ، ولارعا 5 جىلدان 5،5 جىلعا دەيىنگى مەرزىمگە باس بوستاندىعىنان ايىرۋ جازاسى تاعايىندالدى"، - دەيدى ق ر قما رەسمي وكىلى الىبەك ءابدىلوۆ.
سونداي-اق، ەل ازاماتتارىنان قولما-قول اقشا اينالىمىمەن بايلانىستى ازاماتتار مەن قارجىلىق مونيتورينگ سۋبەكتىلەرىنەن (ەدب، ايىرباستاۋ پۋنكتتەرى، لومباردتار جانە ت.ب.) جالعان بانكنوتتار تابىلعان جاعدايدا دەرەۋ قما-نىڭ اۋماقتىق دەپارتامەنتتەرىنە حابارلاۋ سۇرالادى، انونيمدىلىككە كەپىلدىك بەرىلەدى.
"جالپى، 2024 جىلى جالعان كۋپيۋرالاردى جاساپ، وتكىزگەنى ءۇشىن 8 ادام 5 جىلدان 6 جىلعا دەيىنگى مەرزىمگە باس بوستاندىعىنان ايىرىلدى"، دەلىنگەن 7 قازاندا قما جاريالاعان حابارلامادا.
