16 قاباتتى الىپ عيماراتقا ورنالاسقان IT-پارك 360 شارشى/مەتر اۋماقتى الىپ جاتىر. مۇندا فابلاب، وقۋ كلاسى جانە كىتاپحانا جۇمىس ىستەيدى. بولمەلەر كەڭ ءارى جارىق. جاستاردىڭ الاڭسىز ءبىلىم الۋىنا بارلىق جاعداي جاسالعان.
جاڭا نىساننىڭ اشىلۋ سالتاناتىندا ءسوز العان اماندىق باتالوۆ IT-پاركتىڭ اشىلۋى جەدەل سيفرلاندىرۋ ءىسىن قولعا العان وبلىس ءۇشىن اسا ماڭىزدى شارا ەكەنىن تىلگە تيەك ەتتى.
– مەن مۇنداي تەحنوپاركتى ەڭ العاش رەت قازان قالاسىنا جۇمىس ساپارىمەن بارعانىمدا كورگەن ەدىم. ەندى مىنە، جەتىسۋ جەرىندە دارىندى جاستاردىڭ باستاماسىمەن زاماناۋي تەحنوپاركتى اشىپ وتىرمىز. جاستار ۇسىنىس ايتقاندا بىزدەر ارنايى ورىن ۇسىندىق، جالىندى جاستار بولسا قىسقا مەرزىم ىشىندە تەحنوپاركتى جابدىقتادى. وسىلايشا، اكىمدىك پەن جاس تالانتتار تىزە قوسىپ قالامىزدا جاستارعا IT تەحنولوگيانىڭ قىر-سىرىن ۇيرەتەتىن ورتالىق اشىلدى. بۇل تالدىقورعاندىق جاستار ءۇشىن ۇلكەن مۇمكىندىك. قالامىزدا يدەياسى بار جاستار كوپ. ءبىراق ولار IT سالاسىنداعى ويلارىن ىسكە اسىرۋ ءۇشىن ءتۇرلى قۇرال-جابدىقتارعا قول جەتكىزە الماي جۇرگەنى جاسىرىن ەمەس. ەندىگى جەردە جاستارىمىز IT-پارككە كەلىپ، مۇنداعى زاماناۋي جابدىقتاردى پايدالانىپ، كوكەيدە جۇرگەن يدەيالارىن تولىقتاي ىسكە اسىرىپ، وزدەرىنىڭ ارمان-ماقساتتارىن ۇشتايتىن بولادى. الداعى ۋاقىتتا جاستار جاڭا تەحنولوگيالاردىڭ قىر-سىرىن مەڭگەرىپ، ۇلكەن جەتىستىكتەرگە جەتەتىنىنە سەنىمدىمىن. ءبىز زامان كوشىنەن قالماي، العا قادام باسۋىمىز كەرەك. ءقازىر بۇكىل الەم سيفرلاندىرۋ تەحنولوگياسىنا كوشىپ جاتىر. ەستەرىڭىزدە شىعار، بۇرىندارى تالدىقورعان كوشەلەرىندە بار بولعانى جيىرماعا جۋىق بەينەباقىلاۋ كامەراسى جۇمىس ىستەيتىن-دى. ال ءقازىر ولاردىڭ سانى توعىز جۇزدەن اسادى. بىزدەر الداعى ۋاقىتتا مۇنىمەن شەكتەلمەيمىز. بىزدەر تالدىقورعان قالاسىن «Smart cityگە» اينالدىراتىن بولامىز. وعان جاستار دا ءوز ۇلەسىن قوساتىنىنا سەنىمدىمىن. قالاداعى سيفرلاندىرۋ ءىسىن قارقىندى جۇرگىزۋ ءۇشىن ينتەرنەت كوللەدج سالۋدى جوسپارلاپ وتىرمىز. مۇنىڭ ءبارى بولاشاق ۇرپاقتىڭ قامى ءۇشىن قولعا الىنىپ جاتقان تىرلىكتەر. سول سەبەپتى «Jetysý Hub» تەحنوپاركى الداعى ۋاقىتتا وبلىسىمىزدا IT سالاسىن وركەندەتۋدە كوشباسشى ورتالىققا اينالاتىنى انىق، – دەپ وبلىس اكىمى جاستارعا اقجارما تىلەگىن ارنادى.
«Jetysý Hub» تەحنوپاركتىڭ روبوتوتەحنيكا، ۆوركشوپ، 3D مودەلدەۋ جانە كۆانتوريۋم كابينەتتەرى ءقازىردىڭ وزىندە وقۋشىلار مەن ستۋدەنتتەرگە لىقا تولى. جاستاردىڭ ءبارى كومپيۋتەردىڭ كومەگىمەن وزدەرىنىڭ ويىنداعى ىستەرىن جۇزەگە اسىرۋدا. ولاردى اڭگىمەگە تارتقانىمىزدا جاستار بوس ۋاقىتتارىن «Jetysý Hub» تەحنوپاركىندە وتكىزۋدىڭ وتە پايدالى ەكەنىن ايتتى.
جيىن بارىسىندا «Jetysý Hub» تەحنوپاركىن ۇيىمداستىرۋشىلار فابلاب بولمەسىندە وبلىس باسشىسىنا ەنەرگيا ۇنەمدەگىش شامداردى كورسەتىپ، ونى حالىقتىڭ جاپپاي تۇتىنۋىنىڭ ماڭىزى جايىندا ايتىپ بەردى.
سونداي-اق تالدىقورعان قالاسىنىڭ تۇرعىندارى بۇل جەردە كاسىپكەرلىكتىڭ قىر-سىرىن مەڭگەرىپ، زاڭ مەن بۋحگالتەرلىك سالا بويىنشا بىلىكتىلىگىن جەتىلدىرۋگە بولادى. مۇنداعى ماماندار تەحنوپارككە كەلۋشىلەرگە ءبارىن ءتۇسىندىرىپ، بارىنشا كومەك كورسەتەدى.
سونىمەن قاتار «Jetysý Hub» تەحنوپاركىندە تالانتتى جاستار وزدەرىنىڭ جوبالارىن تانىستىرىپ، قالالىق جانە رەسپۋبليكالىق دەڭگەيدە كونفەرەنسيالار ۇيىمداستىرۋىنا بارلىق مۇمكىندىك قاراستىرىلعان.
«Jetysý Hub» تەحنوپاركى الداعى ۋاقىتتا جاستاردىڭ ەكولوگيا جانە الەۋمەتتىك سالا بويىنشا ءتۇرلى جوبالارىن دايىنداپ، اينالاسىنا پايداسىن تيگىزۋگە باعىتتاۋدى الدارىنا ماقسات ەتىپ قويىپ وتىر.
اينۇر جۇماحان
