مۇگەدەكتەرگە ارنالعان وبلىستىق مامانداندىرىلعان سپورت مەكتەبىندە جالپى سانى 753 كەمباعالى سپورتشى بار. ولار، جەڭىل اتلەتيكا، ءجۇزۋ، ۇستەل تەنيسى، ساداق اتۋ، شاڭعى جارىسى، اربامەن بيلەۋ، فۋتبو، شاحمات، دويبى، ەركىن كۇرەس، ارمرەستلينگ، كاراتە سىندى ءتۇرلى سپورت تۇرلەرىمەن شۇعىلدانادى.
ومىرگە دەگەن قۇشتارلىقتارى باسىم، ەرىك-جىگەرى تاسىپ تۇرعان سايىپ قىران قىز-جىگىتتەردى 48 جاتتىقتىرۋشى باپتايدى. توگىلگەن تەر مەن ەسىل ەڭبەكتىڭ زايا كەتكەن تۇسى بولماسا كەرەك، وعان دالەل اتالعان مەكەمەنىڭ ۇلاندارىنىڭ ىشىندە 1 - سپورتشى «ق ر ەڭبەك سىڭىرگەن سپورت شەبەرى»، 33ء-ى «حالىقارالىق دارەجەدەگى سپورت شەبەرى»، 26-سى «ق ر سپورت شەبەرى»، 92ء-سى «ق ر سپورت شەبەرىنە» ۇمىتكەر، 100-دەن استام ممۇشەسى 1ء-شى سپورتتىق رازريادقا يە بولعان جايى بار.
سونىمەن قاتار، سان الۋان سپورت تۇرلەرى بويىنشا قازاقستان ۇلتتىق قۇراماسىنا الماتى وبلىسىندا 112 مۇمكىندىگى شەكتەۋلى سپورتشى مۇشەلىكتە ەكەنىن اتاپ وتكەن ءجون.
«جۇزدەن جۇيرىك، مىڭنان تۇلپار» شىعىپ جۇرگەن قايسار جانداردىڭ جەتىستىگى مۇنىمەن تولاستار ەمەس. تاعدىردىڭ سىيىنا توسىلماي، سىناعىنا سىنباعان اردا ازاماتتار 2011 جىلدان باستاپ قازاقستان رەسپۋبليكاسىنىڭ چەمپيوناتتارىندا، قازاقستان رەسپۋبليكاسىنىڭ كۋبوكتارىندا، پاراليمپيادالىق ويىنداردا، قازاقستان رەسپۋبليكاسىنىڭ سپارتاكياداسىندا جانە حالىقارالىق جارىستاردا، تۋرنيرلەردە 2011 جىلدان 2019 جىلعا دەيىن 430 التىن، 330 كۇمىس جانە 236 قولا مەدال جەڭىپ العان. 2020 جىلدىڭ قورىتىندىسى بويىنشا بارلىعى: التىن – 23 مەدال، كۇمىس – 14 مەدال، قولا – 20 مەدالدى قانجىعالارىنا بايلاعان.
بايراقتى باسەكەلەردە توپ جارىپ جۇرگەندەردىڭ ءبىرى زاحار بۋيموۆ مەن ماكسيم تەن. قوس ساڭلاق، 2020 جىلدىڭ 20-23 اقپانىندا مانچەستەر قالاسىندا جاستار اراسىنداعى پاۋەرليفتينگتەن الەم كۋبوگىندا 1 ورىنعا تۇراقتاعان.
نەگىزىنەن الماتى وبلىسىنىڭ مۇمكىندىگى شەكتەۋلى سپورتشىلارى 2016 جىلى 6 حالىقارالىق جانە 26 رەسپۋبليكالىق، 2017 جىلى 10 حالىقارالىق جانە 34 رەسپۋبليكالىق جارىستاردا باعىن سىناپ كورگەن. بۇل دا ءوز كەزەگىندە تولايىم تابىستاردىڭ ۇزدىك باستاماسى بولدى دەپ اۋىز تولتىرىپ ايتۋعا تۇرارلىق ءىس.
مويىندارىنا تاققان جۇلدەدەرى، ەل قورجىنىنا تۇسكەن مەدالدارى تەك سان ءۇشىن قىزمەت ەتىپ قويعان جوق. ەرەكشە قابىلەتكە يە جانداردىڭ ەرلىكتەرى وبلىس اكىمى اماندىق عابباس ۇلىنىڭ اركەز نازارىندا.
ماسەلەن، 2017 جىلى سپورت كۇنىنە ارنالعان كاسىبي مەرەكەگە وراي الماتى وبلىسىنىڭ اكىمى ريو-دە-جانەيرودا (برازيليا) وتكەن XV جازعى پاراليمپيادا ويىندارىنىڭ جۇلدەگەرى قويشىبايەۆا راۋشان ەكى بولمەلى پاتەردىڭ كىلتىن تابىستاعان ەدى.
وتكەن كەزەڭدەگى كورسەتكىنشتى جاڭارتۋعا تالپىنعان مەكەمەنىڭ العا قويعان ماقساتتارى الاتاۋدىڭ شىڭىمەن تەڭ.
اعىمداعى جىلى الماتى وبلىسى مۇگەدەك-سپورتشىلارى سپورت تۇرلەرى بويىنشا ق ر چەمپيوناتتارى مەن كۋبوكتارى؛ اقپاندا (ءباا) 11 فازانىڭ حالىقارالىق ءتۋرنيرى پاۋەرليفتينگ، جەڭىل اتلەتيكا، ساداق اتۋ بويىنشا ونەر كورسەتۋ جوسپارلانعان. ناۋرىزدا وزبەكستاندا 100 دويبىدان ازيا چەمپيوناتىنا قاتىسپاقپىز. ءساۋىر ايىندا تاەكۆوندودان ازيا چەمپيوناتىندا باعىمىزدى سىناماققا بەكىندىك، جەلتوقسان ايىندا گەرمانيادا اربامەن بيلەۋدەن الەم چەمپيوناتىنا بارامىز، ال 5-25 جەلتوقسان ارالىعىندا برازيليادا باستاۋ الاتىن XXIV جازعى سۋردليمپيادا ويىندارىنا بارماقپىز»،-دەيدى «مۇگەدەكتەرگە ارنالعان وبلىستىق مامانداندىرىلعان سپورت مەكتەبى» كمم ديرەكتورى ەرلان باقىتباي.
