«بىلەككە سەنگەن زاماندا ەشكىمگە دەس بەرمەدىك، بىلىمگە سەنگەن زاماندا قاپى قالىپ جۇرمەلىك» دەپ ابىلاي حان كەمەل كەلەشەك يەلەرىنىڭ جىگەرىن جانىعانى ەستى جانعا بەلگىلى. ءدال سول ءبىلىم مەن عىلىم عاسىرىنا تابان تىرەگەن ساتتە، قوعامنىڭ شام- شىراعى بولعاندار ۇلاعاتتى ۇستازدار ەكەنى انىق.

قازاننىڭ العاشقى جەكسەنبىسىنە تۇسپا-تۇس كەلگەن ۇستازداردىڭ ايشىقتى مەرەكەسى ولاردىڭ مەرەيىن ۇستەم ەتەرى ءسوزسىز.

بۇگىندە مۇعالىمدەر قاۋىمى ولار سۇيرەگەن ءبىلىم اتتى كەمەنىڭ باعىتى قاشاندا بيلىك نازارىندا.

وعان دالەل، ەل اۋماعىندا مەكتەپتىڭ ماتەريالدىق-تەحنيكالىق بازاسىنىڭ جىل سايىن جاڭارتىلىپ، ودان قالسا جاڭا ءبىلىم وردالارىنىڭ بوي كوتەرۋى. ماسەلەن، تەك الماتى وبلىسىندا عانا اعىمداعى جىلى  32 ءبىلىم بەرۋ نىسانىنىڭ قۇرىلىسى جۇرگىزىلدى. ونىڭ ىشىندە ءۇش اۋىسىمدى وقىتۋدى جويۋ ءۇشىن 17 مەكتەپتىڭ سالىنۋى ءبىلىم سالاسىنا اۋدارىلعان نازاردىڭ باسىمدىعىن كورسەتپەي مە؟ قالا بەردى ءدال بيىلعى جىلى وبلىستا 55 ءبىلىم بەرۋ نىسانى كۇردەلى جوندەۋدەن وتكەن. بۇل ماقساتقا قازىنادان 23،9 ملرد تەڭگە قارجى قاراستىرىلعان.

جالپى 2020 جىلعا ءبىلىم سالاسىن قارجىلاندىرۋعا 320،9 ملرد تەڭگە قارجى بولىنگەن. ال جەتىسۋ وڭىرىندەگى ءبىلىم مەكەمەلەرىنىڭ ماتەريالدىق-تەحنيكالىق بازاسىن جاڭارتۋعا 2020 جىلعا 5 ملرد 070 ملن تەڭگە بەرىلگەن.

نىساننىڭ جاڭارعانى، جارقىن بولاشاق يەلەرىنىڭ ساپالى ءبىلىم الۋىنا ىقپال ەتەرى ءسوزسىز. سوڭعى توعىز ايداعى ەسەپ بويىنشا الماتى وبلىسىندا 1181 مەكتەپكە دەيىنگى مەكەمە  جۇمىس جاساسا،  اتالعان نىسان قابىرعاسىندا 87318 بالا تاربيەلەنۋدە.

ءدال وسىنداي بۇلدىرشىندەردى وبلىس بويىنشا 41 625 پەداگوگ ءبىلىم نارىمەن سۋسىنداتىپ وتىر.

مەرەكە قارساڭىندا بارلىق وبلىس اۋماعىنداعى مۇعالىمدەر قاۋىمى ەلەۋسىز قالمايتىنى انىق. سولاردىڭ ىشىندەگى ءبىر پاراسىن ءوڭىر باسشىسى اماندىق باتالوۆ سالتاناتتى شارادا ارنايى قۇتتىقتادى.

– تۇڭعىش پرەزيدەنتىمىزدىڭ باستاماسىمەن 2019 جىلى «پەداگوگ مارتەبەسى تۋرالى» زاڭ قابىلدانىپ،  مەملەكەت باسشىسى قاسىم-جومارت توقايەۆتىڭ  حالىققا جولداۋىندا  مۇعالىمدەردىڭ دارەجەسىن كوتەرىپ، جاعدايىن جاقسارتۋعا  ەرەكشە ءمان بەرىلدى. راسىندا، ۇستاز – ۇلى ماماندىق. ۇرپاق بويىنا ءبىلىم ءنارىن قۇيعان ەڭبەكتەرىڭىز وراسان. سىزدەرگە شىعارماشىلىق تابىس تىلەيمىن. بارشاڭىزدى كاسىبي مەرەكەلەرىڭىزبەن شىن جۇرەكتەن قۇتتىقتايمىن، – دەدى وبلىس اكىمى اماندىق عابباس ۇلى ءوز سوزىندە.

جيىن بارىسىندا ەڭبەگىمەن ەلەنگەن ءبىر توپ ۇستازدار قاۋىمى لايىقتى ماراپاتتارىن الدى. مەرەكە كۇنى مەرەيلەرى ارتقان ۇستازدار قاتارىندا تالدىقورعان قالاسى № 22 ورتا مەكتەپ ءمۇعالىمى راحيليا اقشولاقوۆا، الماتى وبلىستىق ءبىلىم بەرۋدى دامىتۋ وقۋ-ادىستەمەلىك ورتالىعىنىڭ ديرەكتورى الۋا قابدۋلوۆا، ق.بايسەيىتوۆ اتىنداعى تالدىقورعان ساز كوللەدجىنىڭ ارنايى ءپان وقىتۋشىسى كاميل ناعيمەتۋللا ۇلى، سارقان پوليتەحنيكالىق كوللەدجى ديرەكتورىنىڭ وندىرىستىك وقىتۋ جۇمىسى جونىندەگى ورىنباسارى  باۋىرجان توبىشاقوۆتا بار. ولار  قازاقستان رەسپۋبليكاسى ءبىلىم جانە عىلىم مينيسترلىگىنىڭ  «ى. التىنسارين» توسبەلگىسىن كەۋدەلەرىنە تاقتى.

ودان وزگە، «ۇزدىك اۋىل مەكتەبى» نوميناسياسىنىڭ جەڭىمپازى قاراساي اۋدانى، المالىباق اۋىلىنداعى ورتا مەكتەپ-گيمنازياسى ديرەكتورى – ساۋلە ماحامبەتوۆا اتانسا، «ۇزدىك كاسىپتىك ءبىلىم بەرۋ ۇيىمى» نوميناسياسى بويىنشا، جامبىل اتىنداعى ۇزىناعاش كاسىپتىك  كوللەدجى  ديرەكتورى –  بولات التايەۆ جەڭىمپاز دەپ تانىلدى.

ال «ۇزدىك سىنىپ جەتەكشىسى»  اتالىمىندا وق بويى وزعان الاكول اۋدانى ءۇشارال №1 ورتا مەكتەپتىڭ ءمۇعالىمى،  ايگۇل احمەتوۆا بولدى. بارشا جەڭىمپازدارعا  ءى دارەجەلى ديپلوم جانە 500 مىڭ تەڭگە تابىستالدى.

ۇستازدار ۇلاعاتىن ساراپقا سالاتىن وبلىسىمىزدىڭ «جىلدىڭ ۇزدىك ءمۇعالىمى» اتالىمىندا اقسۋ  اۋدانى، عاني مۇراتبايەۆ اتىنداعى ورتا مەكتەپتىڭ ماتەماتيكا ءپانى ءمۇعالىمى اسىل قايمۇحانوۆ جەڭىپ شىقتى. ۇزدىك اتانعان ۇستاز تەمىر تۇلپار ءمىندى.

وسىلايشا، ەلىنىڭ وركەندەۋىنە شاكىرت تاربيەلەۋ ارقىلى ۇلەس قوسىپ جۇرگەن جاندار لايىقتى ماراپاتقا يە بولدى.

– بۇل ەتكەن ەڭبەكتىڭ جەمىسى دەگەن ويدامىن. وتە قۋانىشتىمىن. سوزبەن ايتىپ جەتكىزۋ مۇمكىن ەمەس. الداعى تاڭدا بۇدان دا جاقسى ناتيجەگە قول جەتكىزەمىز. ءار ۇستاز ءوز ماماندىعىن جاقسى كورۋى كەرەك. مەن ءوز شاكىرتتەرىمنىڭ ومىردەن ورىندارىن تابۋعا كومەكتەسكىم كەلەدى. ۇستازداعى باستى قاسيەت الدىنداعى وقۋشىعا دەگەن شەكسىز مەيىرىم دەگەن ويدامىن. ءبىز اسا ۇلكەن ىقىلاسپەن شاكىرت تاربيەلەۋ ىسىندە جاۋاپكەرشىلىك تانىتۋ كەرەكپىز، – دەدى «جىلدىڭ ۇزدىك ءمۇعالىمى» اسىل قايمۇحانوۆ.

«التى الاشتىڭ يگى جاقسىسى باس قوسسا، توردەگى ورىن ۇستازدىكى» دەگەن ماعجان جۇمابايەۆتىڭ ورامدى سوزىنەن-اق ۇستازداردىڭ قاشاندا ءقادىرلى جان ەكەنىن اڭعارۋ قيىن ەمەس.

قوعامنىڭ ءار سالاسىنىڭ تىزگىنىن ۇستاعان زيالى قاۋىم دا، ايدى باعىندىرعان ادامدا، ەلدى اۋزىنا قاراتقان دانا دا ۇستاز اتتى ۇلاعاتتى تۇلعادان ءتالىم الدى.

جاستاردىڭ جالىناتۋى دا وسى ءبىر قاستەرلى جاندارعا تىكەلەي بايلانىستى.  ك.د.ۋشينسكيي ايتقانداي «ءمۇعالىم ءىسى سىرتتاي قاراپايىم بولعانمەن – تاريحتاعى ەڭ ۇلى ءىستىڭ ءبىرى».  تاريحتىڭ سان پاراعىنا قايتالانباس قولتاڭبالارىن شاكىرتتەرى ارقىلى قالدىراتىن قاۋىمنىڭ ەڭبەكتەرى ەرەن.

انار سابىروۆا، الماتى وبلىسى.