جەتىسۋ وبلىسىندا بيىل ءتورت تۇلىك مالدىڭ سانى 3،018 مىڭ باسقا جەتتى، سونىڭ ىشىندە ءىرى قارا – 613،3 مىڭ، قوي-ەشكى – 2،183،5 مىڭ، جىلقى – 201،4 مىڭ، تۇيە – 2،1 مىڭدى قۇراعانىن جەتىسۋ وبلىسىنىڭ اكىمى بريفينگتە بەيبىت يسابايەۆ ايتتى، – دەپ حابارلايدى Dalanews.kz جەتىسۋ وبلىسى اكىمىنىڭ باسپا ءسوز قىزمەتىنە سىلتەمە جاساپ.

وسىنىڭ ارقاسىندا ەت ءوندىرىسى 28،6 مىڭ توننا، ءسۇت ءوندىرىسى 87،3 مىڭ تونناعا جەتىپ، وتكەن جىلمەن سالىستىرعاندا ارتقان.

بەيبىت يسابايەۆتىڭ سوزىنە سۇيەنسەك، جالپى جىل سوڭىنا دەيىن اۋىل شارۋاشىلىعى ءونىمىنىڭ كولەمى 2،8% ءوسىپ، 544 ملرد تەڭگەگە جەتەدى دەپ جوسپارلانۋدا.

سالانى بۇدان ءارى دامىتۋ ءۇشىن 2027 جىلعا دەيىن قۇنى 57،9 ملرد تەڭگە بولاتىن 53 ينۆەستيسيالىق جوبانى ىسكە اسىرۋ كوزدەلگەن. جوبالار ىسكە اسقاندا تۇراقتى 1،2 مىڭ جاڭا جۇمىس ورنى اشىلادى.

ونىڭ ىشىندە «ءىرى جوبالار» پيلوتتىق جوباسى اياسىندا 44،8 ملرد تەڭگەگە 18 جوبا كوزدەلسە، بيىل 400 باسقا ارنالعان، 2 ملرد تەڭگەلىك تاۋارلى ءسۇت فەرماسى سالىنا باستايدى. بۇل نىسان 2024 جىلى ىسكە قوسىلادى دەپ مەجەلەنگەن.

– اۋىل حالقىنىڭ تابىسىن ارتتىرۋعا باعىتتالعان «اۋىل اماناتى» جوباسىن ىسكە اسىرۋ شەڭبەرىندە 3،2 ملرد تەڭگە ءبولىندى، 562 ۇمىتكەردەن پۋل قالىپتاستىرادى، – دەپ اتاپ ءوتتى سپيكەر.