گرانت يەگەرلەرىنە جوبالارىن ءساتتى جۇزەگە اسىرۋ ءۇشىن 3 ملن تەڭگەدەن بەرىلدى. سولاردىڭ قاتارىندا «عىلىم» باعىتى بويىنشا «كامەلەتكە تولماعان جاسوسپىرىمدەردىڭ پسيحولوگيالىق دەنساۋلىعىن نىعايتۋ جانە سۋيسيدتىك مىنەز-قۇلىقتىڭ الدىن الۋ» جوباسىن ۇسىنعان جانسەرىك بايدەنوۆ سۋيسيدتىك ارەكەتكە بەيىم، ومىرلىك قيىن جاعدايعا تاپ بولعان، ءساتسىز وتباسىندا وسكەن 12-16 جاس ارالىعىنداعى جاسوسپىرىمدەردىڭ پسيحولوگيالىق دەنساۋلىعىن نىعايتۋ مەن سۋيسيدتىك مىنەز-قۇلىقتىڭ الدىن الۋ بويىنشا كەشەندى زەرتتەۋ جۇرگىزبەكشى.
ال سالتانات جاقسىلىقوۆا ۇشتوبە قالاسىندا اۋداندىق كىتاپحانانىڭ جانىنان زاماناۋي قۇرالدارمەن جابدىقتالعان كوۆوركينگ ورتالىعىن اشپاق نيەتتە. ول بۇل ورتالىقتى جاستاردى كىتاپ وقۋعا تارتاتىن، سونىمەن قاتار ءتۇرلى سەمينارلار، دارىستەر، ترەنينگتەر وتكىزۋگە بولاتىن ءبىلىم ورداسىنا اينالدىرماق.
اقپاراتتىق تەحنولوگيا بويىنشا «گالوگرافيالىق 3D ۆەنتيلياتور» جوباسىمەن گرانت ۇتقان جالعاس مانارحان ءوز باستاماسى جايلى بىلاي دەيدى: – گالوگرافيالىق 3D ۆەنتيلياتور دەگەنىمىز – ءۇش ولشەمدى كەسكىن پروەكسياسىن اۋادا «قالقىتىپ» تۇراتىن تەحنولوگيالىق ازىرلەمە.
جوبا جەتىسۋ وبلىسى كولەمىندە يننوۆاسيالىق جارنامالىق قىزمەتتەردى ۇسىنۋدى ماقسات ەتەدى. جوبانى قولدانۋ اياسى كەڭ. ۆەنتيلياتورلاردى مەترو، اۋەجاي، ساۋدا ورتالىقتارىندا، اۆتوسالونداردا، بۋتيكتەردە، قوناقۇيلەردە جانە باسقا دا حالىق كوپ شوعىرلانعان ايماقتاردا پايدالانۋعا بولادى. بۇل تەك اقپاراتتىق ديسپلەي عانا ەمەس، B2B سەگمەنتىنە ارنالعان جارنامالىق قۇرال، – دەيدى ول.
سونداي-اق، مەديا سالاسىندا اتامۇرا مۇساحانوۆ «قاسقىر ۇلىعان تۇندە» قىسقامەتراجدى ءفيلمىن ءتۇسىرۋدى قولعا السا، دياس نابي موبيلوگرافيالىق قىزمەتتەر ۇسىنباق. بۇدان وزگە دە گرانت ۇتقان قىزىقتى جوبالاردى جەتىسۋلىق جاستار ءبىر جىل كولەمىندە جۇزەگە اسىرماق.
