بۇگىنگى كۇنى اقسۋ، بالقاش، قاراساي، قاراتال، كوكسۋ، رايىمبەك اۋداندارى مەن تالدىقورعان قالاسىندا سەرۆيستىك اكىمدىكتەر جۇمىس ىستەيدى. ولاردا قىزمەت كورسەتەتىن مەكەمەلەر وكىلدەرىن ءبىر جەرگە شوعىرلاندىرۋ ارقىلى قىزمەت الۋدى جەڭىلدەتۋگە مۇمكىندىك جاسالعان. بارلىق مەملەكەتتىك ورگاننىڭ وكىلدەرى Open space ادىسىمەن اشىق كابينالاردا وتىرىپ، كەلۋشىلەرگە قىزمەت كورسەتەدى.
دەگەنمەن الماتى وبلىسى بويىنشا سىبايلاس جەمقورلىققا قارسى قىزمەت دەپارتامەنتىنىڭ باسشىسى ەرنار ماقاجانوۆ بۇل تۋرالى ءوز پىكىرىن ءبىلدىرىپ، ۇسىنىس ايتتى:
– الماتى وبلىسى اۋماعىندا بۇگىنگى كۇنى 7 سەرۆيستىك اكىمدىك بار. الايدا بۇل رەسپۋبليكا بويىنشا تومەنگى كورسەتكىش. سوندىقتان وسىنداي اكىمدىكتەردىڭ بارلىق اۋدان-قالالاردا اشىلۋىنا تاپسىرما بەرۋىڭىزدى سۇرايمىن، – دەدى ە.ماقاجانوۆ.
وسىدان ءبىر جارىم جىل بۇرىن رەسپۋبليكادا العاشقى بولىپ «سەرۆيستىك اكىمدىك» قاراتال اۋدانىندا اشىلىپ، ۇلگى رەتىندە كورسەتىلگەنىن ەسكە العان وبلىس اكىمى اماندىق باتالوۆ:
– بارلىق اۋدان-قالالاردا سەرۆيستىك اكىمدىكتەر اشۋدى جىل سوڭىنا دەيىن اياقتاۋىمىز كەرەك. وندا قىزمەت الۋشىلار ءۇشىن بارلىق قولايلى جاعدايلار جاسالاتىن بولسىن. مەكەمەلەرگە كىرۋ شەكتەلگەن قازىرگىدەي كەزەڭدە ءار جەرگە جۇرىگىپ جۇرمەي، مەملەكەتتىك قىزمەتتەردى ءبىر جەردەن الاتىن وسىنداي سەرۆيستىك اكىمدىكتەر حالىققا اسا قاجەت، – دەپ اتاپ ءوتتى.
ەسكە سالساق، 21 تامىزدا وسىنداي اشىقتىق پرينسيپىندەگى سەرۆيستىك اكىمدىك ىلە اۋدانىندا اشىلادى دەپ جوسپارلانىپ وتىر.
الماتى وبلىسى اكىمىنىڭ باسپا ءسوز قىزمەتى
