وسىلايشا ىلە اۋدانىندا بىردەن 900، 600 جانە 300 ورىندى 3 مەكتەپ 1 قىركۇيەك كۇنى قاراوي، قوسوزەن جانە بورالداي اۋىلدارىندا اشىلدى. اۋىلداستارىن قۋانىشتى جاڭالىقپەن وبلىس اكىمىنىڭ ورىنباسارى باتىرجان بايجۇمانوۆ جانە اۋدان اكىمى باعدات قاراسايەۆ قۇتتىقتادى.
جاڭادان قولدانىسقا بەرىلگەن 1600-دەن استام بالا وقيتىن ءۇش جاڭا مەكتەپتە 147 پەداگوگ جۇمىس ىستەيدى. وقۋ ءۇشىن بارلىق جاعداي جاسالعان. موديفيكاسيالىق كابينەتتەر، اكت جانە سپورت زالدارى، لينگوفون جانە ادىستەمەلىك كابينەتتەر، كومپيۋتەرلىك سىنىپتار، شەبەرحانالار، اسحانالار، وقۋ زالدارى بار كىتاپحانالار جانە باسقاسى.
900 ورىنعا ارنالعان مەكتەپتىڭ اشىلۋ سالتاناتىندا قۇتتىقتاۋ ءسوز سويلەگەن باتىرجان بايجۇمانوۆ:
– پرەزيدەنتىنىڭ تاپسىرماسىنا سايكەس وبلىس مەكتەپتەرىندە وقۋ پروسەسى سانيتارلىق شەكتەۋلەردى ساقتاي وتىرىپ جانە «ءبىر سىنىپ – ءبىر كابينەت» جۇيەسى بويىنشا ءداستۇرلى فورماتتا جۇرگىزىلەتىن بولادى. وبلىستا 438 مىڭ وقۋشى قايتادان پارتاعا وتىرادى. ءقازىر ءبىلىم ساپاسىن ارتتىرۋ ءۇشىن بەلسەندى جۇمىس ىستەۋ وتە ماڭىزدى. مەملەكەتتىك قولداۋدىڭ ارقاسىندا وسى ماقساتتا بارلىق جاعداي جاسالعان. جاڭا مەكتەپتەر سالىنۋدا، كۇردەلى جوندەۋ جۇرگىزىلۋدە، ماتەريالدىق-تەحنيكالىق بازاسى جاڭارتىلۋدا. بۇگىندە اشىلىپ جاتقان جاڭا مەكتەپتەر زاماناۋي ءبىلىم بەرۋ ورتالىقتارىنا اينالادى دەپ سەنەمىن. وبلىس اكىمىنىڭ اتىنان بارشاڭىزدى ءبىلىم كۇنىمەن قۇتتىقتايمىن. وقۋشىلارعا، ولاردىڭ اتا-انالارىنا جانە ۇستازدارىنا زور دەنساۋلىق جانە جاڭا وقۋ جىلىندا تابىس تىلەيمىن، – دەدى.
سونداي-اق ءبىلىم كۇنى 450 ورىنعا ارنالعان الما-ماتەر قاراساي اۋدانىنا قاراستى باتان اۋىلىندا پايدالانۋعا بەرىلدى. اۋدان اكىمى جانداربەك دالابايەۆ اتاپ وتكەندەي، بۇگىنگى تاڭدا اۋدان مەكتەپتەرىندە 72 مىڭنان استام وقۋشى ءبىلىم الۋدا. بۇل بىلتىرعى وقۋ جىلىمەن سالىستارعاندا 6 مىڭعا كوپ.
– اۋدان حالقى تىعىز ورنالاسقاندىقتان، مەكتەپ قۇرىلىسى – بۇل ءۇش اۋىسىمدى وقىتۋدى جويۋعا باعىتتالعان ۇلكەن الەۋمەتتىك ماڭىزى بار وقيعا. ءقازىر قاراساي اۋدانىندا 4100 ورىنعا ارنالعان 3 مەكتەپ سالىنۋدا، ونىڭ ىشىندە «اسىل ارمان» شاعىن اۋدانىندا. سونداي-اق، 1800 ورىندىق مەكتەپتەرگە 3 قوسىمشا قۇرىلىس نىسانى سالىنۋدا. سونىمەن قاتار، تاعى 3 جاڭا مەكتەپتىڭ قۇرىلىسى ءۇشىن جوبالىق-سمەتالىق قۇجاتتاما دايىندالۋدا، – دەدى ج.دالباعايەۆ.
ەسكەلدى اۋدانىنا قاراستى اباي اۋىلىندا 180 ورىندى 25 بالاعا ارنالعان شاعىن ورتالىعى بار جاڭا مەكتەپ قولدانىسقا بەرىلدى. ونىڭ قۇرىلىسىنا جەرگىلىكتى بيۋدجەتتەن 1 ملرد. تەڭگەدەن اسا قاراجات ءبولىندى. قۇرىلىس جۇمىستارىن «تالاس-قۇرىلىس» ج ش س مەردىگەر كومپانياسى جۇرگىزدى. اۋىل تۇرعىندارىن قۋانىشىمەن اۋدان اكىمى رۋستام الي قۇتتىقتادى.
ونلاين-رەجيمدە وقۋعا قاراماستان، ەسكەلدى اۋدانى ءۇشىن وتكەن وقۋ جىلى وتە ءساتتى ءوتتى. ۇبت تاپسىرعان 360 تۇلەكتىڭ 190-ى وتاندىق جەتەكشى جوعارى وقۋ ورىندارىندا گرانت يەگەرى اتانسا، تاعى 8ء-ى وبلىس اكىمىنىڭ گرانتىنا يە بولدى. ال 35ء-ى شەتەلدە تەگىن وقيدى. جالپى اۋداندا وتكەن جىلدىڭ قورىتىندىسى بويىنشا ۇلگەرىم دەڭگەيى 61 پايىزدان استى.
ەستەرىڭىزگە سالا كەتەيىك، پانفيلوۆ اۋدانىندا مەكتەپ كونستيتۋسيا كۇنى سالتاناتتى تۇردە اشىلعان ەدى.
الماتى وبلىسىندا بارلىعى 33 مەكتەپتىڭ قۇرىلىسى جۇرگىزىلۋدە. ونىڭ 10-ى جىل سوڭىنا دەيىن پايدالانۋعا بەرىلەدى دەپ جوسپارلانۋدا. ال 6-ى ءبىلىم كۇنىندە قولدانۋعا بەرىلدى. وبلىستىڭ بارلىق مەكتەپتەرى «Ashyq» جوباسىندا تىركەلگەن، پەداگوگتار مەن مەكتەپ ۇجىمى ۆاكسيناسيالاندى. ءبىرىنشى سىنىپقا 47 مىڭعا جۋىق بالا باردى. جالپى وقۋشىلار سانى 438 مىڭعا جەتتى.
