وبلىس اكىمى اماندىق باتالوۆ سالتاناتتى قابىلداۋعا كەلگەن ارداگەرلەردى ۇلى جەڭىس كۇنىمەن قۇتتىقتاي وتىرىپ، ولارعا مىقتى دەنساۋلىق، سەرگەك كوڭىل، ۇزاق عۇمىر تىلەدى:
– قۇرمەتتى ارداگەرلەر، سىزدەردى جەڭىستىڭ جارقىن مەرەكەسىمەن شىن جۇرەكتەن قۇتتىقتايمىن! سوعىستىڭ اياقتالعانىنان 74 جىل ءوتتى. ءبىراق سول سۇراپىل جىلدارداعى ءبىزدىڭ اتا-اپالارىمىزدىڭ ەرلىگى ءالى كۇنگە ءبىزدىڭ جادىمىزدا. وكىنىشكە قاراي، ورتامىزداعى سوعىس ارداگەرلەرىنىڭ قاتارى كۇننەن كۇنگە سيرەپ بارادى. ەلباسىنىڭ قامقورلىعىنىڭ ارقاسىندا ارداگەرلەر مەن باسقا دا ساناتتاعى ازاماتتارعا ساناتورييدە تەگىن ەمدەلۋ مەن وڭالتۋ شارالارى ءۇشىن 470 ملن. تەڭگە ءبولىنىپ وتىر. سول سياقتى ۇلى وتان سوعىسى ارداگەرلەرى مەن مۇگەدەكتەرىنە قوسالقى جانە كومەكشى قۇرالدار ءۇشىن جەرگىلىكتى بيۋدجەتتەن 3 ملرد. تەڭگەدەن استام قارجى قاراستىرىلدى. جەڭىس كۇنىنە وراي وبلىستىق قازىنادان ءاربىر سوعىس ارداگەرىنە ءبىر رەتتىك ماتەريالدىق كومەك رەتىندە 500 مىڭ تەڭگەدەن بەرىلەدى، – دەدى ا. باتالوۆ.
سول سياقتى اماندىق باتالوۆ ءوز سوزىندە جۋىردا وبلىسقا ەل پرەزيدەنتى قاسىم-جومارت توقايەۆتىڭ كەلىپ، ءوڭىردىڭ الەۋمەتتىك-ەكونوميكالىق دامۋ جاعدايىمەن تانىسقانىن ايتتى:
– مەملەكەت باسشىسى ساپارىن قورىتىندىلاي كەلە ءوڭىردىڭ وركەندەۋ جايىنا وڭ باعا بەردى. وندا ءارقايسىلارىڭىزدىڭ دا ۇلەستەرىڭىز بار. سىزدەردىڭ مايدانداعى جانە ەڭبەك دالاسىنداعى ەرلىكتەرىڭىز ءۇشىن، جاستاردى پاتريوتتىق رۋحتا تاربيەلەۋدەگى ماڭىزدى رولدەرىڭىز ءۇشىن ايتاتىن العىسىمىز زور. ءبىز ءوز تاراپىمىزدان سىزدەرگە ءارقاشاندا قولداۋ كورسەتەمىز، – دەپ ا. باتالوۆ ارداگەرلەرگە دەگەن قۇتتىقتاۋ لەبىزىن ءبىلدىردى.
ارداگەرلەر اتىنان سارقان اۋدانىنان كەلگەن بەرلىبەك ىسقاقوۆ مەرەكەلىك قۇتتىقتاۋ ءسوزىن ارنادى.
– مەملەكەت بىزگە قامقورلىق جاساپ، ۇنەمى كوڭىل ءبولىپ، قۇرمەتتەپ كەلەدى. ءبىز بالالارىمىزدىڭ بەيبىت ءومىر سۇرگەنىن، وسى ازاتتىعىمىز بەن تاۋەلسىزدىگىمىزدى باعالاي بىلگەنىن قالايمىز جانە بارشاڭىزعا ءاردايىم اشىق اسپان، دەنساۋلىق پەن باقىتتى عۇمىر تىلەيمىن، –ب. ىسقاقوۆ.
العىس تىلەكتەرىن اتى اڭىزعا اينالعان «پاراۆوز اپا» - التىناي ەسبولاتوۆا جانە باسقا دا ارداگەرلەر ءبىلدىرىپ، باتالارىن بەردى.
مۇنان ءارى سالتاناتتى شارا مەرەكەلىك تۇسكى اسپەن جالعاستى. وعان وبلىستىڭ تۇكپىر-تۇكپىرىنەن 150 ارداگەر مەن تىل ەڭبەككەرى قاتىستى. ولاردىڭ ءارقايسىسىنا گۇل شوقتارى مەن سىيلىقتار تابىس ەتىلدى.
الماتى وبلىسى اكىمىنىڭ باسپا ءسوز قىزمەتى
