جەتىسۋ وبلىسىندا 46 ملن تەڭگەنىڭ مال ۇرلىعى اشىلدى، دەپ حابارلايدى Dalanews.kz.
13 ساۋىردە ەسكەلدى اۋدانىنىڭ تۇرعىنى پوليسياعا جۇگىنگەن. ونىڭ سوزىنشە، جايىلىمنان 81 باس اسىل تۇقىمدى ءىرى قاراسىنىڭ 39-ى قايتپاعان. كەلتىرىلگەن ماتەريالدىق شىعىن 46 ميلليون تەڭگەدەن اسقان.
ارىز تۇسكەن بويدا پوليسيا قىزمەتكەرلەرى بىردەن جەدەل ىزدەستىرۋ شارالارىنا كىرىسكەن. سوتقا دەيىنگى تەرگەپ-تەكسەرۋ بارىسىندا وقيعانىڭ ءمان-جايى بەلگىلى بولدى.
"مالدى 17 جىل بويى باعىپ كەلگەن 45 جاستاعى باقتاشى كۇدىككە ءىلىندى. جەدەل تەرگەۋ ارەكەتتەرى ناتيجەسىندە ونىڭ قىلمىسقا قاتىسى بارى انىقتالدى. كۇدىكتى ۇستالىپ، قاماۋعا الىندى. ءقازىر بۇل ءىس بويىنشا تەرگەۋ جۇرگىزىلىپ جاتىر. بارلىق مال ءوز يەسىنە قايتارىلدى"، - دەدى پوليسيا.
