شىعارماشىلىق شارا جارتى عاسىردان استام ۋاقىت «حابار» تەلەارناسىندا ەلەۋلى ەڭبەك ەتىپ، كوگىلدىر ەكران ارقىلى جاڭالىقتارعا جارشى بولىپ، جەتىسۋ جۇرتىنىڭ مۇڭىن مۇڭداپ، جوعىن جوقتاعان ارداگەر جۋرناليست تىلەۋقابىل ۇسەن ۇلىنىڭ قۇرمەتتى دەمالىسقا شىعۋىنا وراي ۇيىمداستىرىلعان.
تىلەۋقابىل ۇسەن ۇلىنىڭ مەرەيتويىنا وراي ۇيىمداستىرىلعان شىعارماشىلىق كەشتىڭ شىمىلدىعىن الماتى وبلىسىنىڭ اكىمى اماندىق عابباس ۇلى قۇتتىقتاۋ سوزىمەن اشىپ، ىزگى تىلەگىن جەتكىزدى. بۇقارا مەن بيلىك اراسىنداعى التىن كوپىرلىك مىندەتىن ادال اتقارعان جۋرناليستكە شاپان جاۋىپ، حالىق الدىنداعى مارتەبەسىن تاعى ءبىر اسقاقتاتتى.
سونداي-اق ارداگەر ءجۋرناليستىڭ جاقىندا عانا جارىق كورگەن «حابار-اعا» جانە ونىڭ قالجىڭدارى» اتتى جاڭا كىتابىنىڭ تۇساۋى كەسىلدى. باسىلىمعا اۆتوردىڭ ەل اۋزىندا جۇرگەن ءازىل اڭگىمەلەرى مەن ۇزەڭگىلەس دوستارىنىڭ، شاكىرتتەرىنىڭ تىلەۋقابىل جايلى وي تولعامدارى ەنگىزىلگەن.
تەلەجۋرناليستيكانىڭ تارلانى تىلەۋقابىل مىڭجاساردىڭ تەليەۆيزيا سالاسىندا ەڭبەك ەتىپ، تەر توككەنىنە بيىل 44 جىل. سونىڭ 21 جىلىندا الماتى وبلىسىندا مەنشىكتى ءتىلشى بولىپ، 10 مىڭنان استام سيۋجەت جاساعان.
جەتىسۋ جەرىنە «حابار-اعا» بولىپ تانىلعان بەلگىلى ءتىلشى قازاقستان رەسپۋبليكاسى پرەزيدەنتى گرانتىنىڭ يەگەرى، قازاقستان جۋرناليستەر وداعى مەن «نۇرسۇڭقار» سىيلىقتارىنىڭ لاۋرەاتى، الماتى وبلىسىنىڭ قۇرمەتتى ازاماتى اتاعىنا دا يە بولعان.
كەش بارىسىندا «حابار» اگەنتتىگى الماتى فيليالىنىڭ شەف-رەداكتورى قىمبات حانگەلدى ق ر اقپارات جانە قوعامدىق دامۋ ءمينيسترى داۋرەن ابايدىڭ ارنايى «العىس حاتىن» تاپسىردى.
ءوز كەزەگىندە ءسوز العان تىلەۋقابىل ۇسەن ۇلى:
«مىنەكي، 25 جىلداي «حابار» اگەنتتىگىنە ايانباي قىزمەت جاسادىم. «حاباردى» تانىتۋعا اتسالىستىم. ال «حابار» ماعان ۇلكەن ابىروي اپەردى. ەندى مىنە، ءوزىمنىڭ قىزمەتتىك مىندەتىمدى اياقتاپ جاتقان تۇستا وسى ەلگە ءبىر راقمەتىمدى ايتىپ، حالىقپەن قاۋىشىپ، پىكىر الماسىپ، اڭگىمەلەسەيىك دەگەن نيەتپەن وسى كەزدەسۋدى ۇيىمداستىرىپ وتىرمىز. سوندىقتان مەن بۇل كەشتىڭ اتىن «جەتىسۋ – جۇرەگىمدە» دەپ اتاۋدى ءجون كوردىم»، دەپ العىسىن ءبىلدىردى.
ايتا كەتۋ كەرەك، شىعارماشىلىق كەش الماتى وبلىسى اكىمدىگىنىڭ قولداۋىمەن ۇيىمداستىرىلعان.
بالجان جۇمانبەكوۆا
