ءى. جانسۇگىروۆ اتىنداعى جەتىسۋ ۋنيۆەرسيتەتىندە زاڭ مەن ءتارتىپ قاعيداسى اياسىندا «كينو مەن تەاترداعى زاڭ بەينەسى: قوعام ايناسى» اتتى مازمۇندى كەزدەسۋ ءوتتى. تانىمدىق ءىس-شاراعا جەتىسۋ وبلىسىنىڭ مادەنيەت، ارحيۆتەر جانە قۇجاتتاما باسقارماسىنىڭ باسشىسى قۋانىش سۇلەيمەنوۆ، قازاقستاننىڭ حالىق ءارتىسى، قازاقستاننىڭ ەڭبەك سىڭىرگەن ءارتىسى، قازاقستان رەسپۋبليكاسى مەملەكەتتىك سىيلىعىنىڭ لاۋرەاتى گۇلجامال قازاقبايەۆا، سونداي-اق ع.مۇسىرەپوۆ اتىنداعى قازاق مەملەكەتتىك اكادەميالىق بالالار مەن جاسوسپىرىمدەر تەاترىنىڭ اكتەرى، ءانشى ماقسات راحمەت ارنايى قوناق رەتىندە قاتىستى، دەپ حابارلايدى Dalanews.kz.
كەزدەسۋ بارىسىندا كينو مەن تەاتر ونەرىندەگى زاڭ تاقىرىبىنىڭ كورىنىسى، ونىڭ قوعامعا اسەرى، ادىلدىك پەن قۇقىقتىق مادەنيەتتى قالىپتاستىرۋداعى ءرولى كەڭىنەن ايتىلدى. قوناقتار وزدەرىنىڭ شىعارماشىلىق جولىنداعى تاجىريبەلەرىمەن ءبولىسىپ، ونەر ارقىلى قوعامداعى وزەكتى ماسەلەلەردى جەتكىزۋدىڭ ماڭىزدىلىعىنا توقتالدى. سونىمەن قاتار، ساحنا مەن ەكرانداعى كەيىپكەرلەر بەينەسى ارقىلى زاڭ مەن ءتارتىپتىڭ ءمانىن اشۋ جولدارى تۋرالى وي-پىكىرلەرىن ورتاعا سالدى.
ستۋدەنتتەر تاراپىنان قويىلعان سۇراقتار قوناقتاردىڭ اشىق ءارى تەرەڭ جاۋاپتارىمەن جالعاسىن تاۋىپ، ەركىن پىكىر الماسۋ الاڭىنا ۇلاستى. جاستار كوكەيىندەگى كوپتەگەن سۇراقتارىنىڭ جاۋابىن تاۋىپ، كاسىبي باعىت-باعدار جونىندە پايدالى كەڭەستەر الدى. كەزدەسۋ بارىسىندا قوناقتار شىنايى ءارى اسەرلى سۇحبات قۇرىپ، قاتىسۋشىلارعا ەرەكشە رۋحاني اسەر سىيلادى.
ءىس-شارا سوڭىندا ماقسات راحمەت اسەم ءان ورىنداپ، كەشتىڭ كوركىن قىزدىرا ءتۇستى. كەزدەسۋ جوعارى دەڭگەيدە ۇيىمداستىرىلىپ، ستۋدەنتتەر ءۇشىن تاعىلىمى مول، اسەرلى ءارى ەستە قالارلىقتاي شارا بولدى.
