3 تامىزدا جەتىسۋ وبلىسى كەربۇلاق اۋدانىنا قاراستى سارىوزەك اۋىلىندا تولاسسىز جاۋعان جاڭبىردان كەيىن 48 اۋلا، ونىڭ ىشىندە سەگىز تۇرعىن ءۇي سۋ استىندا قالدى، دەپ حابارلايدى Dalanews.kz.
تاۋدان جانە ساي-سالادان اعىلعان سۋ اعىنى قۇلجاباي بي كوشەسىندەگى درەناج جۇيەسىن بۇزىپ ءوتىپ، كوشە بويىمەن جايىلىپ كەتكەن. سونىمەن قاتار ءۋاليحانوۆ، مولداعۇلوۆا، قايسەنوۆ جانە قوجاعۇلوۆ كوشەلەرى دە سۋ تاسقىنىنان زارداپ شەكتى.
توتەنشە جاعدايلار دەپارتامەنتىنىڭ مالىمەتىنشە، سۋ باسۋدىڭ باستى سەبەبى – تۇرعىن ۇيلەردىڭ ىرگەتاسىنىڭ تىم تومەن ورنالاسۋى. ساعات 22:10-دا سۋ تولىق سورىلىپ، زارداپ شەككەندەر مەن ادام شىعىنى تىركەلمەدى. كولىك قوزعالىسى قالپىنا كەلتىرىلدى. وقيعا ورنىندا قۇتقارۋشىلار مەن اكىمدىك قىزمەتكەرلەرى جۇمىس ىستەدى. رەسمي ورگاندار جاعداي تولىق باقىلاۋدا ەكەنىن ايتتى.
الايدا اۋىل تۇرعىندارى بيلىككە وكپەلى. ولاردىڭ ايتۋىنشا، درەناج جۇيەسى بۇرىننان بەرى جاڭبىر سۋىن وتكىزە الماي كەلەدى. قورعانىس ينفراقۇرىلىمىنىڭ جوقتىعى — شەشىلمەي كەلە جاتقان كۇردەلى ماسەلە.
ايتا كەتەيىك، بۇعان دەيىن، 2024 جىلدىڭ كوكتەمىندە اقتوبە وبلىسىندا سۋ قويماسى جارىلىپ، بىرنەشە اۋىلدى سۋ باسقان بولاتىن. ول كەزدە 215 ادام ەۆاكۋاسيالاندى. گيدروتەحنيكالىق نىساننىڭ اپاتتىق جاعدايعا جەتۋىنە جول بەرگەنى ءۇشىن اكىمدىك قىزمەتكەرى كىنالى دەپ تانىلىپ، 1،5 جىل بوستاندىعىن شەكتەۋ جازاسىنا كەسىلگەن ەدى. سول جىلعى تاسقىندار سوڭعى ونجىلدىقتاعى ەڭ اۋىر اپات رەتىندە تىركەلگەن.
