بۇگىن تالدىقورعانداعى ءتىل سارايىندا ۆەتەريناريا قىزمەتكەرلەرى كۇنىنە ارنالعان مەرەكەلىك جيىن ءوتىپ، وندا سالا ەڭبەككەرلەرى ماراپاتتالدى. سول سياقتى اۋدان-قالالارداعى ۆەتەرينارلىق ستانسيالارعا اۆتوكولىكتەردىڭ كىلتى تاپسىرىلدى،- دەپ حابارلايدى Dalanews.kz
مال دارىگەرلەرىن كاسىبي مەرەكەلەرىمەن قۇتتىقتاعان وبلىس اكىمىنىڭ ءبىرىنشى ورىنباسارى الىبەك جاقانبايەۆ ۆەتەريناريانىڭ ەل ومىرىندەگى ماڭىزىنا توقتالىپ، سالا قىزمەتكەرلەرىنە العىسىن جەتكىزدى.
– مەملەكەت باسشىسى قاسىم-جومارت توقايەۆ قازاقستان حالقىنا جولداۋىندا «مال باسىنىڭ اماندىعى جانە ونىمدىلىگى جەرگىلىكتى ۆەتەرينارلاردىڭ ءتيىمدى جۇمىسىنا بايلانىستى. بۇل، تۇپتەپ كەلگەندە، اۋىلداعى اعايىننىڭ ءال-اۋقاتىنا تىكەلەي اسەر ەتەدى» دەپ اتاپ ءوتتى. ۆەتەريناريا قىزمەتى قازىرگى زامان تالابىنا ساي بولماسا، اۋىل شارۋاشىلىعىنىڭ ونىمدىلىگىن ارتتىرۋ مۇمكىن ەمەس. سوندىقتان وسى سالادا جۇيەلى جۇمىس اتقارىلۋى ءتيىس. بۇل رەتتە وبلىس اكىمدىگى تاراپىنان ۆەتەريناريا سالاسىنىڭ ماتەريالدىق-تەحنيكالىق جاعدايىن جاقسارتۋعا تۇراقتى تۇردە كوڭىل ءبولىنىپ كەلەدى. جىل باسىنان وبلىستا ءتورت تۇلىك مال سانى 4%-عا ءوسىپ، 2،8 ميلليونعا جەتتى. بۇل ورايدا ۆەتەرينار مامانداردىڭ ەڭبەگى زور، – دەدى الىبەك اسكەربەك ۇلى.
ءوز كەزەگىندە وبلىستىق ۆەتەريناريا باسقارماسىنىڭ باسشىسى نۇرلان جاماۋبايەۆ ءسوز سويلەپ، سالادا اتقارىلىپ جاتقان جۇمىستار جايلى باياندادى. ونىڭ ايتۋىنشا، وبلىس اۋماعىندا جىل باسىنان جانۋارلاردىڭ اسا ءقاۋىپتى اۋرۋلارىنىڭ قولايسىز وشاعى تىركەلمەگەن. ايماقتا 129 ءسىبىر جاراسى كومىندىلەرى ورنالاسقان، بۇگىندە بەكىتىلگەن تالاپقا ساي ول تولىق قورشالىپ، ەسكەرتپە بەلگىلەرى قويىلعان. اتالعان 129 نىساننىڭ ءبارى «جىلجىمايتىن مۇلىكتىڭ ءبىرىڭعاي مەملەكەتتىك كاداسترلىق كارتاسىنا» ەنگىزىلگەن. سونداي-اق، ادام مەن جانۋارعا ورتاق اۋرۋلاردىڭ الدىن الۋدا ساپالى جۇمىستار اتقارىلىپ، ناتيجەسىندە اۋرۋ وشاقتارى ازايعان. بۇگىنگى تاڭعا وبلىس اۋماعىندا ەپيزووتيالىق احۋال تۇراقتى جانە ۇنەمى باقىلاۋدا.
جيىندا ۆەتەريناريا سالاسىنىڭ دامۋىنا ۇلەس قوسىپ، ەسەلى ەڭبەك ەتىپ جۇرگەن ءبىر توپ قىزمەتكەرگە قۇرمەت كورسەتىلدى. ماسەلەن، وبلىستىق اۋماقتىق ينسپەكسياسىنىڭ تاماق ونىمدەرىنىڭ قاۋىپسىزدىگى ءبولىمىنىڭ باس مامانى گۇلزيرا داۋلەتبەكقىزىنا «ەڭبەك ارداگەرى» مەدالى تاپسىرىلسا، تاعى ءبىر توپ ازامات وبلىس اكىمىنىڭ قۇرمەت گراموتاسى مەن العىس حاتىن يەلەندى. سونىمەن قاتار «ۆەتەريناريانىڭ قۇرمەتتى قىزمەتكەرى»، «ەڭبەك ادامى» مەدالدارىن العاندار دا بار.
بۇعان قوسا، ۆەتەريناريالىق پۋنكتتەرى بار اقسۋ، الاكول، ەسكەلدى، قاراتال، كەربۇلاق، كوكسۋ، پانفيلوۆ، سارقان اۋداندارى مەن تەكەلى، تالدىقورعان قالالارىنداعى ۆەتەريناريالىق ستانسياسى مەكەمەلەرىنە «نيۆا» ماركالى 10 اۆتوكولىكتىڭ، الاكول اۋدانىنا جىلجىمالى ينسينەراتوردىڭ كىلتى تابىس ەتىلدى.
